ئەندامی مەجلیسی پژاک، مەزڵوم هەفتەن رایگەیاند، دوای سەرهەڵدانی "ژن، ژیان، ئازادی" نەورۆز لە رۆژهەڵاتی کورستان و ئێران زیاتر لە واتای راستەقینەی خۆی، کە بەرەنگاربوونەوەی ستەم و چەوساندنەوەیە نزیک بووەتەوە.
لەپەیامێکدا بە بۆنەی نەورۆزەوە ئەندامی مەجلیسی پارتی ژیانی ئازادی کوردستان (پژاک) مەزڵوم هەفتەن وێڕای خستنەڕووی خوێندنەوەیەک بۆ مێژوو و فەلسەفەی نەورۆز باسی لەوەکرد، " بەهەوڵ و تێکۆشانی رێبەر ئاپۆ و بە گیانبازی کاوەکانی سەردەم، ئەوانەی بۆ هێنانەدی ئەو ئامانجانەی کە نەورۆز واتای خۆی بەدەستبهێنێتەوە، گیانیان بەخت کرد، لە رۆژی نەورۆز واتە لە ٢١ی ئادار بەشێوەی ئێستا هاتووەتە دی. هەر بەم هۆیەوە هێدی هێدی لە رۆژهەڵاتی کوردستانیش نەورۆز واتای خۆی بە دەستدەهێنێتەوە. لە نێوان گەلانی ئێران بە تایبەتی کوردەکان لە رۆژهەڵاتی کورد ئەم بابەتە روونتر و بەرچاوترە".
هەفتەن بە ئاماژەدان بەوەی بەردەوام لەلایەن دەسەڵاتدارانەوە هەوڵ دراوە نەورۆز لە جەوهەر و ناوەرۆکی خۆی دابماڵدرێت و دوور بخرێتەوەوە، جەختی کردەوە، " بە تایبەتی دوای شۆڕشی ژن، ژیان، ئازادی دەبینین کە نەورۆز زیاتر لە واتای راستەقینەی خۆی نزیک بووەتەوە. .. لەگەڵ بڵاوبوونەوەی ئەندێشە و فەلسەفەی رێبەر ئاپۆ لە رۆژهەڵاتی کوردستان و هەروەها بزوتنەوەی ئاپۆیی لە رۆژهەڵاتی کوردستان، بە تایبەتی لە دوای شۆڕشی "ژن، ژیان، ئازادی" پێوەری نەورۆز گۆڕدراوە، ئەمەش بابەتێکە کە دەبینرێت".
ئەندامی مەجلیسی پژاک داوای کرد، گەل لە رۆژهەڵاتی کوردستان هەوڵەکانیان لەپێناو ئازادی جەستەیی رێبەری گەلی کورد عەبدوڵا ئۆجالان چڕبکەنەوە و لەو رووەوە وتی: " لە راستیدا رێبەر ئاپۆ نەورۆزی بۆ ئێمەی کورد کردووە بە بەشێکی بنچینەیی لە فەلسەفەی ژیان، گرنگە ئێمەی کورد بایەخی ئەو کەسە بزانین کە ئەم فەلسەفەیەی بۆ ئێمە بونیادناوە، واتای بە نەورۆز بەخشیوە، بەراستیش کاوەی سەردەمە، کاوەیەک کە بەرامبەر ستەم و نادادی زوحاکەکانی ئەم سەردەمە ئاڵای ئازادی و یەکسانی کۆمەڵایەتی شەکاندووەتەوە، بۆیە پێویستە ئێمەش لەپێناو ئازادی ئەودا تێبکۆشین".
هەفتەن داواشی کرد، کە گەلانی رۆژهەڵاتی کوردستان و ئێران بە جۆش و خرۆشی زیاترەوە بەشداری لە مەراسیمەکانی پیرۆزبایی نەورۆزدا بکەن.
دەقەی پەیامەکەی مەزڵوم هەفتەن بەم جۆرەیە:
"جەژنی نەورۆزی ١٤٠٣ (٢٠٢٤) لە رێبەر ئاپۆ، بنەماڵەی شەهیدان، دایکانی شەهیدان، دایکانی ئاشتی و بە تایبەتی سەرجەم تێکۆشەرانی ئازادی، تەواوی ئەوانەی کە ئەم رۆژە بە جەژنی خۆیان دەزانن، بە تایبەتی لە رۆژهەڵاتی کوردستان و تەواوی کوردستانیان و سەرجەم خەڵکی ئێران پیرۆز دەکەم.
نەورۆز رۆژێکی مێژووییە کە هەندێک لە دووانە ناتەباکان پێناسە دەکات. دووانەیی رۆشنایی و تاریکی، زانایی و نەزانی، دادپەروەری و ستەم، لەسەر حەق و ناحەق و ئەو گۆڕانکاری و وەرچەرخانە بنەڕەتیانە پێناسە دەکات. بە درێژایی مێژوو ئەو دووانە دژیەکانە وەک هێڵی بەرخودان و هێڵی داگیرکەری و ستەم بەردەوام بوون. بە تایبەتی بۆ دانیشتووانی زاگرۆس و بڕوادارانی زاگرۆس نەورۆز هەڵگری واتایەکی تایبەت بووە. رەنگە وەک شەڕی نێوان کاوەی ئاسنگەر و ستەمی زوحاک وێنای دەکەن، بەڵام بە دڵنیاییەوە ئەم ڕۆژە مێژوویەکی کۆنتریشی هەیە. لە سەردەمی سۆمەریەکانەوە کە بە خشتە نوسراوەکانیانەوە بەناوبانگن تا ئەمڕۆ چەندین خشتی نوسراو و بەڵگەنامە لەبەردەستن کە بە چەند شێوازێک نەورۆز پێناسە دەکەن، لەوانەیە بە شێوەی جیاوا ناودێریان کردبێت، یاخود بە تەواوەتی بە نەورۆز ناویان نەبردێت، بەڵام راستی نەورۆز دەخەنەڕوو. ئەوە شەڕەی نێوان راستی و ناڕاستی، پاکی و ناپاکی، رۆشنایی و تاریکی بە چەند شێوەیەک گواستوەتەوە بۆ ئەمڕۆ. بێگومان بەر لە سۆمەریەکانیش بە شێوەی میتۆلۆژیایی چیرۆکی نەورۆز هەبووە. بە تایبەتی بۆ ئێمەی کورد و باو و باپیرانمان، سەرجەم توخمەکانی ناو ئەفسانەکان، شەڕی نێوان کاوەکان و زوحاکە هاوچەرخەکان بە شێوەی جیاجیا بەر لە سۆمەریەکانیش بوونی هەبووە. گرنگترین خاڵ بۆ نەورۆز ئەو خاڵە وەرچەرخان و ئەو گۆڕانکاریەیە کە هەم لە کەسایەتی مرۆڤ و هەم لە کۆمەڵگادا روودەدات. خاڵێکی سەرنجڕاکێشی دیکە هاوکاتبوونی ئەو وەرچەرخانە لەگەڵ گۆڕانکاری لە سروشتدایە، سروشتیش دەگۆڕێت و ئەمەش خاڵێکی یەکجار گرنگە. واتە ئەمە وانەیەک بۆ مرۆڤەکانی تێدایە. بە داخەوە فەرمانڕەوا و دەسەڵاتداران دەیانەوێت ناوەرۆکی سەرەکی ئەو نەورۆزەی بە درێژایی مێژوو بە ئێمە گەیشتووە چەواشەیان کردووە. ئەو جەوهەر و ناوەرۆکە سەرەکیە بە ئیرادەکردنی مرۆڤ، یەکڕیزی نێوان خەڵک، داواکاری ماف و راپەڕینیان بەرامبەر بە ستەم و بە یەکڕیزی گەل گۆڕینی ستەم و چەسپاندنی ئیرادەی گەلە لە بری ئەو دەسەڵاتە.
دەسەڵاتداران بە چەندین شێوە ویستوویانە ئەو تایبەتمەندیانە لەناوببەن، لەمڕۆشدا هەوڵی ئەوە دەدەن نکۆڵی لەو ناوەرۆکە بکەن و بە وتنی ئەوەی ئەمانە کفر و دواکەوتوویە، وابکەن کە بە چەند هۆکار و پاساوێکی ئایینی نکۆڵی لێبکەن. بە شێوەی جیاجیا لە شەڕدان لەگەڵ ئەو ناوەرۆکە. بەڵام بەهۆی ئەوەی نەورۆز لە یادگەی مێژوویی مرۆڤەکان و کۆمەڵگادا نەخشاوە، نەتوانراوە لەناو ببرێت و تا ئەمرۆ هێڵی نەورۆز بەردەوامە. بەڵام بۆ دانیشتوانی زاگرۆس بەشێوەی گشتیی نەورۆز واتایەکی تایبەتی هەیە، ئەو رەهەندەی نەورۆز کە پەیوەندی بە فەلسەفەی ژیانەوە هەیە و مرۆڤەکان بە پێی نەورۆز ژیانیان دەگۆڕن، لەناو کوردەکاندا گرنگتر و بەرجستەترە. بەتایبەتی لە بزوتنەوەی ئاپۆییدا نەورۆز واتای راستەقینەی خۆی دەدۆزێتەوە، واتە رێبەر ئاپۆ فەلسەفەی چۆن ژیان و بۆچی ژیان، یان بە دەربڕینێکی دیکە کۆدی ژیان کە لە راستیدا کۆد و نهێنی سەرەکی نەورۆزە، بۆ ئێمەی پێناسە کردووە. هەربۆیەشە کوردەکان دوای دامەزراندنی بزوتنەوەی ئاپۆیی و دوای ئەندێشە و فەلسەفەی رێبەر ئاپۆ تا ئەمڕۆ لە پرسی نەورۆزدا جارێکی دیکە لە خاڵێکی وەرچەرخاندا ژیان، وەها شتێک بە ئاسانی بەدەست نایات. بەهەوڵ و تێکۆشانی رێبەر ئاپۆ و بە گیانبازی کاوەکانی سەردەم، ئەوانەی بۆ هێنانەدی ئەو ئامانجانەی کە نەورۆز واتای خۆی بەدەستبهێنێتەوە، گیانیان بەخت کرد، لە رۆژی نەورۆز واتە لە ٢١ی ئادار بەشێوەی ئێستا هاتووەتە دی. هەر بەم هۆیەوە هێدی هێدی لە رۆژهەڵاتی کوردستانیش نەورۆز واتای خۆی بە دەستدەهێنێتەوە. لە نێوان گەلانی ئێران بە تایبەتی کوردەکان لە رۆژهەڵاتی کورد ئەم بابەتە روونتر و بەرچاوترە.
بە تایبەتی دوای شۆڕشی ژن، ژیان، ئازادی دەبینین کە نەورۆز زیاتر لە واتای راستەقینەی خۆی نزیک بووەتەوە. رەنگە لە هەندێک سەردەمدا لە کوردستان نەورۆز بۆ هەندێک بۆنەی سنووردار کورت کرابێتەوە، بەم جۆرە نەورۆز بەتەواوەتی لەناو نەچووە، بەڵام وردە وردە لە ناوەرۆکی سەرەکی خۆی دوورخرابووەوە، لەلایەن رێورەسمەوە چەند رواڵەتێکی بۆ دروستکرابوو، بەڵام لە هەناوی ئەم پێشهاتەدا دوور کەوتنەوە لە ناوەرۆکی سەرەکی نەورۆز لە ئارادابوو، بەڵام لەگەڵ بڵاوبوونەوەی ئەندێشە و فەلسەفەی رێبەر ئاپۆ لە رۆژهەڵاتی کوردستان و هەروەها بزوتنەوەی ئاپۆیی لە رۆژهەڵاتی کوردستان، بە تایبەتی لە دوای شۆڕشی "ژن، ژیان، ئازادی" پێوەری نەورۆز گۆڕدراوە، ئەمەش بابەتێکە کە دەبینرێت. بە تایبەتی لە نەورۆزی ئەمساڵدا بەشداری خەڵک و بنەماڵەی شەهیدان و بەڕێوەبردنی مەراسیمی نەورۆز لە تەنیشت مەزاری شەهیدان رەنگ و جۆش و خرۆشێک کە گەلەکەمان بۆ نەورۆزی هەبوو، بەدی کرا. چونکە لە رۆژهەڵاتی کوردستان بەشێک لە خەڵک بەرەوپیری نەورۆز دەچن، یاخود نەریت بەو جۆرەیە کە بەر لە ٢١ی ئادار لەو ناوچانە ئاهەنگی نەورۆز بەڕێوەدەچێت، بۆن و بەرامەی ئەو مەراسیمانە تا ئەمڕۆش دەبینرێت، بەرەوپێشچوون لەئارادایە واتە ئەو پێوەرانەی کە شۆڕشی "ژن، ژیان، ئازادی" لە رۆژهەڵاتی کوردستان و ئێران دروستی کردن، لەم مەراسیمانەی جەژنی نەورۆزدا رەنگی داوەتەوە، ئەمەش خاڵێکی گرنگە.
بۆ گەلەکەمان قووڵبوونەوە و بەرەپێشبردنی ئەو پێوەرە مەرجێکی سەرەکیە. ئەو رەنگ، دروشم و هەڵوێستەی کە گەلەمان لە رۆژهەڵات گرتوویەتیە بەر، بەدی دەکرێت،کە ئەمەش جۆش و خرۆشی بەدوای خۆیدا هێناوە. هەربۆیەش بەرەوپێشبردنی پێوەرە گرنگە. دەمەوێت ئەو بابەتە بخەمەڕوو، بۆچی؟ چونکە شۆڕشی ژن، ژیان، ئازادی لە رۆژهەڵاتی کوردستان بە تایبەتی بە پێشەنگایەتی ژنانی کورد و هەروەها لە ئێران خاڵێکی وەرچەرخانی ساز کردووە و ئەمەش گۆڕانکاری لە ژیان دروست کرد، بۆچی؟ چونکە تێچووەکەی دراوە و گەل گەیشتووەتە ئەو بڕوایەی کە چیتر ژیان بە هەموو نرخێک و شێوەیەک قەبوڵ ناکات، بۆیەش بڕیاریاندا بەپێی هەمان بڕیار لە ژیانێکی نوێدا بەشداری بکەن و قوربانیشیان لەپێناویدا بەخشیوە و تائەمرۆش بەردەوامن لە قوربانیدان، ئەمەش بابەتێکی گرنگە.
لە راستیدا ئەوەی لە شۆڕشی "ژن، ژیان، ئازادی"دا روویدا جەوهەر و ناوەرۆکی سەرەکی نەورۆزە. بۆچی؟ چونکە نەرۆز بە واتای رۆژی نوێ و ژیانی نوێیە و ئەم نوێبوونەش لە راستیدا گۆڕانکارییەکی جۆرییە لە ژیان و تەنیا یەک رۆژ نییە وەک بابەتێکی رۆژمێر و چەندایەتی، بەڵکوو ناوەرۆکی ژیان تووشی گۆڕانکاری دەبێت. لەسەر ئەم بنەمایە گۆڕانکاری لە سەر بنچینەی بەرەوپێشبردنی "ژن، ژیان، ئازادی" و ئەم شۆڕشەی کە هێناویەتیە کایەوە گرنگە. ئەو پێشەنگایەتیەی کە ژنانی کورد، گەلی کورد و سەرجەم گەلە چەوساوەکان لە ئێران ئەنجامی دەدەن، گرنگە، ناوەرۆکی سەرەکی نەورۆز پێناسە دەکات.
هەرچەندە ئەمساڵ نەورۆز کەوتە مانگی رەمەزانەوە و هاوکاتبوون، بەڵام گەلەکەمان وەک بڕوامەندانی راستەقینە، کە ئایینەکەیان ئایینی گەلیە، نەک ئایینی دەسەڵاتداران، هاوسەنگیەکیان سازکرد بۆ ئەوەی بەشدارییان لە نەورۆز کێشەیەک بۆ رۆژووی رەمەزانیان ساز نەکات. ئەمە ئایینی دەسەڵاتدارانە کە نکۆڵی و رەتکردنەوەی تێدایە.
وەک چۆن تائەمڕۆ لە رێگەی بۆنە و رێورەسمی جیاجیاوە لە ناوچە جیاجیاکان، نەورۆز بە جۆش و خرۆشەوە پیرۆز کراوە، بێگومان لە ٢١ی ئاداریشدا کە رۆژی سەرەکی نەورۆزە، گەلەکەمان بە جۆش و خرۆشی فراوانەوە ئەو جەژنە پیرۆز دەکەن و پەیامی خۆیان دەگەیەننە هەموان. تا ئەمڕۆ بەشداری گەلەکەمان لە نەورۆز و بایکۆتی هەڵبژاردن پەیامێکی روون و ئاشکرا دەداتە هەموو کەس. ئەمەش واتا ستەم و داگیرکەری ئێوە، بە هەمووشێوەیەک رەتدەکەینەوە. کاتێک لەسەر ئەم بنەمایە نەورۆزی خۆیان بە جۆش و خرۆشەوە پیرۆز کرد و بێ گومان لە نەورۆزیشدا بە هەمان جۆش و خرۆش بەشێوەی فراوانتر نەورۆز پیرۆز دەکەن و بەهەمووان دەڵێن کە ئێمە لەسەر بنەمای فەلسەفەی نەورۆز کە ژیانێکی نوێیە، خوازیاری ژیانێکین لەسەر بنەمای یەکگرتوویی گەلان، بەرەنگاربوونەوەی ستەم و خستنەڕووی داواکاری بە شێویەەکی دروست و هەروەها ژیانێک لە سەر بنەمای دادپەروەری کۆمەڵایەتیمان دەوێت، ئێمە بەم جۆرە بەشداری لە ژیاندا دەکەین. ئەمە بۆ هەمووان بۆ دۆست و دۆژمن و بۆ دەسەڵاتداران لە وڵاتەکەمان پەیامێکە، ئەمانە گرنگن. لەوبڕوایەدام کە بە بەرەوپێشچوونی ئەندێشە و فەلسەفەی رێبەر ئاپۆ و تێگەیشتن لەوە، هەوڵدانی گەلان و پیرۆزکردنی ئەم جەژنە لەسەر ئەو بنەمایەی بڵێن، ئەو کەسەی فەلسەفەی ژیان، فەلسەفەی راستەقینەی نەورۆزی بۆ ئێمە پێناسەکرد، ئێستا خۆی لە زیندانە و گۆشەگیرییەکی توندی بەسەردا دەسەپێندرێت.
لە راستیدا ستەمی زوحاکەکانی سەردەم لە دژی کاوەی هاوچەرخ رێبەر ئاپۆ لە ئارادایە. بۆیەش پەیامی گەلانمان بۆ ئازادی رێبەر ئاپۆ لە سەر بنەمای ئەوەی چارەسەرێک بۆ پرسی کوردە و پەیوەستە بە ژیانمانەوە، گرنە. گەلەکەمان تا ئەمرۆ ئەوەی کردووە، بەڵام ئەگەر بە دەنگێکی بەرزتر ئەو پەیامە بۆ ئازادی رێبەر ئاپۆ و چارەسەری پرسی کورد رابگەیەنن، بە دڵنیاییەوە ئەم دەنگە بە گوێ هەمووان دەگات و گرنگیشە ئەم پەیامە بگەیەندرێت. بۆچی؟ چونکە رێبەر ئاپۆ لە راستیدا فەلسەفەی نەورۆزی گۆڕیوە بۆ بەشێک لە ژیانی کوردەکان، کوردەکان لەم رۆژەدا شرۆڤە دەکەن و تاوتوێی ئەوە دەکەن کە لەو ساڵەیدا تێپەڕی چییان کردووە، چاکە و خراپە و کێشەکان لەکوێدان و چۆن چارەسەر دەکرێن، تەنیا وەک بۆنەیەک لێی ناڕوانن و پلان بۆ ساڵی نوێی خۆیشی دادەنێت و ئەوەی چۆن بەشداری لە ساڵی نوێدا دەکات.
لە راستیدا رێبەر ئاپۆ نەورۆزی بۆ ئێمەی کورد کردووە بە بەشێکی بنچینەیی لە فەلسەفەی ژیان، گرنگە ئێمەی کورد بایەخی ئەو کەسە بزانین کە ئەم فەلسەفەیەی بۆ ئێمە بونیادناوە، واتای بە نەورۆز بەخشیوە، بەراستیش کاوەی سەردەمە، کاوەیەک کە بەرامبەر ستەم و نادادی زوحاکەکانی ئەم سەردەمە ئاڵای ئازادی و یەکسانی کۆمەڵایەتی شەکاندووەتەوە، بۆیە پێویستە ئێمەش لەپێناو ئازادی ئەودا تێبکۆشین.
بە دڵنیاییەوە لەم قۆناغەی نەورۆزدا هەندێک کێشەش لە رۆژهەڵاتی کوردستان و ئێران کە ئارادان، دڵنیام کە گەلەکەمان ئەوانەیان لەبیر نەکردووە، بە بۆنەی نەورۆزەوە پێویستە بنەمای شەهیدان و دەستگیرکراوانی سیاسی هەروەها بنەماڵەی هەژاران لە بیر نەکرێن، چونکە پێویستە خۆشی نەورۆز بۆ هەموان بێت و هەموان ئەو جەژنە پیرۆز بکەن. بەتایبەتی لە سیستان و بەلوچستان لافاوێکی وێرانکەر زیانی زۆری بە گەل گەیاندووە، لە راستیدا داگیرکەری و سیستمی دەسەڵاتدار بەشێوەی جیاجیا و چڕ ستەم لەو گەلە دەکات. هەربۆیە لەو بڕوایەدام بە بۆنەی نەورۆزەوە گەلەکەمان لە رۆژهەڵات ئەو پشتیوانیانە زیاتر دەکەن کە تائێستا لە بەلوچستانیان کردووە.
لە کۆتاییدا دەمەوێت جارێکی دیکە نەورۆز لە رێبەر ئاپۆ و سەرجەم ئەو کەسانەی بڕوایان بە ئازادی و ئازادی خوازی هەیە و لەو پێناوەدا تێدەکۆشن، پیرۆز دەکەم".
هـ . ب
