ڕوفاتی هونەرمەندی کورد عایشە شان، کە لە ١٨ی کانوونی یەکەمی١٩٩٦ لە شاری ئیزمیر ژیانئاوایی کرد، دوای ٢٩ساڵ، لەسەر وەسیەتی خۆی گۆاسترایەوە بۆ ئامەد و لەوێ بە خاک سپێردرا. ڕوفاتی هونەرمەندی کورد عایشە شان دوای مەراسیمێکی جەماوەری لە گۆڕستانی یەنکۆی ناوچەی ڕێزانی ئامەد بەخاک سپێردرا.

پەرلەمانتارانی پارتی دیموکراسی و یەکسانی گەلان (دەم پارتی)، هاوسەرۆکانی شارەوانی، ڕۆشنبیران، نووسەران، نوێنەرانی دامەزراوە و ڕێکخراوەکان، بنەماڵەی خودی هونەرمەند و کەسایەتیەکی زۆر بەشدارییان لە مەراسیمەکەدا کرد.

لە مەراسیمەکەدا پانکارتی "ژن، ژیان، ئازادی" بەرزکرایەوە و بەشداربووان گوڵیان لەسەر گۆڕی عایشە شان دانا. پاشان گۆرانییەکانی هونەرمەند عایشەشان وترایەوە.

لە مەراسیمەکەدا موراد کەسە کوڕی هونەرمەند قسەی کرد و وتی: "لەمەودوا دایکم ڕاسپاردەی گەلی کوردە."

هەروەها لە ئەندامی بنەماڵەی هونەرمەند یوکسەل ئەڤشار قسەی کرد و وتی: "زۆر دڵتەنگم، بەڵام سوپاسی هەموو کەسێکی ماندوو نەناس دەکەم، ئەمە تەنها لە سایەی من و هەندێک کەسی دیاریکراوەو جێبەجێ نەکرا، بەڵکوو ئەمە خواستی گەلی کورد بوو، لەو باوەڕەم کە گەلی کورد وەکوو ویژدانی خۆی خاوەنداری لێدەکات، عایشە شان دەربەدەری زۆری کێشا و ئازارێکی زۆری چێشت."

زینێ دینجەر ئەندامی پلاتفۆرمی یەکێتی ژنانی کورد لە مەراسیمەکەدا وتی: "سوپاسی شارەوانی گەورەی ئامەد دەکەین. ئەوان عایشە شانیان هێنایە زێدی خۆی، ئێستا ئیتر ئەمانەتی گەلی کوردە، هەموو کوردێک بە زمان و کولتووری خۆی ناسراوە، عایشە شانیش بەو شێوەیە ناوبانگی هەبووە."

هەروەها سەرا بوجاک، هاوسەرۆکی شارەوانی گەورەشاری ئامەد وتی: "ئەمڕۆ ڕۆژێکی مێژوویی و شکۆمەندە بۆ ئێمە. سوپاسی پلاتفۆرمی یەکێتی ژنانی کورد دەکەم چونکوو لەم کارەدا هەوڵێکی زۆریاندا."

مەراسیمەکە بە گوتنەوەی گۆرانییەکانی هونەرمەند عایشە شان کۆتای هات.