سەربازانی دەوڵەتی تورک لە ناوچەى بەرواریی پارێزگای سێرت لە باکووری کوردستان و لە نزیک شارۆچکەى بەگنەدیکێ تەقەیان لە ئۆتۆمبێلێک کرد، کە ٤٨ کۆچبەری ئەفغانی و پاکستانیی تیادا بوو.

ئەو هێرشە لە کاتژمێر ٠١:٣٠ی نیوەشەوە روویدا و بەو هۆیەوە ٢ پەنابەر کوژران و ١٢ پەنابەری تر بریندار بوون.

کۆچبەرە بریندارەکان گواسترانەوە بۆ نەخۆشخانەى فێرکاریی سێرت و شۆفێری بارهەڵگرەکەش بە ناوی ر.ئە دەستگیرکرا. هەروەها  دەوترێت، پەنابەرەکانی تر لە شوێنی رووداوەکە رایان کردووە.

پارێزگاری دەوڵەتی تورک لە سێرت بانگەشەی ئەوە دەکات، کە گوایە ئەو ئۆتۆمبێلە گوێی بە هۆشداری و ئاگادارکردنەوەى "راوەستە" نەداوە و لە ئۆتۆمبێلەکەوە تەقە لە سەبازان کراوە و سەربازانیش وەڵامی تەقەکەیان داوەتەوە.

لە زۆربەى رووداوەکاندا بەرپرسانی دەوڵەتی تورک بۆ شاردنەوەى تاوانی سەربازان و هێزە ئەمنییەکانیان لێدوانی لەوجۆرە دەدەن و دواتر لە لێکۆڵینەوەکاندا دەردەکەوێت، کە ئەو جۆرە لێدوانانە چەواشەکارانە بوون و لەبەر ئەوەش زۆربەى خەڵک بڕوا بەو جۆرە لێدوانانە ناکەن.

ژ.ت