پەروین بولدان هاوسەرۆکی گشتی هەدەپە رایگەیاند، هێرشەکانی دەسەڵاتی ئاکەپە/مەهەپە بۆ سەر گەلی کورد و گۆڕستانی عەلەویەکان و زیندانیان زیادی کردووە و جەختیشی کردەوە کە ئەوان لە بەرامبەر ئەو هێرشانە بێدەنگ نابن.
بوڵدان سەردانی ماڵی جەمی گەزی (ناوەندی عەلەویەکان) کرد کە تەرمی ئەندامی گروپی یوروم کە لە ئەنجامی رۆژووی مردندا گیانی لەدەستدا، برابووە ئەو ناوەندە و رووبەرووی هێرشی هێزەکانی پۆلیس ببووەوە.
لە لێدوانێکدا کە بە ناوی ماڵی جەمی گازیەوە بڵاو کرایەوە، سوپاسی ناوەندەکە ئاڕاستەی هەدەپە کرا کە ئەو بابەتەی خستبووە ناو گۆتوبێژەکانی پەرلەمانەوە. نوێنەر و کەسایەتیەکانیش کە لە ناوچە جیا جیاکانەوە سەردانی ناوەندەکەیان کردبوو، ئەو هێرشەیان ئیدانە کرد و لە بەرامبەر ئەو کردەوانەی دەسەڵات ناڕەزایەتیان دەربڕی.
دواتر بوڵدان وتەیەکی پێشکەش کرد و رایگەیاند، ئەوەی لە بەرامبەر تەرمی ئیبراهیم کرا، هۆشمەندی لایەنگرانی زوڵمە و وتیشی، بێڕێزی لە بەرامبەر شوێنە پیرۆزەکانی کۆمەڵگای عەلەویش کرا.
بولدان تیشکی خستە سەر هێرشەکانی دەسەڵاتی ئاکەپە/مەهەپە بۆ سەر دین و بڕواکان و هاوکات هێرشەکانی دژی زیندانیان و لەم چوارچێوەیەدا ئاماژەی بەو زڵمە کرد کە لە دژی تەرمی دایکی ئایسەل توگلوکیش کرا.
'ئیدی بێدەنگ نابین'
بولدان لە بەردەوامی قسەکانیدا باسی لە هێرشی فاشیستەکان کرد بۆ سەر گۆڕستانەکان و وتی:"ئەمڕۆ بە تایبەت کێڵی گۆڕی رۆڵەکانمان تێکدەشکیندرێن. ئەمەش بەو واتایە دێت کە جارێکی دیکە مردن بۆ کورد بە رەوا دەبینن و لە کەسایەتی ئیبراهیم دا هەمان ئازار و سەختیانە بەسەر هاوڵاتیە عەلەویەکانماندا دەسەپێنن.
شکاندنی کێڵی گۆڕەکانمان، هاوکاتە لەگەڵ هێرشکردنە سەر ماڵی جەمی عەلەویەکان و بێڕێزیکردن لە بەرامبەر ناوەندە پیرۆزەکانی ئەرمەنیەکان. ئێمە ئیدی لە بەرامبەر ئەو هێرشانە بێدەنگ نابین."
بولدان هاوکات ئاماژەی بەوەش کرد، دەبێت دەسەڵات داوای لێبوردن لە کۆمەڵگای عەلەوی و ئەوانەی کێڵی گۆڕی رۆڵەکانیان شکێندران و هێرش کراوەتە سەر تەرمەکانیان، بکات.
ز.ش
