گەریلاکاو هەپەگەی، فەداکار یەدیگار وقەهرەمان کۆبانۍ بۊنەو ٤٦ ەمین ساڵەو پەکەکەیۊ پۍ ئاژانسوو هەواڵی فورات (ANF)ی قسېشا کەرڎۍ.

گەریلاو هەپەگەی، فەداکار یەدیگار گەشمەرڎا ئاخېزیش ۋیرئاردېوە و بۊنەو ساڵیاڎوو ئەرەمەرزناو پەکەکەیۆ هەستوو ۋېش ئارڎ زۋان. فەداکار یەدیگار واتش:"ئێمە ٤٦ ساڵەو پارتوو کرێکاراو کوردسانی مبارەک کەرمۍ کە بە حۊڵوو ڕابەر ئاپۆی یاوا پی ئاستیە. سەرەتا جە ڕابەر ئاپۆی، جە هەڤاڵا کە ئینۍ سەنگەروو مدرامانینە، جە زینڎانەکانە مدرامان کەرا، جە گەلە وڵاتپارێزەکەیما سڵام کەرمۍ. ئێمە پېسە ئازاڎیوازاو کوردسانی وەعد بە گەلەکەیما مڎەیمۍ تا دما هەناسە کۊشیایما بەرز کەرمېوە، پەکەکە ماوەو ٤٥ ساڵانە هەزاران گەشمەرڎېش دېنۍ، پەی ژیۋایۍ ئازاڎیی قوربانیېوە قورس دریان، بێگومان ئی مدرامانە بە فیداکاری ڕابەر ئاپۆی دەسش پنەکەرڎ و گەریلاکاو ئازاڎیی کوردسانی درێژە پی نەریتە مدرامانیە مڎا.

ئێمە دژوو دوژمنی جەنگېوە قورس ڕاوەبەرکەرمۍ. جە ۋەران ۋەروو هجومی کیمیاۋیی دەوڵەتوو تورکینە، گەریلا بەئیراڎېوە گۊرۆ مدرامان کەرۆ و چالاکی بەقوەت ڕاوەبەرکەرا. پا بۆنۊ دوژمن ڕووانە هجومەکېش سەروو ئێمە فەراوانتەرۍ کەرۆ، گەریلایچ بە هێزوو مدرامانی کە جە ڕابەر ئاپۆیۊ هورشگېرتەن ڕووبەڕوو ئا هجومە دڕنڎانەیە بۊوە. جە زاپ، ئاڤاشین، مەتینا و خواکوڕک جە فرەو مېڎانەکا کوردسانینە کۊشیایۍ گۊرە بەراڕاوە. ئێمە وەعد بەگەلەکەیما مڎەیمۍ کە ٤٦ ەمین ساڵەو پەکەکەی بە سەرکۊتەی تاجدار کەرمۍ".

حەرپاسە گەریلا قەهرەمان کۆبانۍ ساڵیاڎوو ئەرەمەرزناو پەکەکەیش مبارەک کەرڎوو ئەرەیاۋناش:"بە ئەرەمەرزناو پەکەکەی گەلوو کوردی سەرجەنۊ ژیۋۋاوە، پۍ ئێمە ژیۋایۍ تازە دەسش پنەکەرڎ، بە بەشڎار بیەیما دلۍ پەکەکەینە، ئێمەیچ ۋېما ئشناساوە، سەر جە نۊ جە ئەڎۍ بیەیمېوە، گەلوو کوردی جە لێواروو دلېشیەینە بۍ، بەڵام چنی ئەرەمەرزناو پەکەکەی ئیجارەشا سەرکۊتەی گۊرەش بەدەسئارڎ. پېسە جەنگەوانا ئازاڎیی کوردسانی هێز جە ڕابەر ئاپۆی و مدرامانەکەیشۊ جە ئیمراڵی هۊرگېرمۍ، تا سەرکۊتەی کۊشیای، درێژە بە مدرامانی مڎەیمۍ".