زارۆڵە زرنگ و سەرکێشەکەو ئامارای، چەمە تیژەکێش و ویرە ڕێخەقووڵەکەش، ئیرادە و نەسڵۆکییەکەش هەرزوو مزانیی بەرکەوتەی ڕابەر و پەیائاوەرێوی کۆمەڵایەتی و فیکریی سیاسییشا دلێنە بەروست، حەر زوو تاریکایی و کەڵبێ ستەمی و نادادییش وەڵی حەرچیوێنە دەگێکێشۆ دی، جە دیای ڕەنگدایۆ ستەمو فاشیزمو تورکینە چا دەگا کوردیێوە پانتایی و بارستایی ئا ستەمە تۆقنەرەو فاشیزمی، کە کوردستاننە وەرهەرمان بی، ورسەنگنیا، یۆ چا شێوازاو چەوسنایۆ و دڕندایەتییە وەراوەرو گەلو کوردینە جە جینۆسایدی کەلتووری و سڕیەیۆ زوانەکەیشنە دیەنۆ، ئانا سەبارەت پی بابەتەیە مواچۆ:

''باسو ئا تراژیدیایمە کەرد، کە وەختو دەسپەنەکەردەی واناینە جە یوەم مەکتەبو ئاسیمیلاسیۆنینە دووەچارش ئامانێ، هەستم پا هەڕەشا کەرد، کە دلێ مەکتەبو سەرەتایینە شاریاوە بێ، ئا مەکتەبە جیاتیی زوانی ئەدایی بە زوانێوی تەر پەروەردەما کەرێنێ، حەرچەندە زاڕۆیچ بێنا، ئجێم کە ناچارکەردەیم پانەیە دەسبەردارو زوانی ئەداییم بوو، ناچارکەردەین بە دەسوەردای جە بییەیم، ئایا دەسبەردارو بییەی (کوردبییەی)ـی وێم بێنا، یاخود ناچارو دەسبەرداربییەی بێنا؟ دیاردەو کوردایەتیی یا کێشەو کوردی پەی من پێسە دەسش پەنە کەردەبێ، قۆرتێوە بێ کە پەی ساڵانێوی درێژی بێ جواب منش وستا دلێ نائارامیێوی قووڵیوە... بۆنەو جەدەسدای زوانیوە، بە شێویوی قووڵ 'بییەی'ـی وێم جەدەس دا، چێشێ بێنێ ئانێ کە جەدەسم دێ، ئینە پەرسێوە بێ، جوابەکەش زەحمەت بێ، پارێزنای یا داکۆکیی جە کوردی، بییەێوی سەخت و قۆرتاوی بێ، ئانە دووەچارش ئامانێ بییەی نەبێ، بەڵکوم یاوولەرزو دلێنەشییەی بێ، هۆشیاریێوی جوابدریاوە نەبێ، گرۆڵییەو ئا قۆرتا بێ، کە سەرەمڕ گەورێ بێنێ و ئینسانی شێت کەرێنێ.''

پەوکای ڕابەر عەبدوڵا ئۆجالان، کوردا بە قوربانیی دەسوو ئاسیمیلاسیۆنی زانێ، مسۆگەر پلیشنایۆ کوردا جە پلیشنایۆ و پاکتاوو زوانی و چاندەکەیشۆ دەس پەنە مکەرۆ و کەس پێسەو ڕابەر عەبدوڵا ئۆجالانی، دلێ کتێب و پارێزنامە و ورسەنگنایەکاشنە شرۆڤەش نەکەردەن، ئانا جە یۆ چا نرخنایانە ماچۆ:

''ڕاسییەکەش قەدەغەو زوانی تیرۆرێوی شاریاوەن، شێوازێوەن، تەنانەت سەرو ئاژەڵیچرە پەیڕەو نمەکریۆن.''

بێگومان ئاد ستەمش وەنەو دەزگاو خێزانیوە کەرد تا قەدەغەو چاندی و جلوبەرگی و زوانی و شناسنامەی، کە سەرو کوردارە سەپنیێ، ڕایێوە درێژەشا بە ڕابەر ئاپۆی پیما، ئاد هەزاران لاپەلێش وانێوە تا جە کوردی و کێشەکەیش بیاوۆنە، شرۆڤە و خەباتو وێش پەی وەڵاتێوی دزریان و گەلێوی ویرشیەوەن، ئینجا جە بوارو سیاسی و کۆمەڵایەتییچنە ڕێکوستەێوی قەوەتی چانەش وەش کەرد، بە قسێ میدیایەکا چی سەردەمەو کۆنترۆڵ و چنگ و چەپاوڵی دەوڵەت-نەتەوەی و پۆلیسی و سیخوڕەکاو مۆدێرنیتەی سەرمایەداریینە، پێسە 'موعجیزە'ی موینیۆ، وەرو ئا قەدەر و ستەمەیە پەی کوردی خەتکێش کریان ماچۆ:

''یاگەنەگێرتەی کوردا تارێخو نەتەوە و شارستانییەتەکانە ماناو بێدیرۆکبییەی کوردا نییا.''

پەوکای پەی شڕۆڤە و لەیەکدایۆ ئا بییەیەو نامێ کوردی و کوردسانینە و نە ئەکادیمیاو دەوڵەتی و نە قەڵەمەبەدەسێ نەیارێنێ نزیکێش باوە، هەزاران لاپەلێ و دەیان کتێبێ و پارێزننامێش نویستێ.

وەختێ شاهین دونمەز چی ڕابەرە کوردەیە ورگێڵاوە، بە تورکەکاش وات: گەر وێش نەگێردێ، ئیسفادەش نییا، ئاد متاوۆ جیای یەک کەسی، دە حزبێ وەش بکەرۆ.

حەر پەوکای وەختێو جە پیلانێوی میاندەوڵەتیینە کە ئەمریکا و یۆنان و ڕووسیا و تورکیا و ئیسرائیل دلێشنە بەشدارێ بێنێ، گیریا، ئاد وێش ئی گەلەکۆمە فراوانە بە 'چوارمێخەکێشتەی' نامێ بەرۆ. حەرپاسە ماچۆ: وەختێو مۆسکۆنە بێنا جە ڕاو IMF سندۆقو زەڕی میاندەوڵەتیی سەودا و مامەڵە سەرو منۆ کەرێنێ.

ئا کەسە گۆش پەی ڕاسینەی دەروونیی وێش بگێرۆ، کاریگەر مبۆنێ، ئانەیچش کە کاریگەر بۆ، دوژمنێش فرێ با، ڕازەو ڕابەر ئاپۆی ڕازەو ژیواێوی ڕاسینەینە، وەختێو ئینسان وەراوەرو ئا هەستاوە سەرو کێشە و تراژیدیاو گەلەکەیش هەنش، ڕاسواچ مبۆ و گۆش پەی ڕاسینەو هەست و ویرەکاو وێش و هەلومەرجو گلێرگەکەیش مگێرۆ، ئانە ڕاسیی ئینا لاو ئادیوە، پێسە وێش مواچۆ:

''من گۆشدارو زایەڵەو ڕۆحو وێمنا''.