خەیری عەلی، بەڕێوەبەری ڕێكخراوی ئێزدی بۆ بەڵگەنامە بەمیدیا عێراقییەكانی ڕاگەیاند، تیمە پەیوەندیدارەكان گەیشتوونەتە كۆمەڵگەی (گرزیرك) لە قەزای شنگال، و سەرلەبەیانی ئەمڕۆ دەستیانكردووە بە كردنەوەی سێ گۆڕی بەكۆمەڵ  قوربانیانی پێكهاتەی ئێزدی تێدابووە و لەلایەن چەكدارانی داعشەوە كوژراون.

بەریوەبەری ئەو ڕێکخراوە ئاماژەی بەوەشكرد، ئەو پاشماوانەی لەو گۆڕانە دەردەهێنرێن دەگوازرێنەوە بۆ لایەنە پەیوەندیدارەكان لە بەغدا بۆ پشكنین و ناسینەوەی ناسنامەی تەرمەكان.

 تا ئێستا ٨٩ گۆڕی بەكۆمەڵ لەسنوورەكانی شنگال دۆزراونەتەوە و ٣١ گۆڕی بەكۆمەڵ هەڵدراونەتەوە و تا ئێستاش پاشماوەی نزیكەی ٥٠٠ كەس هەڵدراوەتەوە، دوای ئەنجامدانی پشكنینی پێویست بۆیان لەبەغدا ناسنامەی ١٦٢ كەسیان ئاشكرا كراوە.

دوای هاتنی چەتەكانی داعش بۆ عێراق و داگیركردنی شەنگال بە دەیان خەڵكی ناوچەكەیان كۆمەڵكوژ كرد و ڕفاندیان،  دوای ئازادكردنی ئەو شارە لەلایەن یەكینەكانی پاراستنی گەل و هێزەكانی عێراق، توانرا بەدواداچوون بۆ ئەو گۆڕە بەكۆمەڵانە بكرێت ژمارەیەكیان دەربهێنرێت و ڕەوانەی بەغدا بكرێن بۆ ئاشكراكردنی ناسنامەكانییان.

ف.ق