كۆمیتەی شەهیدان لە باشووری كوردستان سەبارەت بە كۆمەڵكوژییەكەی ٢٨ ساڵ پێش ئێستای هەولێر و شەهیدبوونی دەیان خەباتگێڕ، بەیاننامەیەكی بڵاوكردەوە.

دەقی بەیاننامەكە بەمجۆرەیە:-

١٦ی گوڵانی هەموو ساڵیك وەك بەبیرهێنانەوە بۆ شەهیدانی كۆمەڵكوژی هەولێر دیاریكراوە، سەری ڕێز و نەوازش لەبەرامبەر گیانی پاكی سەرجەم شەهیدان دادەنەوێنین، بەتایبەتی شەهیدانی كۆمەڵكوژی هەولێر، كە دوور لە هەموو بەهاو ئاكارێكی مرۆڤانە و لەلایەن دەستێكی خیانەتكار و بە خیانەت و لەسەر داواكاری و خواستی دەوڵەتی داگیركەری توركیای فاشیست چەندین خەباتكار و وڵاتپارێز و كەسانی دڵسۆزی ئەم خاك و نیشتیمانە بەشێوەیەكی زۆر دڕندانە لە هەولێر كۆمەڵكوژكران و بێ سەر و شوێن كران.

ئەمڕۆ ٢٨ ساڵ بە سەر كۆمەڵكوژی هەولێر تێدەپەڕێت، كە بەرامبەر بە ٨٣ لە تێكۆشەرانی گەلەكەمان ڕوویدا، كە بۆ پارێزگاریكردن لە چاند و هونەری وكولتووری گەلەكەمان خەباتیان دەكرد و تێدەكۆشان، ئەوانە لەم كۆمەڵكوژییەدا بوونە قوربانی ئەو كەسانەبوون كە لە گەنجانی وڵاتپارێز، یەكێتی ژنانی ئازادیخوازی كوردستان، نەخۆشخانەی مانگی سووری كوردستان، یەكێتی نەتەوەیی دیموكراتی كوردستان، نووسینگەی سەرەكی ڕۆژنامەی وڵات كاریان دەكرد و ئەرك و بەرپرسیارێتییەكی نەتەوەیی و نیشتیمانییان گرتبووە ئەستۆی خۆیان.

هەموو ئەو ناوەندانە كەبوونە ئامانجی ئەم هێرشە خیانەتكارییە كەسانی مەدەنی كاریان تێدا دەكرد و سەرجەمیان هاوڵاتی بێ چەك بوون، لەهەمان كاتدا لە نەخۆشخانەی مانگی سووری كوردستان چەندین نەخۆش و برینداری لێ بوو كە چارەسەرییان وەردەگرت، بەڵام لەسەر خواستی دەوڵەتی فاشیست و داگیركەری توركیا لایەن هێزەكانی پەدەكەوە هێرشكرایە سەریان و سەرجەمیان شەهیدكران، ئەم هێرشە خیانەتكارییە دوور بوو لە هەموو بەها و ئەخلاقێكی مرۆڤانە، ئاینی، نەتەوەیی و كوردانە، بە شێوازێكی دڕندانە هێرش كرایە سەر تەواوی ئەو ناوەندانە و ئەو كەسانەی كە لەناو ئەو ناوەندانەدا كاریان دەكرد كۆمەڵكوژ و بێ سەر و شوێن كران.

لەم ڕۆژەدا ئەم كارە دڕندانەیە شەرمەزار دەكەین و بە خیانەتێكی گەورەی نیشتیمانی دەبینین، كە لەبەرامبەر تێكۆشەرانی ئازادیی گەلەكەمان ئەنجامدراوە، وەك خانەوادەی شەهیدان چەندین جار چووینەتە سەردانی چەندین دەزگای پەیوەندیداری حكومەتی هەرێم و پەرلەمانی هەرێم و مافی مرۆڤی كوردستان، بەڵام هەتا ئێستا هیچ وەڵامێكمان نەدراوەتەوە لە پێدانەوەی ڕوفاتی شەهیدەكانمان، یان وەرگرتنی زانیاری دەربارەی شوێنی ناشتن و بەخاكسپاردنی ڕووفاتی ئەو شەهیدانە، تەنانەت لەلایەن پەدەكەوە هیچ ڕوونكردنەوەیەكیان نەدراوە بەرامبەر بەم تاوانە، ئەمەش بەڵگەیە لەسەر ئەوەی كە پەدەكە زۆر بە دڕندانە و بێ ویژدانانە ئەم كۆمەڵكوژییەی ئەنجام داوە و نایەوێت هیچ زانیارییەك لەسەر ئەو كۆمەڵكوژییە ئاشكرا بكات.

ئەم هێرش و كۆمەڵكوژیانەش لەلایەن داگیركەران و دەستی خیانەتەوە بۆسەر وڵاتپارێزان و ئازادیخوازن و شەڕڤانانی ئازادی و تەنانەت هاوڵاتیانی مەدەنیش بەردەوامە و كۆتایی نەهاتووە، سەرەڕای هەموو ئەو هێرشە قڕكەرانەی دەكرێتە سەر سروشت و ژینگە و خاكی كوردستان.

لە ١٨ی ئایار ساڵیادی شەهیدكردنی زەكی چەلەبی و شەهید ئارام و شەهید ئیسماعیل كە لە شوێن و كاتی جیاواز و بە هاوكاری دەستی سیخوڕیی ناوخۆیی و لەلایەن دەوڵەتی داگیركەری توركیاوە شەهید و تیرۆر كران، دوژمنانی كورد و دوژمنانی ئازادیخوان چ بەڕێگەی كەسانی بەكرێگیراو و سیخوڕ و چ بە ڕێگەی فڕۆكەی بی فڕۆكەوان تیرۆر و كۆمەڵكوژی لەسەر گەلەكەمان بەڕێوە دەبەن، بێ گومان هەموو ئەم تیرۆرانەش بەهاوكاری و پاڵپشتی دەستی ناوخۆیی و بەكرێگیراوەوە ئەنجام دەدرێت، هەر لەم مانگەدا شەهیدی پێشەنگ حەقی قەرار لە ١٨/٥ /١٩٧٧ تیرۆر كرا، ئەم ڕۆژە وەك «ڕۆژی شەهیدان» و مانگی گوڵان بە «مانگی شەهیدان» ناسراوە.

لە كەسایەتی تەواوی شەهیدانی مانگی گوڵاندا كە بەقارەمانییەكی بێ وێنە بەرخۆدانیان كرد و گیانی خۆیان بەخت كرد، بوون بە پێشەنگی شۆڕشی كوردستان، لێرەوە پێیان دەڵێین خوێنی ئەو شەهیدانە بەفیڕۆ نەچووە و بە دڵنیایەوە ڕەنج و تێكۆشانی سەرجەم ئەو شەهیدان گەیشتووەتە ئامانج، ئێمەش وەك كورد لەسایەی خەبات و تێكۆشانی و قوربانیدانی ئەوانەوە هەنگاو دەنێین بەرەو قۆناخێكی نوێ و وەچەرخانێكی گرنگ و سەركەوتن.

لێرەوە ئیمە بەڵێنی خۆمان دووبارە دەكەینەوە و بەڵێن دەدەین كە لەسەر هێڵی شەهیدان تێكۆشانی خۆمان پێشبخەین و خۆمان بەڕێكخستن بكەین تا ڕەگی خیانەت و خیانەتكاری لەكوردستان دەربهێنین و داگیركەری لە كوردستان لەناو ببەین و فاشیزم تێكبشكێنین.

كۆمیتەی بنەماڵەی شەهیدانی لە باشوور