مەردموو کانتۆنوو فوراتی جە دەگاو یارەمەزی پانیشتوو کۆبانێ سەرەوەشیشا جە بنەیانەو گەشمەرڎە زین زاگرۆسۍ کەرد، گەریلۍ یەژاستاری زین زاگرۆسە، ١ و نیسانی هەرێموو گارەینە گەشمەرڎۍ بیە. گەل وەعدوو حەق کەردەیۆ و دڵسۆزیش پەی گەشمەرڎا واوەی کەردۆ.

پەیوەس بە مدرامانوو گەشمەرڎە زین زاگرۆسۍ، قەوم و کەسەکێش پەی ئاژانسوو هەواڵوو فوراتی (ANF)ی قسېشا کەردۍ و ئەرەیاۋناشا، زینێوە لووا بەڵام هەزاران زینۍ یاگێش گێراوە.

لالۆو گەشمەرڎە زینۍ، فەرهاد محەمەڎ ئەرەیاۋناش هەزاران زینۍ یاگێش گێراوە و درێژە بە ڕاکێش مڎا. واتش: "گەریلا ئازاڎەکۍ پەی ئێمە گرڎ چێوێنۍ. ئاڎۍ گیانشا پەی ئێمە فیداکەردەن. ئێمەیچ بە مدرامانوو گەریلایۆ فەخر مکەرمۍ و سەربەرزێنمۍ. هەتا ستەم و زۆرداری سەروو گەلەکەیما بۆ، ئێمەیچ ڕاو مدرامانی و کۊشیای گێرمۍ، هیچ ڕێوەتەر نییا. با گەریلاکێما بزانا ئێمە تا دما نەفەس پەشگیریشا ۋنە مکەرمۍ. ئیرادەما دمایی بە تەکنیکەکاشا مارۆ".

لالۊزاو گەشمەرڎە زینۍ، سەباح محەمەڎ تەئکیدش کەردۆ گەشمەرڎۍ هەر جە زاوڵەیۆ ئەویندارەو ئازاڎیی بیێنە و واتش: "زینە جە زاوڵەیۆ پەیوەسەبۍ بە تەڤگەروو ئازاڎییۆ، بە لالۊیش واچۍ شیعرۍ کوردیێم فێربکەرە، حەتا سەروو گەریلای و کوردسانیرە شیعرۍ واچوو. زینە بە کۊشیای ۋێش بییە ئەویندارەو ئازاڎی و یاوا بە ئامانجەکەیش".