بە پێی ئەو ڕاپۆرتەی بە ناونیشانی سزای لە سێدارەدانی ٢٠٢٤ لە لایەن ڕێکخراوەکەوە بڵاوکراوەتەوە، لە ساڵی ٢٠٢٤دا ١.٥١٨ کەس بە سزای لە سێدارەدان لە سێدارەدراون. ئەم ژمارەش بە بەراورد بە ساڵی پێشتر زیادی کردوە، لە ساڵی ٢٠٢٣دا ١.١٥٣ کەس لە سێدارەدراون.

لە ڕاپۆرتەکەدا هاتووە ٦٣٧ کەس بە تاوانی ماددە هۆشبەرەکان لەسێدارە دراون، ئەمەش دەبێتە لە سەدا ٤٢ی کۆی گشتی لەسێدارەدانەکان. ڕێکخراوی لێبوردنی نێونەتەوەیی ڕایگەیاند کە ئەم کارە لە دژی مافەکانی مرۆڤە.

ئێران، عێراق و عەرەبستانی سعودییە لە ڕیزی پێشەوەن

هەروەها بە پێی ڕاپۆڕتەکە زۆرینەی لە سێدارەدانەکانی ٢٠٢٤ لە عێراق و ئێران و عەرەبستانی سعودییە بووە. ڕاگەیاندراوە لە ساڵی ٢٠٢٣دا لەم سێ وڵاتە ١.٠٤١ کەس، لە ساڵی ٢٠٢٤دا ١.٣٨٠ کەس لە سێدارەدراون. ڕێکخراوی لێبوردنی نێونەتەوەیی دەڵێت؛ لە سەدا ٩١ی لە سێدارەدانەکان لە ئاستی نێونەتەوەییدا لەم سێ وڵاتە ئەنجام دراوە.

هەروەها ڕێکخراوەکە ڕایگەیاندووە کە لە چین، کۆریای باکوور و ڤێتنام، داتای گشتی بە شێوەیەکی گونجاو لە سەرانسەری جیهاندا دەستنیشان ناکرێت، بەهۆی نهێنی دەوڵەت و ئاستەنگەکانی بەردەم وەرگرتنی زانیاری.

ڕووداوی ئەرێنیش ڕوودەدەن

لە ڕاپۆرتەکەدا ئاماژە بە هەندێک دۆخی ئەرێنی کراوە. بەم پێیە زامبیا بەشداری پرۆتۆکۆڵی هەڵگرتنی سزای لەسێدارەدانی نێونەتەوەیی بوو، و زیمبابۆی سزای لەسێدارەدانی بۆ 'تاوانە ئاساییەکان' هەڵوەشاندەوە. هەروەها لە بڕیاری هەڵوەشاندنەوەی بەکارهێنانی سزای لەسێدارەدان، کە لە کۆبوونەوەی گشتی نەتەوە یەکگرتووەکاندا خرایە دەنگدانەوە، دوو لەسەر سێی وڵاتانی ئەندامی نەتەوە یەکگرتووەکان دەنگی بەڵێیان دا.