بە سەرمەشقایەتی چڼین ڕێکوزیا و دەزگا کوردەسانیەکا پېسە جیک، کەنەکە، ئەنستیوتییە کوردییەکا ئەڵمانیای و بەلجیکای، بۆنەو ١٠٠مین ساڵیاڎو ئەرەپڕاکەو شێخ سەعیدو پیرانی، جە شارو کۆڵنو ئەڵمانیای جە ٢٩و حوزەیرانی جە مېڎانوو هیومارکێتینە گلېرۊبیەیې گۊرە ئەنجام مڎریۆ.

پېوەس بە گلېرۊبیەکەی کەجەدەکە-ئەی جە ئەرەیاۋنێوەنە بانگەوازش پەی بەشداری بەهێزو کوردەسانیا کەرد جە گرڎو وڵاتا ئۊرووپایۆ بە بەهێزتەرین شێوە بەشدارې با. کەجەدەکە-ئە جەختش چانەی کەردەنۆ چا ڕووە تاریخیەنە بەشداری و یۊگێرتەیی بە ڕوحو یۊبیەی نەتەوەیی فرە گرنگا.

جە دێژەو ئەرەیاۋناکەینە ئاماژە پانەی کریان گەلو کوردی بە سەرمەشقایەتی ڕابەر ئاپۆی ئینا مڎرامانەنە و بە گیان بەخشای هەزاران گەشمەرڎا درێژە بە مڎرامانیش مڎۊ و ئامان: "بە وەڵې وینای و سەرمەشقایەتی ڕابەر ئاپۆی گرڎو کێڵەکا سەرو گەلو کورد و کوردەسانی پوچۍ کریێوە و ژیۋایۆ گەلو کوردی ئاما ئاراوە."

کەجەدەکە-ئە بە گرنگیوە سەرنجش وستەن سەرو بانگەوازە تاریخیەکەو ٢٧ـو شوباتو ڕابەر ئاپۆی و ماچۆ: "پەی سەرکۊتەی پرۆسەکەی ئەرکی گرنگما ئینا ۋەرەنە. داوا جە گەلەکەیما مکەرمې بەشدارې ئی بانگەوازییە بانە و بیاوناش بە سەرکۊتەی."

کەجەدەکە-ئە داواش جە گەلی کەرڎ بە ڕوحو سەفەربەرییوە بەشداری گلېرۊبیەکەو ٢٩و حوزەیرانو کۆڵنی بکەرا.