بەگۋېرەو ئاژانسوو هەواڵوو میهری کە نیمچە فەرمییا و یەکینەکې هەواڵگریی کۆمارو ئیسلامیی ئێرانی، جە ماوەو ١٢ ڕوا جەنگینە چنی ئیسرائیلی ٧٠٠ کەسې باڵبەسې کریێنې. جە هەواڵەکەنە ئی کەسې پېسە '٧٠٠ سەروازا ئیسرائیلی کە پەی زەڕی جەنگ مکەرا' پێناسە کریێنې.

ۋەرپەرسا باڵاو ئێرانی ئاماژەشا پانەی کەرڎ، هامکات چنی هرووژمەکا ئیسرائیلی تۆڕێوە سیخوڕی سەر بە 'ڕژێمو زایۆنی' جە دلېینەو وڵاتینە چالاک بیەن و بانگەشەو ئانەیشا کەرد کە ئی تۆڕە بە تنی پەکوزیان.

باڵبەسکەردەیەکې ئەغلەبیەتشا ئینې کرماشان، ئەسفەهان، غوزستان، فارس و لوڕستانەنە.

یەرې کەسې دریې قەنارە

ئێرانەنە پەی ۋەرەنگاربیەیۆ ناڕەزایی کۆمەڵایەتی و هێزە ئۆپۆزسیۆنەکا، بێ دادگاییکەردەیې دادپەروەرانە کەسانێوە جە قەنارەدریې.

بەگۋېرەو ئاژانسوو هەواڵوو فەرمیی ئەرکو دادوەریی میزانی، یەرې کەسې بە تۆمەتو سیخوڕیکەردەی پەی مۆسادی دریێنې قەنارە. ئەرەیاۋېیا کە هەریەریشا سەرسەعبو ڕۆو چوارشەممەی دریېنې قەنارە.

ناڕەزایی ڕێکوزیاو چنەوەشبیەی

ڕێکوزیاو چنەوەشبیەی مېیاننەتەوەیی ٢٠و حوزەیرانی جە ئەرەیاۋنێوەنە داواش جە ۋەرپەرسا باڵاو ئێرانی کەرد دەس جە جە قەنارەدای ئارەزوومەندانەی هۊرگېرۆ.