قۆناغی كۆتایی هه‌ڵمه‌تی گه‌رده‌لوولی جزیر كه له چوارچێوه‌ی «شه‌ڕی نه‌هێشتنی تێرۆر»دایه به‌رده‌وامه. قه‌سه‌ده ئاماری ٢٤ كاتژمێری ڕابردووی ئاشكرا كرد و كوژرانی ٣١ چه‌ته‌ی داعشی ڕاگه‌یاند.
ناوه‌ندی ڕاگه‌یاندنی هێزه‌كانی سووریای دیموكراتیك (قه‌سه‌ده) ئاماری ٢٤ كاتژمێری ڕابردووی قۆناغی دووه‌می هه‌ڵمه‌تی گه‌رده‌لوولی جزیری ئاشكرا كرد. به گوێره‌ی ئاماره‌كه ٣١ چه‌ته‌ی داعش له سنووری دێره‌زۆر كوژراون.
ده‌قی ڕاگه‌یه‌نراوه‌كه:
به‌ره‌ی باخۆز
ڕێكخراوی تێرۆریستی داعش به چه‌كی قورس و ٣ ئۆتۆمبێلی بۆمبڕێژكراو هێرشی كرده سه‌ر خاڵه‌كانی هێزه‌كانمان. شه‌ڕڤانانی ئێمه‌ش وه‌ڵامی هێرشه‌كانیان دایه‌وه و به‌ر له‌وه‌ی بگه‌نه ئامانجی خۆیان ٢ ئۆتۆمبێل ته‌قێنرانه‌وه. به‌هۆی هێزی ته‌قینه‌وه‌كه ٢ شه‌ڕڤانی ئێمه بریندار بوون. ئۆتۆمبێلی سێیه‌میش له لایه‌ن فڕۆكه‌كانی هاوپه‌یمانه‌تیی نێونه‌ته‌وه‌یی ته‌قێنرایه‌وه.
له‌نێوان شه‌ڕڤانانی ئێمه و ئه‌ندامانی ڕێكخراوی تێرۆریستیدا شه‌ڕی سه‌خت ڕوویدا، له ئه‌نجامدا ٨ تێرۆریست كوژران. هه‌روه‌ها هێزه‌كانمان له خاڵێكدا كه لێی جێگیر بوون، تاكتیكێكیان به‌ڕێوه‌برد و له خاڵه‌كه كشانه‌وه، دواتر تێرۆریستان له خاڵه‌كه‌دا گردبوونه‌وه، له‌وێش فڕۆكه‌كانی هاوپه‌یمانان هێرشیان كرد و هه‌موو تێرۆریستانی ئه‌و خاڵه كوژران. هێزه‌كانمان لێره ٣ خاڵیان ده‌ستنیشان كرد و ئه‌و خاڵه‌یان كۆنتڕۆڵ كرده‌وه كه لێی كشابوونه‌وه.
له دوای شه‌ڕی سه‌خت كه چه‌ندین كاتژمێر به‌رده‌وام بوو، هێزه‌كانمان ١ كم له‌م به‌ره‌یه پێشڕه‌وییان كرد و ٩ خاڵیان كۆنتڕۆڵ كرد. هه‌روه‌ها فڕۆكه‌كانی هاوپه‌یمانان كۆگه‌یه‌كی ته‌قه‌مه‌نی، ٢ ئۆتۆمبێل، ئۆتۆمبێلێكی بۆمبڕێژكراویان تێكشكاند و ئه‌میرێكی داعش-یشیان كوشت.
هاوكات مینێك به شه‌ڕڤانێكی ئێمه‌دا ته‌قییه‌وه و به‌هۆیه‌وه بریندار بوو.
به‌ره‌ی حه‌جین
له‌نێوان هێزه‌كانمان و تێرۆریستانی داعشدا له تونێله‌كان شه‌ڕ ڕوویدا. شه‌ڕڤانانی ئێمه له ٢ تێرۆریستیان دا كه هه‌وڵیان ده‌دا خۆیان به شه‌ڕڤانانی ئێمه‌دا بته‌قێننه‌وه. له ئه‌نجامدا له دووره‌وه بۆمبه‌كان به‌خۆیاندا ته‌قینه‌وه.
به‌م شێوه‌یه شه‌ڕڤانانی ئێمه تونێله‌كه‌یان كۆنتڕۆڵ كرد و هه‌ڵمه‌تێكی پاككردنه‌وه‌یان ده‌ستپێكرد. ٢ مین كه تێرۆریستان له ماڵێكدا دایاننابوونه‌وه ته‌قینه‌وه، به‌ڵام هیچ زیانێكیان نه‌بوو. لێره دۆشكه‌یه‌كی ١٢.٥ و ٢ چه‌كی كڵاشینكۆف كه‌وتنه ده‌ستی شه‌ڕڤانان.
شه‌ڕڤانانی ئێمه له‌م به‌ره‌یه پێشڕه‌وییان كرد و زۆر ماڵیان پاككردنه‌وه و ٥ خاڵی نوێیان كۆنتڕۆڵ كردن. به‌هۆی ئه‌و مینانه‌ی كه تێرۆریستان دایانناونه‌ته‌وه، شه‌ڕڤانان به وریایی به‌ره‌و پێش چوون. لێره‌شدا ١٣ مین له لایه‌ن تیمه تایبه‌ته‌كانمانه‌وه ته‌قێنرانه‌وه.
ئامار
ژماره‌ی كوژراوانی تێرۆریستان: ٣١
ژماره‌ی هێرشه‌كانی فڕۆكه‌كانی هاوپه‌یمانه‌تیی نێوده‌وڵه‌تی: ١٥
ئه‌و چه‌كانه‌ی كه كه‌وتوونه‌ته ده‌ستی شه‌ڕڤانانی ئێمه: دۆشكه‌یه‌كی ١٢.٥ و ٢ كڵاشینكۆف
زیانه‌كانی ڕێكخراوی تێرۆریست: تۆپێكی هاوه‌ن، ٢ كۆگه‌ی ته‌قه‌مه‌نی و ٥ ئۆتۆمبێل تێكشكێنران، هه‌روه‌ها تونێلێك تێكدرا.
ژماره‌ی شه‌ڕڤانه برینداره‌كانی ئێمه: ٣
s.m
