ستیفان شناخ ڕاپۆرتەرو تورکیای جە کۆمیتەو شۊنیرەلوای ئەنجوومەنو پەرلەمانتارا کۆنسەو ئۊرووپای جە بارەو سەرۋنەداکەو ئی دماییەیشو پەی تورکیای قسێش کەردې و جە بارەو پرۆسەکەیۆ هۊرسەنگنایش کەرد. ستیفان شناخ ئاماژەش پانەیە دا جە تورکیانە پرۆسەو ئاشتی نیا ئارانە، ئانەی هەن تەنیا بانگەواز پەی ئاشتی مکریۆ، ئی ئاژەیچە پەنەوازا بەشێوێوە جددی هۊرسەنگیۆ.

ستیفان شناخ ئەرەیاۋناش جە چوارچێوەو سەرۋنەداکەیشەنە چنی وەزیرا تورکیای، ۋەرپەرسا دادوەری تورکیای و هەرپاسە چەمش بە حوکم دریایا جە زینانەکا تورکیاینە کۊتەن و چی گلېرۊبیەیانە سەرو پرۆسەو ئاشتی پرسیارە و پەیلوایش فاڕانۆ.

ستیفان شناخ واتش، "جە سەر ۋنەداکەیمەنە پەی تورکیای چنی وەزیرا، بڕې کاربەدەسۍ دادگاکا و هەرپاسە بەڕێکەوت چەمم بە بڕې جە حوکم دریایا کۊت. سەرو پرۆسەو بەنام 'ئاشتی' بڕې پەیلوێما فاڕێوە و پرسیارې فرێم کەردې چا بارۆ؛ ئایە ئی پرۆسە بەتەمامەتی چ مەعنێوەش هەنە؟ چنەوەشبیەی چېشا، چێشش جە وێشەنە هۊرگێرتەن؟ دلې ئی پرۆسەینە چێش و کام فاڕیایۍ یاسایی کریان؟"

'پرۆسەکە چنی چەکماڵایچەرە، پەنەوازش بە فاڕیای کۆمەڵایەتی هەن'

ڕاپۆرتەر ستیفان شناخ ئەرەیاۋناش ئاشتی تەنیا بە نیایرەو چەکی نمەبۆ و ئاشکراش کەرد پەنەوازا جە تورکیانە نزیکایەتیێوە یۊگێرتە پېوەس بە پرسو کوردی بگیریۆنە ۋەر. ستیفان شناخ باسش چانەیچ کەرڎ مەرجێوە بنەڕەتییا کە جە مژارەکا پەروەردە، ئیدارە جەماوەرییەکانە و بەشداربیەی کۆمەڵایەتینە فاڕیای بنەڕەتی بکریۆ، ستیفان شناخ بە ڕووەکەردەی جە دەسەڵاتی واتش: "ئەر بەڕاسی باسو ئاشتی مکەردې، ئا کاتە مشۊم شمە مژارو کوردی جە چوارچێوەو ۋەننگەی سەرەتای، سیستەمو پەروەردەی و ئیدارەی جەماوەرینە هۊرسەنگندې. فرەو توخم و کۊڵەکې ئی پرۆسەیە هەنې. چێوەکە گرڎ چەکنیایرەو پەکەکەی نییا؛ خودو ئینەی بەتەنیا ۋێش بە ماناو ئامای ئارای ئاشتی نمۍ. جە حەقەتینەنە تا ئیساتې نمەزانو چ نامېوە چی پرۆسەیە بنیەو."

ستیفان شناخ ئاماژەش پانەیە دا پا نموونەی جە ئۊروپانە بیەنشا پەی تورکیای نموونەو ئێرلەنداو سەرنیشتیشا پېسە مۆدێلێوە سەنگینی وستەن رۆژەڤۆ و واتش، "ڕێککەوتەی و پەیماننامەو ئێرلەندایما پېسە نموونێوە نیشانەو تورکیای دا؛ چونکی پەیماننامێوە پا جۊرە بۍ جە وڵاتێوەنە ئاشتیێوە حەقەتینە و هەمیشەیش بەرقەرار کەرد کە دەیان هەزار ئینسانێش چنە کوشیێبێنې. حکومەتو بەریتانیای زینانیەکێش ئازاڎې کەردې و چا پرۆسەنە هەموارکەردەیۊش پېسە پەیماننامەو پاسکاڵی (گود فرایدەی) مشناسیۆوە، وزیا پراکتیکۆ."

'ڕاپۆرتەر جە مانگۊو نۆۋەمبەرینە گوزارشتەو ۋێش پێشکەش مکەرۆ'

ڕاپۆرتەرو تورکیای جە کۆمیتەو شۊنیرەلوای ئەنجوومەنو پەرلەمانتارا کۆنسەو ئۊرووپای ستیفان شناخ دەسنیشانش کەرد جە مژارو چارەسەری دیموکراتیکی و ئاشتینە هەڵای ئینې سەرەتاو گفتوگۆکانە جە کۆنسەو ئۊرووپاینە و باسش چانەی کەرڎ پەی وردبیەیۆ و قسەکەردەی زیاتەری سەرو پرۆسەکەی گوزارشتێوە ۋەرفراوان پێشکەش بە کۆنسەو ئۊرووپای مکەرۆ.