هامسەرۆکەو پەیوەندییەکا جبەروو سەرنیشت و ۋەرکۊتوو سوریای ئێلهام ئەحمەڎە ئانەش ئارڎۆ وە یاڎ کە دەوڵەتو تورکی ئەرەگیری هۊرگیرو پرۆژېوە هامشێوەو میساقی میللیا و ئانەش دەسنیشان کەرد پەی ئانەی پەیمانێوە جە بەینوو دیمەشقی و ئەنقەرەینە بەسیۆ، سەرەتا پەنەوازا تورکیا جە خاکوو سوریاینە کیشیۆوە. ئاماژەش پانەی کەرد چەمەڕێنمۍ کە ڕژێموو دیمەشقی جەخت سەرو کیشیایۆ سوپاو تورکیای بکەرۆ دلۍ خاکوو سوریاینە.

دەربارەو ئی مژاریە پەیوەندییەکا جبەروو سەرنیشت و ۋەرکۊتوو سوریای ئێلهام ئەحمەڎە پەی ئاژانسیما قسێش کەردۍ و باسش چانەیە کەرد جە دلېینەنە ئاژەو سوریای ڕووەو دیموکراسیرە جە بار نیا، تەنانەت حیچ هەنگامېوەیچ بەرەو ئا ئاڕاستەیە نەنریێنە و فاڕیایۍ نیا ئارانە. مافوو ژیۋای هامبەشی گەلی و پێکئامایەکا ئینا ئاژێوە خراپەنە. پۊکەی سووریا ئینا دلۍ پرسێوی فرە هەستیارینە.

درێژەو قسەکاشنە ئەحمەدە ئاماژەش بە دەوروو داگیرکارییانەو دەوڵەتی تورکی داگیرکەری کەرد و باسوو  هەوڵدایەکاو بەینوو دیمەشقی و ئەنقەرەیش کەرد و پەی ڕێککەوتەی واتش: "تاکو ئیساتێ دەوڵەتوو تورکی سیاسەتی داگیرکاری بە ئامانجوو بەپاشکۆکەردەی هەرێمە داگیرکریایەکا بە تورکیایوە مدۆ. بە هجوومەکاش سنووروو ڕێککەوتەینامەکا مبەزنۆ. دۆز و مافوو گەلا و پێکئامایەکا  پاشێل مکەرۆ. دەوڵەتوو تورکی ساڵانێوەن کە پەشتگیریی جە گرووپە چەتەکا مکەرۆ و وێش پێسەو پارێزنەروو گەلوو سوریای نیشانە مدۆ. ئیساتێچەنە ئینێ هەوڵوو کەردەی ڕێککەوتەینە چەنی حکومەتوو شامی، دەوڵەتوو تورکی گەرەکشا وێش جە پەرسەو کۆچبەریی ڕزگار بکەرۆ. وەراوەریچەنە سوریا گەرەکشەن باروو سەرووشانەیش سووک بکەرۆ. دەوڵەتوو تورکی  مەبەسشا هاوپەیمانییەکاو وەڵێ زیندە بکەرۆوە و چا ڕێوە داگیرکاری زیاتەربکەرۆ. بەڵام هیچ لایەنێو چا دووە لایەنا ساعیبوو سەربەوێیی نییەنی جە کەردەی قەرارینە بارەو دۆخوو سوریایوە، چونکوم پەرسەو سوریای ئیتر پەرسێوی بەینوو دەوڵەتانە. پەی حەر هەنگامێوەیچ ئاسایش و ئارامیی سوریای خاڵەی سەرەکییەنە، بێگومان پەی ئارامیی سوریای پەنەوازا  وەڵێ گرد چێوێوەنە دەوڵەتوو تورکی خاکوو سوریاینە بکێشیۆوە. حەر پەیمانە و ڕێککەوتەێوە بەروو ئا خاڵێنە بکریۆ، بە تەنیا پەی سەرنیشت و وەرکەوتوو سوریای بەڵکوم پەی گردوو گەلاو سوریای بێسوودەن."

حەر جە قسەکاشنە ئیلهام ئەحمەدە باسوو ئانەیش کەرد، کە دەوڵەتوو تورکی جە چوارچوەو میساقی میللیینە پرۆژێیو داگیرکارییا و ئاماژەش کەرد ئارۆنە گەر پەیمانێوە بەینوو هەردووە ڕژێمەکەینە بیاویۆ یاگێ مشۆم بڕیو مەرجێ بیاویا یاگێ. یۆشا کێشیایوە دەوڵەتوو تورکین چا هەرێمانە کە گێرتێنێش، دیارا ڕژێموو سوریایچ جەخت چینەیە مکەرۆوە هەرپاسە پەرسەو گەلا پەرسێوی هامبەشەو بەینوو هەردووە دەسەڵاتدارییەکەینە. پەوکای پەی چارەسەرکەردەی ئی قۆرتا بارگرانیێوی فرە قورسەن پەی هەردووە رژێمەکەی.

پڕۆژەمان هەن پەی کۆچبەرا

ئیلهام ئەحمەدە واتش پێوەس بە چارەسەروو پەرسەو کۆچبەرییوە، ئەرەیاوناش پرۆژەما هەن و واتش: "وەڵتەر واتەبێما پەی، بۆ چارەسەرکەردەی پرسەو کۆچبەری پرۆژەما هەن و گرد کەسێو متاوۆ پەشتیما پەنە ببەسۆ، چی ڕووەوە پێویسا چەمکوو نەتەوەیی یۆگێرتەی پەی ڕاوەبەریی وێمانەی بۆ. ئەردۆغان گرد جارێو ماچۆ ئەسەدی خوڵکە مکەرمێ پەی تورکیای. ڕاسیینە ئینە  تەنیا گوتارێوا پەی گلێرگەی تورکی، ڕەگەزپەرسی تورکیانە فرە بییەن، ئیساتێنە پێسە کپش مکەراوە، پاسە وێشا بەرموزانە پەی گێڵنایوە  چارەسەروو پەرسەو کۆچبەرا تورکیانە، ئینێ هەوڵێ و هەرمانەنە."