هێزەكاو سووریای دیموكراتی (قەسەدە) سەبارەت بە هرووژم و بۊمبوارانەکا دۊڵەتو تورکی ئەرەگیری و چەتەکاش پەی سەرو هەرێمەکاو سەرنیشت و ۋەرکۊتوو سووریای و بەتایبەت دەوروبەرو بەنداوو تیشرین و قەرەقۆزاقی، ئەرەیاۋنێوەشا وەڵا کەرڎۆ.

جە ئەرەیاۋناکەینە ئامان، هېزی دۊڵەتو ئەرەگیرو توركی و چەتەكێش درێژەشا بە هرووژمە ناڕەواكاشا دا پەی سەرو دەگایەکا دەوروبەرو سردەو قەرەقۆزاقی، جە كاتێنە فڕۆكێوە بێفڕۆكەوان دەگاو بیر حەسوی و تەپو عەلووشی بۊمبواران کەرڎ.

جە ئەرەیاۋناکەینە دەسنیشان کریان هرووژمو فڕۆکەی جەنگی دۊڵەتو تورکی بەردەوام بیەن و ئامان: "فڕۆكە جەنگییەکۍ دۊڵەتو تورکی ئەرەگیری چن جارێ هرووژمشا کەرڎ سەرو  دەگاو غەسقی، هەرپاسە بۊمبوارانەکە زەرەری ماددیش بە یانە و موڵكو خەڵكی یاونا، بۊمبوارانەکە هامكات بۍ چنی تۆپ وارانی قورسو تانك و موشەكۍ و هاوەنا پەی سەرو فرەو دەگایەکا دەوروبەرو سردەو قەرەقۆزاقی، كە زەرەری ماددیش چنەکۊتۆ."

جە درێژەنە ماچۆ: "جە قۊڵو بەنداوو تیشرینی؛ دەوڵەتو ئەرەگیرو توركی و چەتەكێش بە چەكی قورس بەردەوامۍ بیێنۍ جە بۊمبواران کەردەی دەوروبەرو بەنداوەكەی، جە هەمان كاتەنە ئەرەگیرۍ و چەتەكێش، بە تۆپۍ قورسۍ یانەو كرێكاراشا بۊمبواران کەرڎ و زەرەری ماددیشا چنەکۊتۆ."

جە بەردەوامینە ماچۆ: "فڕۆكە جەنگییەكۍ دۊڵەتو توركی چوار هرووژمێشا کەرڎۍ سەرو ناوچەو شێخلەری جە ۋەرنیشتوو كۆبانێ و زەرەری ماددیشا بە یانە و موڵكو خەڵكی مەدەنی یاونا، هەرپاسە بە درێژایی هېزی جە ئاسمانو ناوچەو عەین عیساینە جمو جوڵی سەرەمڕەو فڕۆكە جەنگییەکا و فڕۆكەی بێفڕۆكەوانو دۊڵەتوو ئەرەگیرو توركی بۍ.