ئارۆ شەنگالنە سەعات ١٣:٠٠ بەینوو دەگایەکاو وەردیە و زراڤکێ سەر بە شارەکڵەو تلەزێرێ، فڕۆکەی بێفڕۆکەوانوو دەوڵەتی ئەرەگیروو توری سەیاریوە ڕێکوزیاو بنەیانەو گەشمەرداش بۆردومان کەرد. سەبارەت بە هجوومەکەی، ئیدارەو وێڕاوەبەریی شەنگالی بە بەشداریی نوێنەروو ڕێکوزیایەکا و خەڵکوو شەنگالی وەرڎەموو مەجلیسوو گەلوو سنونێنە بەیاننامێوەش واناوە.

ئەنداموو ئەنجوومەنوو گەلوو زۆراڤای، نەمر پووکۆ ئەوەڵوو بەیاننامەکەینە واتش، هجوومەکەو دەوڵەتی ئەرەگیروو  تورکینە، سایەقوو سەیارەو بنەیانەو گەشمەردا، سەعدون میرزا عەلی تاتەو ٣ زارۆڵا گەشمەرڎە بییەن و واتش: "ئێمە داوا وەنەو حکومەتوو عێراقی کەرمێ  کە سەروەریی عاسمانیتا بپارێزندێ". هەرپاسە بە وەڵاتاو جیهانی ماچمێ دیموکراسیی شمە چکۆن؟ سەرڎەموو فەرمانێوە تا ڕۆو ئارۆی هجوومەکا پەی سەروو شەنگالی بەرڎەوامێنێ. بەڵام ئێمە بە گەشمەرڎەکاماوە قەوەتتەرێ بیمێ. ٥ هەزار ساڵێن زوان و ئایین و خاکما پارێزنانما، چێولایچ کۆشیەیمێ و پارێزنمێش."

نەمر پووکۆ ئاماژەش دا کە دەوڵەتی ئەرەگیروو تورکیای، کە جە فەرمانەو ساڵەو ٢٠١٤ینە گەرەکش بێ جە ڕاو داعشیوە ئێزدییەکان قڕ کەرۆ، ئیساتێچ بە هەمان مەبەس بەرڎەواما جە هجوومەکاش پەی قڕکەرڎەی گلێرگەو ئێزدی و واتش: "بە ڕای گردینی ماچمێ تا ئاخر کۆشیەیمێ و واز نمارمێ و
و شەنگالی جیا نمازمێ."

"ئانێ هجووم کەرا سەرما هامکاراو داعشینێ"

هەرپاسە هامسەرۆکەو پادێ ماجیدا دەخیلە، بەیاننامەکەنە واتش: "گرد ڕوێ هجووم کەرا سەرما، بەڵام ئێمە تەسلیمێ کەسێ مەبیمێ و هەنگامێ قەوەتتەرێ دژوو هجوومەکا منیەیمێ. ئێمە بە گەشمەرڎەبییەی کەم مەکەرمێ  و قەوەتتەرێ بیمێ. ئانێ وەرڎەموو یانەکامانە هجووم کەرا سەروو ڕۆڵەکاما هامکارێ داعشینێ. ئێمە دەوڵەتوو تورکیای و دەوڵەتوو عێراقی شەرمەزارێ کەرمێ چون چی هجوومانە دەسشا هەن. ئێمە شانازیی بە ونەو گەشمەرڎەکاماوە کەرمێ و جە دۆزی ڕەواو وێما مەکێشیەیمێوە."

ماجیدا دەخیلە واتش، کە ئی هجوومە ساڵیادوو گەشمەرڎەبییەی شێرزاد شەمۆینە فەرماندەی هێزوو ئاسایشوو ئێزیدخانینە کریا و واتش: "ئێمە دژوو ئی هجووما مردمێ و زیاتەر جە وەڵێ پەرە بە کۆشیای مڎەیمێ."