ئێوارەی دوێنێ لە ٩هەمین ساڵیادی دامەزراندنیدا، ئەنجومەنی هەرێمی کەرکوکی تەڤگەری ئازادیی کۆمەڵگای کوردستان بە مەڕاسیمێک یادی دامەزراندنی تەڤگەرەکەیانی بەرزڕاگرت.

لە مەڕاسیمەکەدا هەردوو هاوسەرۆکی ئەنجومەنی کەرکوکی تەڤگەری ئازادی و ئەندامانی ئەنجوومەنی هەرێمەکە و ژمارەیەک لە هاووڵاتیانی ووڵاتپارێزی کەرکوکیش بەشداربوون.

کۆمەڵ سەرمەد هاوسەرۆکی ئەنجومەنی هەرێمی کەرکوک تەڤگەری ئازادی کۆمەڵگای کوردستان سەبارەت بەساڵیادی دامەزراندنی تەڤگەری ئازادی ڕایگەیاند: "ئەمڕۆ لە ٩ هەمین ساڵیادی دامەزراندی تەڤگەری ئازادی دا پیرۆزبایی لە تەواوی و لایەنگرانی ڕێکخستنەکەمان دەکەین، ٩ ساڵ لەمەوبەر لەدۆخێکی ناسەقامگیری سیاسی، ئەمنی و سەربازی، لەو کاتدا کە چەتەکانی داعش بەشێکی زۆری خاکی عیراق و سوریا و بەشێکی کوردستانیشیان داگیرکردبوو و لە شەنگالیش کۆمەڵکوژیی دروستکردبوو، لەو کاتەدا تەڤگەری ئازادی وەکو پارتێک دروست بوو پاشان وەکو سیستمێک".

هەروەها کۆمەڵ سەرمەد ووتیشی: " لە ٩ ساڵی دامەزراندنی تەڤگەری ئازادی بەردەوام مەترسی و هەڕەشە بۆسەر تەڤگەری ئازادی هەبووە و زۆر جاریش هەوڵی داخستنی بارەگاکانمان دراوە، کە لەماوەی ڕابردوو یەکێک لە ئەندامانی دامەزرێنەی تەڤگەری ئازادی بەناوی مامۆستا شەماڵ شەهید کرا، لێرەوە سەری رێز و نەوازش بۆ شەهید شەماڵ و تەواوی شەهیدانی ڕێگەی ئازادی دادەنوێنین".

لە کۆتایدا هاوسەرۆکی ئەنجومەنی هەرێمی کەرکوکی تەڤگەری ئازادی ڕایگەیاند: "ئێمە وەکو تەڤگەرێکی پێکەوەژیان و دیموکراسی لە بەڕێوەبردن هاتووینەتە کایەوە، پەیامی ئێمە پەیامێکی ئاشتیانە و دیموکراسیانەیە بۆ تەواوی گەلانی عێراق، لەدژی فاشیست و ڕەگەزپەرستی پەیامی ئاشتی و پێکەوەژیانمان هەڵگرتووە، وە نامانەوێت هیچ مەزهەب و بیروباوەڕ و نەتەوەیەک پەراوێز بکرێت لە بەڕێوەبردنی عێراقدا".

ژ.ت