چالاکیی 'ئێشکگیریی ئازادی' کە جە شارو ستراسبۆڕگو فەڕەنسای جە ٢٥و حوزەیرانو ٢٠١٢ینە بە سەرمەشقایەتی 'دەسوەڵێوستەی ئازادیی عەبدوڵا ئۆجالان' دەسشپنەکریان و سەرەمڕە بەردەوام بې، لوا دلې چواردەهەمین ساڵۊو ئەنجامدای چالاکییەکاشۆ.

ئا ئێشکگیرییەی کە پەی ئازادیی ڕابەر ئاپۆی دەسشپنەکەرڎ، جە مېڎانێنە ملۊڕاوە کە ئەرەمەرزیاکې کۆنسەو ئۊروپای، دادگاو مافو مرۆڤو ئۊروپای، کۆمیتەو ڕاگێرتەی جە ئەشکەنجەی و کۆنسەو ئۊروپای و پەڕلەمانو ئۊروپایش چنەن. تا ئیساتې جە سەرانسەرو ئۊروپاینە بەهەزاران کەسې بەشداریی چالاکییەکەیشا کەرڎەن.

چالاکییەکە کە داوای بنەڕەتیش ئازادی بەڎەنی ڕابەر ئاپۆیا، چنیچش فیکر و ئایدیاکې ڕابەر ئاپۆی وەڵا مکریاوە، پەی ئانەی ئەوەکۊشای گەلو کوردی بوینیۆ و فشارو ڕای گرڎیی وزیۊ سەرو ئەرەمەرزیا مېیاننەتەوەییەکا تاوەکو ۋەرپرسیاری ۋێشا جابەجێ بکەرا.

چالاکییەکە جە حەفتێوەنە حۊت ڕوې سەرەمڕە بەردەوامیش هەن. زوڵفو بینگۆل، یۆ جە ڕاوەبەرا چالاکییەکەی ئاماژەش پانەیە کەرڎ کە چالاکییەکە بە بڕیارداریوە ملۊڕاوە و واتش، "ئازادیی ڕابەر ئاپۆی ئامانجی سەرەکیی ئێمەن. ڕابەر ئاپۆ ئیرادەو گەلو کوردین. پۊکەی تاوەکو ئا ئیرادە ئازاڎ نەبۆ، گەلو کوردی ئازاڎ نمەبۆ."

چالاکییەکە کە یاوا بە حەفتەو ٦٨٠ەمینو ۋێش، ئی حەفتە جە لایەنو ئەنداماو مېیانو گلېرگەو کوردی دیموکراتیکی شارو بێرنو سویسرایۆ ملۊڕاوە. ئێشکگیرا ئی حەفتەیە ئینێنې ''دلۆڤان سۆگون، مەتین مینتاش و محمد لەبلەبیجی''