بە بۆنەو ١و ئایاریوە جەژنەو کرێکاراوە، چند شارێوەنە ئەرەیاونیا ونیاوە و دژو ڕەنجوەری و قەرارو کۆشیا دریا.

دەنیزلی

پلاتفۆرمو ١و  ئایارو دەنیزلیینە بیناو کۆمەڵەو ڕۆنامەوانانە کۆنگرەی ڕۆنامەوانییش بەست، ئەندامو لوجنەو هەماهەنگیی شارەکەینە محەمەد ساریجا ئەرەیاوناش ئامادێ بێنێ ١و ئایارینە خاوەنداریی ونەو نانی و هەرمانێ و ڕەنجو وێما، خاوەنداریین جە یاسێ و مافو وێما، داواو دادپەروەری جە داهاتی و باجی و وەڵاتی مکەرمێ، هەرپاسە بانگەواز وەنەو گەلی کریا پەی بەشداربییەی جە چالاکییەکەو ١و ئایاری.

ئەدەنە

کۆنفیدراسیۆنو سەندیکاکاو کرێکارا و شۆڕشگێڵنا (دیسک)، کۆنفیدراسیۆنو سەندیکاکاو کرێکارە جەماوەرییا (کەسک)، یۆبییەی ژوورو بیناسازا و ئەندازیاراو تورکی، ژوورو دکتۆرا و سەندیکاو پارێزنەراو ئەدەنەی بە درووشمو "دژو هەژاری و ناسڵامەتی و ڕەنجوەری و فشاری، پەی قەوەتکەردەی یۆبییەی و کۆشیای و پەشتیوانی و هومێدی، ملمێنە ١و ئایاریوە"، ١و ئایارینە ڕا پیما.

پی بۆنەوە لەقی سەوزو ئەدەنەی ئەیاوناێوەش واناوە، بانگەوازش جە گرد لاێوە کەرد، ١و ئایارینە  کوێ باوە و کۆشیا.

هەرپاسە ئەندامی سەوز، ئەردال کاراکوش واتش: "پەی وەڵاتێوی یەکسانیوازی و ئازادیوازی و ئاشتیوازی، پەی پێوەژیوای واڵە و برایانەو گەلی و جیاوازییەکاشا دماڕۆنە، مەیدانەکانە بیمێ".

ئەنتاڵیا

لەقو ئەنتاڵیاو سەندیکاو کرێکاراو خزمەتگوزاریی جڤاکی و تەندروسی (سەس) پەی بانگەوازکەردەی پەی  بەشداریی جە ١و ئایارینە ئەرەیاوناێوەش واناوە، بانگەواز وەنەو کرێکارا کریا پەی بەشداربییەی جە ١و ئایارینە؛ ئەرەیاونیا، پەی خاوەنداریی جە ڕەنج و ئازادی دیموکراسی و یەکسانی و ئاشتی گرد لایێ ١و ئایارینە مەیدانەکانە با.

ئێلح

پلاتفۆرمو ڕەنج و دیموکراسی ئێلحی پێوەس بە ئاهەنگو ١و ئایاری، کە پارکو ژەناو ٨ و ئادارینە بکریۆ، ئەرەیاوناێوەش واناوە. ئەرەیاونایەکەنە پانکارت "دژو هەژاری و ناسڵامەتی و ڕەنجوەری و فشاری، پەی قەوەتکەردەی یۆبییەی و کۆشیای و پەشتیوانی و هومێدی، ملمێنە١ و ئایاریوە" ورگیریا. بەشێو جە لایەن و  و ڕێکوزیایەکا ئامادێ چالاکییەکەی بێنێ.

بە نامێ پلاتفۆرمەکەیوە ڕەمەزان بیلمەز واتش: "پەی واتەی ژەنی، ژیوای، ئازادی، پەی چارەسەری دیموکراتیکی و ئاشتیانەو پەرسەو کوردی مەیدانەکانە بیمێ. ئیساتێ وەختو قەوەتکەردەی کۆشیای و هومێدی و پەشتیوانیین".