جە ٢٠ ڕوێ جەی وەڵتەرەوە، دارستانەکێ شارچەو نەوسوڎێ و دەڤەرەکێ تاک درەختی، گریانە، شێخان، پەروینی، شۆشمێ و سەرجەم باغاتەکێ قەڵاگای سەر بە هەرێمو هەورامانو لهۆنی گڕشان گێرتەن. سەرەڕاو هەوڵ و تەقالاکانو مەردومی و ژیوگەپارێزەکێ ناوچەکەی، بەڵام  تا بە ئیسە ئایرەکە کۆنترۆڵ نەکریان و نەکوشنیانەوە و ئێشەو زیاەتەر تەشەنەش کەردەن.
ئێرەکە تا ئیسە سەڎان هکتارێ دارستانێ و دەیان هکتارێ باغێ و لەوەڕگێ ناوچەکەیش دلێنەبەردێنی و کەردێنێش بووڵە.
هاموڵاتیێ ناوچەکەی گلەیێشان جە دەسەڵاتی و کاربەدەسەتەکێ ڕژێمو کۆمارو ئیسلامی ئێرانی هەنێ، چونکە وەرانوەر بە کارەساتەکەی بێباکێنێ و هەوڵ پەی کۆنترۆڵ و ئەوەکوشنای ئایرەکەی نمەڎانێ. هاموڵاتیەکێ وازیارێنێ دەوڵەت بەپەلە هەوڵ پەی ئەوەکوشنای ئایرەکەی بڎۆنە و هاموەخت باغدارێ و خاوەن قەڎەغەکێ قەرەبووی ماددی بکەرۆنەوە.
ژیوگەپارێزێ نەوسوڎێ و هەورامانی داواکارێنێ جە دەسەڵاتو ئێرانی باڵەپڕێ و هەلیکۆپتەرێ تایبەتێ پەی ئەوەکوشنای و کۆنترۆڵکەردەی ئایرەکەی بەکارباوەرۆنە، ئەگینا هەزاران هکتارێ دارستانێ و لەوەڕگایێ و باغێ هەرێمەکەی بە تەمامەتی دلێنەبشانێ.
ئێساڵ وشکەساڵی و بەرزبییەی پلەکێ گەرمای بییەن بە بایسو گڕگێرتەی و سوتەی دارستانەکێ ناوچە جیا جیێکێ هەرێمو هەورامانی و تا ئیسە سەڎان هکتارێشان بەتەمامەتی سوتێنێ و سەڎان هکتارێ تەرێشان زیانمەندێ بیێنێ و هاموەخت ژیوگە و سروشت و جۆراوجۆری گیانەوەرەکانو هەرێمەکەی زیانی فرەشان ونەکەوتەن.