٣٦ هەزار ئیمزۍ دژو قەرارو جە قەنارەدای رۆنامەنوویسا کورڎی پەخشان عەزیزیۍ و چالاکا بوارو مافەکا ژەنا شەریفە محەممەدیۍ به سەرمەشقایەتی یۆبیەی ڕۆنامەنویسا ژەنۍ کوۍ کریێوە.
یۆبیەی ئەرەیاۋنای ژەنا (یەرەژە) ئەنجاموو هەڵمەتەو "نا پەی جە قەنارەدای" کە جە ١٢و ئابو ٢٠٢٤ جە دژو قەرارو دادگاکا ئێرانی پەی جە قەنارەدای ژەنا چالاکا و رۆنامەنویسا کورڎی شەریفە محەممەدیۍ و پەخشان عەزیزیۍ دەسشپنەکەرڎەبۍ، ئەرەیاۋنا.
ئاشکراکەردەی ئەنجامەکا، جە کۆنگرێوە ڕۆنامەوانینە جە باخچەو ۋەننگەو شارو قامیشلۆینە ئەرەیاۋییا.
جە گلێرۆبیەکەینە بەیاننامێوە تایبەت بە ئەنجامو کەمپینەکەی بە زۋانی کوردی و عەرەبی ۋنیاوە.
جە ئەرەیاۋناکەینە یاڎ وزیانۆ کە ژەنا ڕۆنامەنوویسوو هەرێمو سەرنیشت و ۋەرکۆتوو سوریای کە چێرو چەترەو یۆبیەی ئەرەیاۋنای ژەنا (یەرەژە)ینە خەبات مکەرا، ۋەرا ۋەر بە کردەوەکا دەوڵەتو ئێرانی و سزاو جە قەنارەدای سەرو رۆنامەنویس و چالاکا مافو مرۆڤی شەریفە محەممەدیۍ و پەخشان عەزیزیۍ دەسشا بە هەڵمەتەو کۆکەردەیۆ ئیمزۍ کەرڎەن.
جە ئەرەیاۋناکەینە ئاماژە پانەی کریان کە هەڵمەتەکۍ جە ١٢و ئابو ٢٠٢٤ بە دروشمەو "نا پەی جە قەنارەدای" دەسشپنەکەرڎ و قەراربۍ جە ١٩و ئابینە دمایش پنە بۍ، بەڵام بەمەڵامەتوو پێشوازی فرەو دامودەزگا و ڕێکوزیا جەماوەرییەکا ژەناوە، ماوەکە درێژکریاوە و جە (٢٦و ئاب)ی تەمام بیەن.
جە درێژەو ئەرەیاۋناکەینە ئامان کە جە چوارچێوەو هەڵمەتەکێنە، ٣٦ هەزارۍ و ٣٩٨ ئیمزۍ جە لایەنو ڕۆنامەنوویسا، سیاسەتمەدارا، ڕۆشنۋیرا، چالاکا، ئەنداماو ڕێکوزیا مەدەنییەکا، ژەنا و ئەرەمەرزیا یاساییەکا جە هەرێموو سەرنیشتی و ۋەرکۆتوو سوریای، چوار بەشۍ کورڎەسانی، وڵاتا ۋەرکۆتوو مېیامینی پېسە لوبنان، میسر، مەغریب، تونسی و هاموڵاتیا ئەوروپای کوۍ کریێوە.
جە ئەرەیاۋناکەینە ئاماژە پانەی کریان کە ئەنجامو هەڵمەتەکۍ مکیانیۆ پەی فیدراسیۆنی مېیاننەتەوەیی ڕۆنامەنوویسا و ڕێکوزیاکا مافو مرۆڤی و پەیامنێراو بێ سنووری، هەرپاسە ئەرەیاۋییا بەردەوامۍ با جە کار و چالاکییەکاشانە تا بەدیئارڎەی دادپەروەری و هەتا ئا کاتەی دڎان بە دەورو سەرمەشقی ژەنارە جە گلێرگەنە نریۆ.
