فەرماندەیی یەژاستاری ئەرەیاۋناش: "ئێمە پېسە سارۍ، تەنگە بە دوژمنی هۊرچنمۍ و ۋنەپەرسایش چنی کەرمۍ" و جەختیچش کەردۆ، ڕژدېنۍ سەروو ئانەی کۊشیای ژەنۍ ئازاڎۍ بیاونا بە گرڎوو ژەنا جەهانی.
فەرماندەیی قەرارگەو ناوەندیی یەژاستاری بە ئەرەیاۋنېوە یاڎوو یووە جە ئەرەمەرزنەرا پەکەکەی سەکینە جانسز (سارۍ)، ئەندامەو کۆمیتەو دیپلۆماسی کەنەکەی فیدان دۆغانە (رۆژبین) و ئەندامەو جمیەرەو گەنجا لەیلا شایلەمەزە (رۆناهی)ێش بەرزڕاگێرت، کە جە ٩و کانونوو دووەموو ٢٠١٣ ینە جە پاریس تیرۆر کریۍ.
ئەرەیاۋناکەی پی جۊرەنە: " جە ساڵیاڎوو ١١ەمین کۊکوشی پاریسینە یووە جە کادرە ئەرەمەرزنەرەکا پارتیما فەرماندۍ سەرمەشقەما هەڤاڵ سارۍ، جەنگەوانا جمیەروو گەنجا و ژەنا ئازاڎیی رۆژبینە و رۆناهیۍ و جە کەسایەتی ئاڎیشانە گرڎوو گەشمەرڎا ئاخېزی بە رێزوو ئیحترامۆ یاڎ کەرمېوە. ئێمە وەعدما واوەی کەرمېوە، کە ئاڵاو کۊشیای کە رادەسوو ئێمەشا کەردېنە، بیاونمۍ بە سەرکۊتەی.
جمیەری ئازاڎیما بە پاڕادایموو ئازاڎیپارێزی ژەنا ڕابەر ئاپۆی پۍ گرڎوو ژەنا جەهانی بە تایبەتی ژەنا کوردی بیەن بە تروسکایی و هیوا. ڕابەر ئاپۆ و ئا ژەنۍ بڕواشا بە فەلسەفەو ئاڎیی ئاردەن، ئارۆ دەوروو ڕابەر ئاپۆیرە کوۍ بیېنێوە و بازنېوە حېقمشا جە ئاخېزی وەش کەرڎەن. ڕابەر ئاپۆ کە جە ۋەران ۋەروو مەژگوو پیا سالارینە هەڵمەتەو ئازاڎیش دەسپنەکەردە و ئا بەها ئازاڎیۍ کە جە کەسایەتی ئاڎینە خوڵقیۍ، ئارۆ رووبەڕوو هجومی هەژموونوازانەینۍ. سەرەڕاو ئا کۆنسێپتوو هجومایچە پارتیما پەکەکە بە سەرمەشقایەتی مدرامانوو ژەنا ئارۆ ۋێڕاگرتەرین هێزوو ۋەرکۊتوو دلۍ ڕاسەیا. ۋەروو ئانەی جمیەری ئازاڎیما پېسە هامڕا سارۍ ۋېش سەروو نەریتوو ژەنا جەنگ کەری، کۊششکاری و ۋێڕاگری پەروەردە کەرۆ. بڕوا و متمانە بە ڕابەر ئاپۆی سەرکۊتەی مسۆگەر کەرۆ. ئێمە بەرجستەتەرین و وەرچەمتەرین ئاژەو ئی حەقیقەتەیە جە کەسایەتی فەرماندۍ بەقیمەتێمانە هامڕا سارێنە وینمۍ. . هامڕا سارا ئەوەڵ ژەنی بۍ کە متمانە و بڕواش بە ڕابەر ئاپۆی کەردە و چنیش هەنگامەش نیا. سەرەڕاو هەلومەرجی دژواروو سەردەمەکەی و فشاروو دەرەبەگەکاو گلېرگەیچ هامڕا سارا بیە بە یووەم هامڕا کە ئازایانە چنی ڕابەر ئاپۆی ڕش کەردە، بیە بە ئەوەڵ فەرماندۍ ژەنۍ، یووەم ڕابەرەو ئێمە. بە بڕواو سەرکۊتەیش دۆزی ئازاڎییش پېسە کۆمپاس و جەمسەر نوێنېوە ڕاو ئازاڎییش پنە نیشانە دایمۍ. سوپابیەو ئێمەی ژەنا جە ئەنجاموو رەنج و مانیایی فرەو سارۍ و هامڕاکاشەنە ئاما بەرهەم. ژەناو پەکەکەیی کە سەرمەشقایەتی پۍ ئاخېزوو ژەنا کەرا، چنی کۊشیای سارۍ گۊرۍ بیۍ، زیاڎۍ بیۍ و تەماموو جەهانیرە وەڵۍ بیېوە. ئارۊنە پۍ ژەنا ۋەرکەوتوو دلېڕاسەی و گرڎوو ژەنا جەهانی بیۍ بە گۊرەتەرین هیواو ئازاڎیی و ژیۋای.
هامشێوەو سارۍ ۋنەپەرسای جە دوژمنی کەرمۍ
بێگومان ئی ڕۍ کە کۊشیای ئازاڎیی ژەنێش پۊرەرە ۋیەردەن و ئا وەڵۍ کۊتەی و سەرکۊتەیا کە سوپابیەی ژەنا خوڵقنانش، بەرەنج و حۊڵی گەورەو ڕابەر ئاپۆی و یووە جە ئەوەڵ هامڕاکاش واتە هەڤاڵ سارۍ خوڵقیان. بڕوا و متمانەو هەڤاڵ سارۍ پی دۆزیە و ئا ئاستەی جە کۊشیاینە بەدەسشئارڎەن، پۍ ئێمەی هامڕایاش دەسکۊتێوە گۊرەن. ئێمە جە کەسایەتی سارېنە فێربیەیمۍ کە ساحیب و ۋېما بیمۍ و بیمۍ بە هینوو ۋێما، کۊشیەیمۍ و جە ئاخروو گرڎ مدرامانێنە سەرۍ گنمۍ. کۊشیای ئازاڎیی ژەنا و بە سوپابیەیما کە جە ڕاو سەراکاوە دەسشپنەکەرڎ، ئارۆ جە گرڎوو سەنگەرەکاو کوردسانینە بە مدرامانوو گەریلا ژەنەکا سەرگنۆ. ڕێوگارا و شۊنکۊتا سارۍ کە جە زینڎانوو ئامەڎینە تف کەرۍ میاچەما ستەمکارا و فاشیزمی، ئارۆ جە گرڎ یاگۍ کوردسانینە پېسە سارۍ بە بێ تەرس ملا سەروو دوژمنی. بەتایبەتی جە سەرنیشت و پانیشتوو کوردسانی کەسایەتی ژەنۍ جەنگکەرۍ، جە مەڕەکا جەنگینە کە بە هەڵمەتەی شۆڕشگێڵنی نیشانەدریا، درێژەداین بە کەسایەتی ساراکا. حەرپۊکەی پېسە جەنگەوانا یەژاستاری ئێمە عال مزانمۍ جە ئاستی هەنوکەیی ۋێمانە و جە دەسکۊتەکامانە منەتبارۍ کێنمۍ. هێزەکاو یەژاستاری ڕێوگارۍ ساراکانۍ، پا جۆرەو سارۍ تەماشەو ژیۋای کەرا ، جە دژوو ئەرەگیرا پېسە سارۍ جەنگ کەرا، پېسە سارۍ تەنگ بە دوژمنی هۊرچنا و ۋنەپەرسایۆ کەرا. جە کەسایەتی ساراکانە ئێمە جەنگی ئازاڎییما میاونمۍ بە سەرکۊتەی، ۋنەپەرسای جە مەژگوو پیا سالاری کەرمۍ کە مەتاوۆ ۋەران ۋەر بە بیەو ژەنۍ ئازاڎۍ ۋێش ڕاگێرۆ.
رژدۍ و پاگیرینمۍ سەروو ئانەی کۊشیای ۋېما بۊنەو ژەنۍ ئازاڎېوە بیاونمۍ بە گرڎوو ژەنا جەهانی
گرڎوو ژەنا جەهانی، کۊشیای سارۍ پېسە کۊشیای ۋېشا منیارە. کۊشیای ژەنا کە بە سەرمەشقایەتی ژەنا کوردی بەهەمیشەیی بیەن، ئارۆ جە کەسایەتی سارێنە بە جیهانیبیەن. پېسە ئانەی ڕابەر ئاپۆیچ ماچۆ، ئازاڎیی گلېرگەی جە ڕاو ئازاڎیی ژەنێوە دەسەبەر بۆ، ئانەیچ جە کەسایەتی سارێنە بەرجەسە بیەن. جە چوارچێوەو ئا راسیەینە ئە قەناعەتەی کە بە ئازاڎیی جە ڕاو ئاخېزوو ژەناوە مسۆگەر بۆ، زیاتەر فراوان بیەن و بەهەمیشەییی بیەن. سەروو ئا بنەمایۍ پاگیرێنمۍ کە کۊشیای ۋێما پەی ژەنۍ ئازاڎۍ، کە جە کەسایەتی هامڕا سارێنە بیەن بە سەرمەشق، بیاونمۍ بەبەرزتەرین ئاست و بیاونمېش بە گرڎوو ژەنا جەهانی.
کۊشیای ژەنۍ ئازاڎۍ کە جە ڕاو ساراکاوە دەسش پنەکەرڎ، بە سەرمەشقایەتی فەرماندە سەرمەشقەکاما پېسە لەیلۍ، ئاخین، هێژار، ئاردەم، دۆغا، هاڤین، ژیندارۍ و فرەو فەرماندا تەریما یاوان بە ئاستێوە فرە باڵا. هەڵوێس ۋەران ۋەر بە گرڎ هجومېوە دەوڵەتوو تورکی ئەرەگیری پېسە مدرامانوو هامڕا سارۍ، ئەرکی تاریخی گرڎوو گەریلاکاو یەژاستاریا. چونکی سارا بە مەعناو جەنگینە. سارا بە مەعناو هجومینە پۍ سەروو دوژمنی، سارا بە مەعناو قەناعەتینە.
کۊشیای ئازاڎیی ژەنۍ کە بە ونە و رەنجوو هەڤاڵە گەشمەرڎەکاما و ڕێوگارا و شۊنکۊتا هەڤاڵ سارۍ، هێزێوە کە دوژمنی تاسنۆ، وزیاڕووە. ئێمە پېسە هێزوو یەژاستاری وەعد مڎەیمۍ کە جە ساڵەو ٢٠٢٤ینە بەتایبەتی حەقەو سارۍ، رۆژبینۍ و رۆناهیۍ حەقەو ژەنا پېسە ئەڤینۍ، سێڤێ، فاتمەی، پاکیزەی و گرڎوو ژەنا کە جە کۊشیای ژەنۍ ئازاڎېنە گەشمەرڎۍ بیۍ، کەرمېوە. ئێمە وەعد واوەی کەرمېوە کە ئاڵاو ئازاڎیی کە ئێمە جە سارۍ، رۆژبینۍ و رۆناهیما هۊرگێرتێنە، بیاونمېش بە سەرکۊتەی و ۋنەپەرسایۆ ئا کۊکوشیا بە ونی جە دەوڵەتوو تورکی کەرمېوە".
