رابەری ئایینی ئێران عەلی خامنەیی رووداوەکانی سوریای هەڵسەنگاند و باسی لەوەکرد کە ئەو رووداوانە پلانی هاوبەشی ئەمریکا و ئیسرائیل بوون. خامنەیی بە بێ ئەوەی ئەوەی راستەوخۆ ناوەکەی ببات ئاماژەی بە رۆڵی دەوڵەتی تورک کرد.
دوای رووخانی رژێمی ئەسەد لە سوریا، رابەری ئایینی ئێران عەلی خامنەیی بابەتەکەی هەڵسەنگاند. خامنەیی سەرنجی بۆ سەر رژێمی ئەسەد راکێشا و ئەوەی خستەڕوو کە رووداوەکانی سوریا لەلایەن ئەمریکا و ئیسرائیلەوە پلانیان بۆ دانراوە.
بە بێ ناوهێنانی راستەوخۆ ئاماژەی بە تورکیا کرد
خامنەیی بە بێ ئەوەی ناوەکەی ببات، ئاماژەی بە تورکیا کرد و وتی، "بەڵێ وڵاتێکی دراوسێی سوریاش لەو بوارەدا رۆڵێکی ئاشکرای گێڕا. هەمووان دەتوانن ئەوە ببینن، بەڵام فاکتەری سەرەکی و ژووری کۆنتڕۆڵی پیلانگێڕیەکە لە ئەمریکایە".
خامنەیی بانگەشەی ئەوەکرد، کە بەڵگە لە بەردەستن کە رووداوەکانی سوریا بە پلانی هاوبەشی ئەمریکا و ئیسرائیل ئەنجامدراون.
هەر لە قسەکانیدا خامنەیی جەختی کردەوە کە بەردەوام دەبن لە خۆڕاگری و وتی، "چەندەش گوشار بخەنە سەر موقاوەمە، موقاوەمە زیاتر بەهێز دەبێت. ئەوانەی لەواتای بەرخودان و موقاوەمە تێنەگەیشتوون، پێیان وایە ئێران لاواز بووە".
