ئەورووپانە وەروەوارای تا مۍ کەم بۊوەوە، ئینەیچ زەنگێوە خۊفناکا
بە پاو ئەوەکۊڵیای کۊڵیارا زانکۊو دۊرتموندی، بۊنەو گەرمبییەی زەمینێ، وەروەوارای ئەورووپانە تا مۍ کەم بۊوە.
دەسنیشان کریان مانگەو ئاداریوە چەنی ئەوەڵوو قۊناغوو تاویایوە، کەمبییەیوە وەروۍ پێویسیی سەدان ملوێن کەسا بە ئاوۍ وزۊ خەتەریاتۊ.
کۊڵیارەکۍ واتەنشا، فرەو وەروۍ ئینا جە نیمەگۊو سەرنیشتی و مەنتێقە سەرڎەکاو واروو -8 پلۍ سەدینە و ئا مەنتێقۍ کاریگەرییشا سەر نییا بۊنەو فاڕیای کەشوهەوایۊ.
وەلۍ مەنتێقە گەرمەکاو لای سەری -8 پلەو سەدیی ڕێژەو وەروەوارای تا مۍ کەم بۊوە.
بەپاو ورسەنگنایەکا کە سەرنیشت-وەرنیشت و وەرکەوتوو دەوڵەتە یۊگێرتە و ناوەند و وەرکەوتوو ئەورووپاینە ساڵەکاو هەشتایوە تا ئیساتۍ وەروە ج حەر ١٠ ساڵێوەنە بە ڕێژەو ١٠٪ پەی ٢٠٪ کەمش کەرڎەن.
هەرپاسە پلەو گەرمیی سەردوارایەکاو زمسانی فاڕۊ پەی وارانی، ئینەیچە بۊ بایسوو ئانەی تا مانگەکاو وەهاری و هامنی سەرچەمە ئاوییەکۍ یاگە بەرزەکانە کوۍ نەباوە و ئینەیچ بۊ بایسوو تەرسەو لافاوی.
ئینجا ئی وەڵێئامۍ گێرا پێشهاتانە ڕەنگای کاریگەرییشا بۊ سەروو گێڵیاری و هامنەهەواری و دارسانەکا و کاریگەریی نەرێنیش سەروو تەندروسیی ئیکۊ-سیستمی بۊ و تەرسەو ئایرکەوتەیۊ دارسانەکانە زیاد کەرۊ.
