ئانۍ گەرەکشابۍ جە شەنگالۆ گلېرگەو ئێزدی قڕکەرا، پەشیمانکریێوە  و بە پێچەوانەو ئا ئامانجەیشاوە، گلېرگەو ئێزیدی سەر جە نۆ جە ژیلەمۆو ۋێشۆ زینڎەبیۆ و بی بە یاگۍ هومېڎوو گرڎوو ئێزییدیەکا. گرڎوو ئێزیدییەکا جەهانی هۊرئێستۍ و شەو و ڕۆ باسوو مدرامانوو ئێزیدییەکا کەرا. ئانۍ بە سەرکۊتەی شەنگالی سەربەرزێنۍ، ئانۍ بە کۆکوشی شەنگالی ئێششا لا میاوۆ و جە وەرمەنە هایشا بۊوە. ئانۍ چەمەڕاو مژدەو ئازاڎینۍ. گرڎوو ئێزیدییەکا هیواو ۋێشا بە شەنگالیوە بەستەنۆ.

جە خوتوو خۆڕا نیا کە ماچا سەرکۊتەی شەنگالی سەرکۊتەی گرڎوو ئێزیدییەکان و شکسوو شەنگالی شکسوو گرڎوو ئێزییدییەکان. هیچ کەسێوە پېسە گەلوو ئێزدییەکا چی ڕاسیە مەیاوۊنە. ۋەروو ئی ڕاسیەیچە سەرەڕاو قوربانیدایۍ فرەی، دەس جە قەزیەو ۋېشا وەرمەڎا. ڕۆح و گیانوو ۋێشا بەخشا بەڵام دەسبەردارۍ خاکوو ۋېشا مەبا. مشۊم گرڎوو ئێزیدییەکا هەست پی میرخاسی و قەناعەتیە کەرا. گرڎوو ئێزیدییەکا پی فیداکاری و سەرکۊتەیا دڵوەشېنۍ.

ئا ئێشەی ئینسانی نەکوشۆ بەقوەتش کەرۆ

جە ئەنجاموو کۆچکەردەی سەڎان هەزار ئێزیدیا، مەردەی و مەرگەساتوو هەزاران ئێزیدیا، گێرتەی و بڕفانای هەزاران ژەن و زارۊڵا ئێزیدی، چۆڵکەردەی خاکی پیرۆزوو دەیان هەزار ساڵەی، بەڵام دلۍ ئی تراژیدیا و ونێنە 'یەبەشە' ئەرەمەرزیا، ئەنجومەنوو ئەرمەرزنەری شەنگالی ئەرەمەرزیا. ئیتر چا ڕوۆ گلېرگەو ئێزیدی جە مەردەیۆ هەنگامەش وستە دلۍ ژیۋایۆ. جە تاریکیۆ ۋېش یاونا بە ڕۊشنایی، هەر ڕووێوە و زامېوەش ساڕێژ بۍ، وردە وردە ژیۋای ۋێش ڕێکوست. جە مانگەو ئازاریەنە یووەمین کۆنفرانسوو یەبەشەی بەسیا، جە ساڵەو ٢٠١٥ ی جە گەرمەو جەنگینە بەشێوېوە خێرا گلېرگەو ئێزیدی بی بە ساحیب و هێزوو  پارېزنا و ئیدارەو ۋێش.

جە ساڵەو ٢٠١٦دینە گلېرگەو ئێزیدی جە وەڵینگەو هەزاران ساڵەو ۋېشەنە هەنگامێوە فرە گرنگەش نیا. بە یووەمین کۆنفرانسوو یەژەشەی هێزوو سوپاو ژەنا ۋێش ئەرەمەرزنا و حەقەو وەڵینگەیی ۋێش جە داعشی ودووژمناش هۊرگێرتۆ. بەهەمان شێوە یووەمین کۆنفرانسوو تاژێ بەسیا و گلېرگەو ئێزیدی پی هەنگامېشە بی بە ساحیب ڕێکوستەی ژەنا جە وەڵینگەو ۋێشەنە.

سەروو ئی بنەمایۍ ئاخېزێوە جدی کۆمەڵایەیتی وەشبی. ئی قۆناغە هێز و مۆراڵ و جۆشێوە گۊرەش بەخشا بە گرڎوو ئێزیدییە دڵمەڕیاکا. ئینە بی بە مەڵامەتوو ئانەی جارێوەتەر ئێزیدییەکۍ بە دڵوەشیوە گێڵاوە پۍ شەنگالی پیرۆزی. پی بۊنۆ پەنەوازی ئەرەمەرزناو ئاسایشوو ئێزیدخانی ئاما کایۆ و ئەرەمەرزیا.

بە شێوێوە ئاسایی گرڎوو بەشەکا گلېرگەی هەر کە گەل گێڵاوە پۍ شەنگالی ڕێکوستەی مەدەنی ۋێشا ڕێکوست. پۍ ئانەی گەنجێچ بەبێ ڕێکوستەی نەبا، یەجەئە ئەرەمەرزیارە. جە سەرمەشقە ئاینییەکاوە تا سەرۆک عەشیرەتەکا، جە هونەرمەنڎاوە تا گۊرانیواچەکا، جە سیاسەڎ مەداراوە هەتا شوانکارەکا، گرڎ بیۍ بە ساحیبوو ڕێکوستەی ۋێشا.

پەی ناستەو مافوو هیواو گلېرگەو ئێزیدی، بێ مردای هجوم کەرا

پۍ ئانەی ڕێکوستەی ئێزیدی وەش نەبۆ، دوژمناو ئاینی ئێزیدی گرڎ جۆرە گەمېوە کەرا. بڕۍ جارۍ زەڕ بەخشا، جارێوە بەرەو ڕاو ئەوروپای کەراوە، بەنامۍ ڕێکوستەی مرۆییوە سیخوڕ کیانا دلۍ شەنگالی. سنوروو شەنگالی بە دیوار و تەل پۊشنارە. دماو داعشی جارێوەتەر تەوقەو شەنگالیشا دا. هجومشا کەرڎ سەروو شەنگالی و وەختۍ پېشا بەرکۊت چا ڕێوە مەتاوا ۋېڕاوەبەری دلېنەبەرا، ناچار بە فڕۆکەی بێ فڕۆکەوان و بۆردومانکەردەی، دەسشا بە کوشتەو سەرمەشقا ئێزیدی کەرد. پێکئاماو ئێزدی چی ئامانجەنە بەشوو ۋێش بەقیمەتتەرین سەرمەشقەکېش بەخشۍ، بەڵام حەجگیز پەشیمانۍ نەبیێوە و حیچ وەخت پاشەکشەشا نەکەرڎ. ئێش سەروو ئێشی، هجوم سەروو هجومی، بەڵام جە بیەی و ئازاڎیی ۋێشا بەردەوامێنۍ. ماچا ئێمە هەمیشە بیێنمۍ و هەمیشەیچ مەنمېوە. ئێمە پېسە کەشەکا زاگرۆسینمۍ، دوژمن پېسە ۋەروۍ پاسەن، حەرچنە سەختە بۆ ڕووۍ هەر تاویۊوە و ملۆ، بەڵام ئێمە پېسە ۋێما بە سەربەرزیوە مەنمێوە.

بەپوختی و کورمانجی، جەهانیچ دلېنە بشۆ، پێکئاماو ئێزدی باوەڕش بە کەسی نییا و ئیراڎەو ۋێش رادەسوو کەسی مەکەرۆ. کەسانێوە هەنۍ وەرم وینا کە ڕووۍ ۋېڕاوەبەری شەنگالی دمایش پنە مۍ، ئێمە پېسە پێکئاماو ئێزدی وەعد مڎەیمۍ وەرمشا وزمۍ قەبرە. ئێمە پېسە پێکئامای ئێزدی بە ونی ئی دەسکۊتێما بەدەسئاردێنۍ، بە ونیچ پارێزنمێش.