ئیدارەو وێڕاوەبەریی دیموکراتیکوو سەرنیشت و وەرکەوتوو سوریای سەبارەت بە هجوومەکاو شەوێ دێرێ و هیزی دەوڵەتوو تورکی ئەرەگیری پەی سەروو هەرێمەکەی ئەرەیاوناێوەش وەڵا کەردۆ ئینەن:

"دەوڵەتوو تورکی ئەرەگیری سیاسەتی تاوانکارانەو وێش دژوو هەرێمەکاما درێژە پەنە مدۆ، ناوەندە خزمەتگوزارییەکا و چێرخانوو هەرێموو سەرنیشت و وەرکەوتوو سوریای کەرۆ ئامانج. دەوڵەتوو تورکی شەوێ دێرێ هەرێمەکاو تربەسپی، رمێلان، دێرک و چلئاغایش بۆردومان کەردێ. ئامانجوو ئا هجووما دیارا کە تێکدای ئاسایش و سەقامگیریی هەرێمەکەی و وەشکەردەی تەرسێن سەروو هەوڵەکاو کۆشیای دژوو تیرۆری و ڕاگێریین جە چارەسەری، کە هەلومەرجەکاش هەرێمەکەنە زەمینەسازییشا پەی کریۆ.

هجوومەکە درێژکریاوەو جینۆسایدی، کۆچبەرکەردەی ئەرەنیشتا و چۆڵکەردەی هەرێمەکەین. ئانە سیاسەتێوە چەپەڵا، مشۆم هۆشداری پانەیە بۆ. ماچمێ کە مشۆم ئا هجوومێ پەی سەروو هەرێمەکاما مردنیا. هەرپاسە جەخت کەرمێوە، کە ئامانجوو ئا هجووما وەشکەردەی تەرسێن پەی گردوو هەرێمەکەی و خزمەتێوە بێوەراوەراو پەی ئاردەیوە تیرۆری، هەوڵێوەن پەی واوەی ناکۆکیی ئیتنیکی کە تورکیا تا ئیسەیچ نەتاوانش بنیۆشۆ. تورکیا بە ئاشکرا گەرەکشا ئیسفادە چا ڕووەدایا کەرۆ کە رووە مدا، پیلانەکاش دژوو گەلەکەیما یاونۆ یاگێ. گەرەکشا تورکا چەواشە کەرۆ و سەرنجشا سەروو شکستەکاش لا بەرۆ.

ئێمە داوا جە گردوو هێزە چالاکەکاو سوریای کەرمێ، کە تەرسەو ئا هجوومە ناڕەوایا و مشکیلەکاشا سەروو هەوڵەکاو چەسپنای سەماقگیریی هەرێمەکەنە بزانا.کە هەڕەشێنێ پەی سەروو خەبات و هەوڵەکاو رێکوستەی کۆمەڵایەتی و وێستەیوە چارەسەری دیموکراتیکوو هەرێمەکاما و هەوڵەکاو دلێنەبەردەی تیرۆری و تندڕەویی. مشۆم رێکوزیایەکاو بواروو ماف و مرۆییەکا هەرمانەو وەرپەسیی وێشا بیاونا یاگێ پەی مردنای ئا هجووما.

متمانەما بە گەلەکەیما هەن، کە ئامانجەکاو هجوومەکاو دوژمنی و سیاسەتە دوژمنکارانەکاشا دژوو هەرێمەکەی بشناسا. ئێمە داوا کەرمێ، کە خاوەنداری جە ئەرەمەرزیایەکاشا کەرا و پارێزناشا. پەی پارێزگاری و سەروستەی پرۆژەی نەتەوەی دیموکراتیکی و واڵە و برایی گەلا، ژیوایی هامبەش، هەرمانەکاشا پۆڕنا. پرۆژەو گەلەکەیما، ئیرادە و پاگێرتەیرەین بەرەو سەرکەوتەی و پووچەڵکەردەیۆ گردوو پرۆژەکاو جینۆسایدی".