یەکێک لە فەرماندەکانی مەجلیسی سەربازی مەنبەج بە ناوی محەمەد هۆران (ئەبو جەوان) لە ٢٤ی تشرینی دووەم لە ئەنجامی هێرشی دەوڵەتی داگیرکەری تورک لە شاری مەنبەج شەهید بوو.

دانیشتووانی شاری منبج و گوندنشینەکانی دەوروبەری، ئەندامانی ئیدارەی مەدەنی دیموکراتیکی مەنبەج و گوندنشینەکان و مەجلیسی بنەماڵەی شەهیدان، ئەمڕۆ بە شێوەیەکی جەماوەری بەرەو مەراسیمی سەرەخۆشی فەرماندەی مەجلیسی سەربازی مەنبەج محەمەد هۆران چوون و سەرەخۆشییان لە بنەماڵەکەی کرد. خێمەی سەرەخۆشی لە نزیکەی ڕێگەی ئەلبیزار لە ڕۆژهەڵاتی شارەکە دانرا.

مەراسیم بە خولەکێک بێدەنگی دەستی پێکرد. پاشان هاوسەرۆکی مەجلیسی ئیدارەی مەنبەج و گوندەکانی دەوروبەر محەمەد خێر شێخۆ وتاری پێشکەش کرد و وتی:"خیانەت چەند ناشرینە. پێویستە خیانەتکاران گوێ لەم قسەیە بگرن، بابزانن ئەوانەی خیانەت لە بنەماڵە و وڵاتەکەیان دەکەن، مێژوو لێپرسینەوەیان لەگەڵ دەکات."

محەمەد خێر شێخۆ لە درێژەی قسەکانیدا وتی:"شەهیدانمان چوونە ڕیزی نەمرانەوە، هەموو شۆڕشێک قارەمانی خۆی هەیە، شۆڕشی ئێمەش هەموو ڕۆژێک قارەمان دەبەخشێت."

هەروەها بەڕێوەبەری مەجلیسی بنەماڵەی شەهیدان، مەحمود ئەلعیدۆ وەهای وت:"شەهید بۆ ڕزگارکردنی ئەم وڵاتە و پاراستنی، خۆی فیدا کرد. شەهیدانمان بەردەوام لە دڵماندا دەژین. بەڵێنیان پێ دەدەین کە بەردەوام ڕێبازی ئەوان دەگرینەبەر.

دوای وتارەکان ناسنامەی شەهید محەمەد هۆران خوێندرایەوە و ڕادەستی بنەماڵەکەی کرا.