ڕۆژی پێنج شەممەی پێشوو ٤ ی نیسان، لە مەراسیمێکی فەرهەنگی شکۆداردا لە گوندی دەگاگای هەورامانی ڕۆژهەڵات بە بەشداری نزیکەی ١٥ هەزار کەس لە شوێنە جیاوازەکانی ڕۆژهەڵاتی کوردستان و سەرتاسەری ئێران مەراسیمی هەزار دەف بەڕێوەچوو.

 یەکێک لە سیما جوانەکانی مەراسیمەکە ئەوەبوو کە خەڵکی بە جلوبەرگی کوردیی ڕەنگاوڕەنگ و ئاڵوواڵاوە دیمەنێکی جوانیان بە مەراسیمەکە بەخشی. هەروەها بە پۆشینی ئەو جلوبەرگە کوردی و فەرهەنگییە کولتوریەی کوردستان سەرنجی میوانانی شوێنە جیاوازەکانی ئێران و میوانەکانی دەرەوەشیان بەلای خۆیاندا ڕاکێشا بوو. 

  ئەوەی کە زیاتر بووە جێگەی سەرنجی میوانەکان، بەشداری بەرفراوانی ژنان بوو لە مەراسیمەکەدا هەم بە بەشداریکردنیان لە دەف ژەنیندا، هەم لە پێشانگای کارە دەستی و فۆلکلۆرییەکانی هەورامان و بەرهەم و خواردنەکانی تایبەت بە ناوچەکە.  

 لە مەراسیمەکەدا بە پێی بیناسازیی هەورامان، دەف لێدەرکان لە سەر سەربانی ماڵەکانی گوندەکە ڕیزیان بەست و هونەری خۆیان پێشکەش کرد، کە جۆشوو خرۆشێکی تایبەتیان بە مەراسیمەکە بەخشی.

وا بڕیارە ڕۆژی هەینی ١٩/٤/٢٠٢٤ لە شارەدێی پاڵنگانیش هەمان مەڕاسیم بەبەشداری خەڵکی هەورامانی ڕۆژهەڵاتی کوردستان و دەرەوەی کوردستان بەڕێوە بچێت.

 ئێمە گۆشەیەکی تر لە دیمەنە سەرنجڕاکێشەکانی مەراسیمی هەزار دەفی دەگاگاتان بۆ دەگوازینەوە.

هـ . ب