ژمارێوە ۋەرچەم جە ژەنا ۋەرکەوتوو کوردسانی، ئێرانی و ئەفغانسانی پەشتیوانی ۋێشا پۍ هەڵمەتەو 'ئازاڎیی پۍ عەبدوڵا ئۆجالانی، چارەسەری سیاسی پۍ پرسوو کوردی' بەربڕی و جەختشا جە گرنگیی ئازاڎیی جەسڎەیی رابەر ئاپۆی کەردۆ.
جە ١٠/١٠/ ٢٠٢٣ێوە هەڵمەتەو 'ئازاڎیی پۍ عەبدوڵا ئۆجالانی، چارەسەری سیاسی پۍ پرسوو کوردی" دەسشپنەکەردەن، ڕۆ دماو ڕۊی پەشتیوانییەکۍ چی هەڵمەتۍ زیاتەرۍ با و ژمارێوە ۋەرچەم جە چالاکا سەروو ئاستوو وڵاتا جیاجیاو جەهانی پەشتگیری ۋێشا پۍ هەڵمەتەکۍ بەربڕا. چی بەینەنە بەشێوە ۋەرچەم جە ژەنایچ بەشداریشا جە هەڵمەتەکێنە کەردەن و تا مۍ ژمارەشا رووە جە زیاڎ بیەی کەرۆ.
ئێرانیچەنە کە جە چن ساڵی ویەردەنە زیاتەر بە ئەندێشە و رامانەکا رابەروو گەلوو کوردی عەبدوڵا ئۆجالانی ئاشنۍ بیۍ، بەردەوام جە بۆنە و یاڎە جیاجیاکانە ژەنا پەشتیوانی ۋێشا پۍ ئازاڎیی جەسڎەیی رابەروو گەلوو کوردی بەربڕیەن.
ئیجارەیچ ٥٠ چالاکۍ و هۊرسوڕیۍ بواروو مافەکا ژەنا کە جە پێکئاما جیاجیاکا ئێرانی و حەرپاسە ئەفغانستانی جە پەیامی ڤیدیۆیینە سەرەڕاو سەرکۆنەکەردەی گۆشەگیری رەهاو سەروو رابەروو گەلوو کوردی عەبدوڵا ئۆجالانی، جە هەمان وەختەنە داواشا کەردە عەبدوڵا ئۆجالان ئازاڎ کریۆ.
ئا ژەنە چالاکۍ ۋەرکەوتوو کوردسانی، ئێران و ئەفغانسانی جە پەیامەکەشانە هجومە ئەرەگیریەکۍ دەوڵەتوو تورکیایشا پۍ سەروو پارچە جیاجیاکا کوردسانی شەرمەزار کەرد.
جە دماو دەسپنەکەردەو سەرهۊردای ژەنۍ، ژیۋای، ئازاڎیی کە هۊرقوڵیاو ئەندێشە و فەلسەفەو رابەروو گەلوو کوردی عەبدوڵا ئۆجالانیا، یۊگێرتەی و هەرمانەی هامبەشەو بەینوو ژەنا ۋەرکەوتوو کوردسانی و پێکئامایەکا تەروو ئێرانی رووەش جە بەرزی کەردەن و جە دووە ساڵی ویەردەنە چنڎین کۆنفڕانس، ۋێنیشاندای و هەڵمەتەی هامبەششا ئەنجامدان.
