چەتەکانى داعش ئێوارەى دوێنێ لە ناوچەى هەجین لە دێرەزۆر هێرشێکى قورسیان بۆ سەر سەنگەرەکانى شەڕڤانانی قەسەدە لە نزیک وێستگەى شەمەندەفەری ماهاتا ئەنجام دابوو، کە لەلایەن شەڕڤانانەوە بەرەنگارییان کرا و هێرشەکەیان تێکشکێنراو و دەیانە چەتەشیان لێکوژرا.
سەدان چەتەى داعش ئێوارەى دوێنێ بە تانک و چەکى قورس هێرشێکى گەورەیان بۆ سەر سەنگەرەکانى شەڕڤانان لە نزیک وێستگەى شەمەندەفەری ماهاتا لە ناوچەى هەجینى دێرەزۆر ئەنجامدا.
بەهۆی ئەو هێرشەوە شەڕێکى قورس روویدا و شەڕڤانانى قەسەدە بە گورجی بەرەنگاری هێرشەکە بوونەوە و هێرشەکەیان لە دواى شەڕێکى قورس تێکشکاند. دەیان چەتەى داعش لەو شەڕەدا کوژران و بەلانیکەمەوە تانکێکى چەتەکانیش تەقێنرایەوە.
چەتەکانى داعش بە سوود وەرگرتن لە کەش و هەوای ناوچەکە و لە کاتى روودانى زریانى خۆڵ دا هێرشەکانیان زیاتر دەکەن و هەوڵ دەدەن لەو رێگەیەوە گرفت بۆ پێشڕەویى شەڕڤانان دروست بکەن.
شەڕی چەتەکانى داعش لە کاتێکدایە ئەو چەتانە لە ناوچەکانى کۆبانێ، رەقە، دێرەزۆر، منبج دەیان ناوچەى تری رۆژئاوای کوردستان تێکشکێنراون و هەموو شێوازەکانى شەڕکردنیان و تاکتیکەکانیان لەلایەن شەڕڤانانەوە بێکاریگەر کراوە.
ر.م
