تەڤگەری ئازادی سەبارەت بە ڕفاندن و بێسەروشوێنکردنی ڕۆژنامەنوس سلێمان ئەحمەد لە لایەن پەدەکەوە راگەیەندراوێک بڵاو کرد و ڕایگەیاند کە پێویستە هەرچی زووە ڕۆژنامەنووس سلێمان ئەحمەد و گیراوانی تری بادینان ئازاد بکرێن و ئەرکی پاراستنیانیش لە ئەستۆی پەدەکە دایە.
تەڤگەری ئازادی کۆمەلگای کوردستان لە ڕایگەیاندراوێکدا ڕفاندنی سلێمان ئەحمەد، هەواڵسازی بەشی عەرەبی ئاژانسی ڕۆژ نیووز لە لایەن پەدەکەوە شەرمەزار کرد و ئەم ڕفاندنەی ڕۆژنامەوان سلێمان ئەحمەد بە ڕەفتارێکی ڕێکخراوە تیرۆریستیەکان ناوزەد کرد.
تەڤگەری ئازادی هەر وەها دەستنیشان کرد کە بە هۆی دەسەڵاتی پەدەکەوە، هەرێمی کوردستان بووەتە زیندانی ڕۆژنامەنوسان و چالاکوانان و لە هەمان کاتدا کراوەتەوە بە پەناگە و مۆڵگەی سیخوڕ و داگیرکەران.
دەقی لێدوانەکەی تەڤگەری ئازادی بەم شێوەی خوارەوەیە:
"سلێمان ئەحمەد هەواڵسازی بەشی عەرەبی ئاژانسی (ڕۆژ نیووز) لە دەروازەی فیشخابوور بەبێ هیچ هۆکارێک ڕفێنرا و ماوەی ١٧ ڕۆژە بێسەروشوێنە، لە پاش شەش ڕۆژ درەنگانی شەوی ٣٠ی مانگی ڕابردوو، ئاسایشی دهۆک سیناریۆیەکی چەندبارەی پڕ لە چەواشەکاریی و ناڕاستی بڵاو کردەوە و دانی پێدا نا کە ڕفاندوویانە. ئەم ڕەفتارە فاشیستیانەیەی پارتیی دژ بە ڕۆژنامەنووسان و چالاکوانان، کردەوەیەکی ناقانوونییەیەو دژ بە پرەنسیپەکانی کاری مێدیاییە و پێچەوانەی مافەکانی مرۆڤە.
ڕفاندنی ڕۆژنامەنووس سلێمان ئەحمەد، دژی بنەماکانی کاری مێدیایی و پێشێلکردنی قانوونەکانی ڕۆژنامەنووسیی هەرێمی کوردستان و عێراقە، لە هەمانکاتدا ڕفاندن! ڕەفتارێکی ڕێکخراوی تیرۆریستییە نەک حکومەت؟! هاوکات پێشێلکردنی جاڕنامەی گەردوونیی مافەکانی مرۆڤە.
لە سایەی دەسەڵاتە ستەمکارییەکەی حکومەتەکەی بارزانیی-دا، هەرێمی کوردستان، بووەتە زیندان بۆ ڕۆژنامەنووسان و چالاکوانان. ئەمە لە کاتێکدایە کە هەرێمی کوردستان لەلایەن حکومەتەکەی بارزانییەوە کراوەتە پەناگە و مۆڵگەی سیخوڕ و داگیرکەران، ئاسانکاریی و هاوکاریی دەکرێن بۆ تیرۆرکردنی ئازادیخوازان، بەڵام ڕۆژنامەنووسێک کە بۆ بژێویی خێزانەکەی ڕووی لە هەرێمی کوردستان کردووە دەڕفێنرێت.
لەلای حکومەتی هەرێمی کوردستان نەبێت لە کوێی دونیادا هەبووە، ڕۆژنامەنووسی ئازاد و چالاکوانانی گەلەکەی خۆت بڕفێنیت و زیندانییان بکەیت، بەڵام بۆ سیخوڕان و داگیرکەران پێشڕەویی بکەیت بۆ داگیرکردنی نیشتمانەکەت؟!
ئێمە وەک دەستەی ڕاگەیاندنی تەڤگەری ئازادیی، ئەم ڕەفتارە قێزەونە پۆلیسییەی هێزەکانی پارتی دیموکراتی کوردستان/عێراق شەرمەزار دەکەین، پێویستە هەرچی زووە ڕۆژنامەنووس سلێمان ئەحمەد و گیراوانی تری بادینان ئازاد بکرێن و بە پارێزراویی بگەڕێنەوە و ئەرکی پاراستنیشیان لە ئەستۆی ئەوانە."
