موفیدە کۆتووە کە خەڵکەو بلبلی مەنتیقەو عەفرینینە دماو هرووژمەکاو دۆڵەتو تورکی جە ٢٠و کانوونو دووەمو ٢٠١٨ پەی سەرو عەفرینی و ئەرەگیرکەردەیش، کۆچکەرا پەی شەهبای و چا بنەوزا. جارێوەتەر دماو هرووژمە ئەرەگیرەکاو دۆڵەتو تورکی و چەتەکاش جە ٢٩و نۆۊەمبەری پەی سەرو شەهبای و ئەرەگیرکەردەی کۆچ مکەرۆ پەی قامیشلۆی.

موفیدە کە جە عەفرینەنە پێسەو مامۆسای جە دەسەو پەروەردەییەکانە هەرمانە کەرێ، جەبارەو ژیوای عەفرینی و قۆناغەکا کۆچبەرییۆ پەی ئاژانسیما قسێش کەردێ و ئاماژەش پانەیەدا عەفرین گردو وەرم و ئیرادەشانە، ژیواو عەفرینی گرد چێوێش پنە بەخشێنێ. موفیدە باسش جە هرووژمە ئەرەگیرەکا سەرو عەفرینی کەرد و واتش: "جە حەقەتینەنە بەرشییەیما جە عەفرینەنە ئاسان نەبێ، چونکە عەفرین بە ماناو ژیوای بێ پەیما. هەرچنە واچمێ هێز و ئیرادەو قووەتما بێ، بەڵام دووژمنێ کۆچبەرێش کەردیمێ."

'ئانەی جە شەهبانەنە وەشما کەرد کاول کریا'

بەردەوامی قسەکاشەنە موفیدە باسش چانەیە کەرد چنین جە دماو مڏرامانو ٥٨ ڕووەو عەفرینی کۆچشا کەردەن و بە گردو زەحمەتییەکاوە تا دماجار شەهبانە بنەشا وستێنە و سەرجەنۆ ژیوایشا دەسپنەکەردەنۆ و ئینەش وات: "ڕاسا عەفرینما جیائاست، بەڵام دلێ شەهباینە عەفرینێوە گولانەما وەشکەرد. ڕاسا عەفرین یاگێ ئەڎێمانە، بەڵام دماو عەفرینی، تاومێ واچمێ شەهبا بیی یاگێ ژیوایما. ئینەیچ نیشاندەرو ئانەی بێ کە چن بە شەهبایۊ پەیوەسێ بیێنمێ. ژیوایما  عەفرینەنە وێرانکریا، کەچی دماو ساڵانێ جە کۆچبەریما دیسانۆ ئا ژیوایما وێرانکریا کە  شەهبانە بنیادما نیابێ. شەهباما ئاواڎان کەردۆ و جە قڕکەردەو سروشتی پارێزناما."

هەر جە قسەکاشەنە موفیدە باسش جە سەختییەکا جیائاستەو شەهبای و دەسبەردار بییەی جە گردو ئا ژیوایە چا بنیادشا نیابێ،  دماتەر چنین بە یارمەتی هێزەکا قەسەدەی یاوێنێ بە هەرێمەکا ئیدارەو وێڕاوەبەری.

'حەجگیز دەسبەردارو عەفرینی نمەبیمێ'

دما دماینو  قسەکاشەنە موفیدە کۆتۆنە سەرنجش وست سەروو پێشوازی و هامکاری ئیدارەو وێڕاوەبەری جە کۆچبەرا و جەختش چانەی کەردۆ جە گرد ڕووێوە یارمەتی دریێنمێ و ئا ئیدارە یاگێ هیوایمانە و  بی جۆرە دمایش بە قسەکاش ئارد: "پێسەو کوردی گرد کاتێ جە دژو ئەرەبڕیەی پەیوەندی بەینو نەتەوەکا بیێنمێ، بەڵام مشۆم نەتەوەکۍ تەرێچ جە وەراوەرو ئا ستەمەینە جە گەلو کوردی مکریۆ بێدەنگێ نەبانە. مشۆم بە مڏرامانما پەی عەفرینی و شەهبای گێڵمێ. پەنەوازا گرد کاتێ عەفرینی جە یادەوەری زاڕۆڵەکامانە زینە بازمێ، چونکە عەفرین یاگێ ڕەسەنەمانە و حەجگیز دەسبەردارێش نمەبیمێ."