بێدەنگی رایەدارانی رژێمی ئێران لەبەرامبەر بەدەستدرێژیەكانی دەوڵەتی تورك بۆ سەر باشوری كوردستان لەكاتێكدایە كە وەزیری دەرەوەی ئێران لەچاوپێكەوتنی رۆژی پێنج شەممەی لەگەڵ سەرۆك پەرلەمانی عێراقدا، هەڕەشەی لەپارتە رۆژهەڵاتیەكان كرد.
حكومەت و رژێمی ئێران تا ئێستاكە هیچ كاردانەوەیەكی لەسەر داگیركاریە نوێەكانی دەوڵەتی تورك لەسنورەكانی عێراقی فیدراڵ نیشان نەداوە و راگەیاندنەكانی ئەو وڵاتە تەنیا هەواڵی كۆرتی رووداوەكان بڵاودەكەنەوە.
ئەم بابەتە تەنانەت لەكاتی چوونی سەرۆك پەرلەمانی عێراق بۆ ئێرانیش دیار بوو و تەنانەت لەراگەیاندنەكانیشدا گرنگیان پێ نەدا.
ئەمیر عەبدوڵڵاهیان وەزیری دەرەوەی ئێران لەچاوپێكەوتنی لەگەڵ محەمەد حەلبووسی سەرۆك پەرلەمانی عێراق كە رۆژی پێنج شەممە ئەنجامیدا بەزمانێكی دۆژمنكارانە هەڕەشەی لەپارتە رۆژهەڵاتیەكان كرد و ئەوانی وەكو"دژە شۆڕش" و "جۆداخواز" بەناو كرد و رایگەیاند؛ دەبێت ئەوانە شوێنێكی ئەمنیان لەعێراقدا نەبێ کە هەڕەشەن بۆ سەر ئێران.
عەبدوڵڵاهیان، ئاسایشی عێراقی بەئاسایشی ئێرانەوە بەستەوە، بەڵام ئاخاوتنێكی لەسەر دەستدرێژیەكانی دەوڵەتی تورك لەسەر ئەو ئاسایشە هاوبەشە نەكرد.
ف.ق
