راپۆرتی رۆژنامەیەكی ناوخۆی ئێران نیشانیدەدات كە رێژەی هەژاری"كەم دەرەتان"، لەماوەی سێ ساڵی رابردوو دوو هێندە زیادی كردووە. بەگوێرەی ئەم راپۆرتە، ٣٥% لەكۆمەڵگە هاوكاری كۆمەڵایەتیە لەژێر رێژەی كەمدەرەتانەكانەوەن. زانیاری دارایی نزیكەی ٧% ئێرانیەكان دیار نییە. گۆمان دەكرێت بەشێكی زۆری ئەو رێژەیە ئەو كەسانەن كە ناسنامەی باری شارستانینیان نییە.

رۆژنامەی شەرق راپۆرتێكی لەسەر رێژە و ژمارەی ئەو كەسانە بڵاوكردۆتەوە كە كەمدەرەتان و دەوڵەمەندن و رایگەیاندووە؛ بەشێكی بچووكی كۆمەڵگەی ئێران كە نزیكەی ٨% ئێرانیەكانن دەوڵەمەندن و ٩٢% لەبواری ماڵیەوە كەمدەرەتان یا لەچینی ناوینن.

خاڵی سەرەنجڕاكێش لەم راپۆرتەدا ئەوەیە كە دراوی دەوڵەمەندەكانی ئێران بەشێوەیەكی رێژەیی بەرزتر دەبێتەوە و لەبەرامبەردا چینی هەژار لە ماوەی سێ ساڵدا دوو قات زیاتر بووە.

بەگوێرەی ئامارەكانی بەشی خۆشگۆزەرانی لەئێراندا كە دامەزراوەیەكی دەوڵەتیە، 35% لەكۆمەڵگەی ئێران كە هاوكاری كۆمەڵایەتی وەردەگرن لەچینی هەژاران پێكدێن و ٥٧% لەچینی ناوینن. بەڵام زانیاری لەسەرباری ماڵی، رێژەی ٧% ئێرانیەكان دەستنیشاننەكراوە، بەراستی ئاخۆ ئەم رێژەیە كێن؟

ئەو كەسانەی ناسنامەی باری شارستانیان نیە، بەشی هەرە هەژاری كۆمەڵگەی ئێرانن كە نە دەنگ و رای ئەوانە وەردگیردرێت، نە دەتوانن بچنە قۆتابخانە و نە خزمەتگۆزاری تەندروستیان پێ دەدرێت و لەهەموو مافەكانی هاوڵاتی بوون بێ بەشن. ئەوانە ئەو بەشە هەژارەی كۆمەڵگەی ئێرانین كە بەشاراوەیی ماونەتەوە.

هـ . ب