"ئێشکگریی ئازادی بۆ ڕێبەر ئاپۆ" لەلایەن دەستپێشخەریی ئازادی بۆ ئۆجالان لە شاری ستراسبۆرگی فەرەنساوە لە ٢٥ی حوزەیرانی ٢٠١٢ەوە دەستی پێکردووە و ماوەی ١٠ ساڵە بەردەوامە. چالاکییەکە هەموو هەفتەیەک لەلایەن کۆمەڵێک لە کورد و دۆستانیان لە ئەوروپا بەڕێوەدەچێت.

ئێشکگرانی هەفتەی ٥٢٠هەمینیش ئەندامی ناوەندی کۆمەڵگەی دیموکراتیکی کورد لە شاری مونستەری ئەڵمانیان.

گروپەکە لە هونەرمەندان یڵماز تەکین، ڕێبەر زان، وەلی دەدە و جەلال ڕحا پێکهاتوون.

هونەرمەند یڵماز تەکین بە ناوی گروپەکەوە قسەی کرد و تیشکی خستە سەر پیلانگێڕی نێونەتەوەیی دژ بە گەلی کورد لە شوباتی ١٩٩٩دا لە کەسایەتی ڕێبەری گەلی کورد عەبدوڵا ئۆجالان دا و یڵماز تەکین وتی: "ڕێبەرەکەمان بە پیلانگێڕییەک ڕادەستی دەوڵەتی تورک کرا. هەروەها لە گۆشەگیرییەکی سەختدا ڕاگیراوە".

یڵماز تەکین راشیگەیاند، گۆشەگیری تاوانی دژ بە مرۆڤایەتییە و وتیشی: "هیوامان ئەوەیە ڕێبەر ئاپۆ بەم زووانە ئازاد بکرێت". تەکین لە بەردەوامیدا وتی: ڕێبەر ئاپۆ کەسێکی ئازادە، بەڵام ئازادیی جەستەیی بۆ ئێمە گرنگە، چونکە ملیۆنان کەس دوای بیر و ڕامانەکانی کەوتوون".

یڵماز تەکین ئەوەشی وت: "فیکر و پارادایمی ڕێبەر ئاپۆ مەترسییە بۆ سەر ئیمپریالیستەکان. نەک هەر تەنها کورد، بەڵکو گەلانی ستەمدیدە پەیڕەوی پارادایمی ڕێبەرمان دەکەن، بۆیە هەموو دەوڵەتەکان لە دژی گۆشەگیری و ڕفاندنی ڕێبەرەکەمان بێدەنگن".

یڵماز تەکین ئەوەشی ڕاگەیاند، گەلی کورد هەرگیز گۆشەگیری و ڕفاندنی ڕێبەرەکەیان قبوڵ ناکەن.

ژ.ت