شارو نەوسوڎێ سەر بە هەرێمو هەورامانی یۆن جە ناوچە مەحرومەکانو ئێرانی و ڕژێمو ئا وڵاتەیە هیچ سەرمایەگوزاریێوی ئابوری و پیشەسازی و گەشتیاری ئاوەڎانیش چنە ئەنجام نەڎان. نەوسوڎە سەرەڕاو ئانەیە مەرزێوی میادەوڵەتیش هەن، بەڵام دەرامەتەکەش پەی خەڵکەکەیش نییەن و خێروبێرەکەش پەی خەڵکی تەریەن. وەرو ئانەیە بەشێوی فرە جە نەوسوڎیەکان جە هەژاری و کەمدەرامەتییەنە مژیوانێ کە پشکو شێری جە هەژاری و کەمدەرامەتییەکەی پەی مسیاران و وانکاران.
پەی قەرەبووکەردەی ئانەیە ژمارێو خێرۆمەندێ شارەکەی دەسو هامکاریشان پەی وانکارەکان درێژ کەردەن. جە ئا چوارچوەنە ساڵێ ویەردێ خێرۆمەندێ نەوسوڎیێ ٨٢ ملیۆن تومانێ هامکاری وانکارە کەمدەرامەتەکانو شارەکەیشان کەردەن.

خێروازێوی نەوسوڎی کە گەرەکش نەبێ نامێش وەڵابکریۆوە بە ئاژانسو فوڕات (ANF)یش وات: جە ٨٢ ملیۆن تومانەکەی ٢٥ ملیۆنێش دریان بە ئا وانکارێ و مسیارا کە تووشێ نەوەشی تالاسیمیای بیێنێ و تا جە ڕاشەوە چارەسەرێ بکریانێ.
خێروازەکە ئاشکرش کەرد: هەژاری و نەداری بەشێوازێوی فرە دلێ وانکارە نۆسوڎیەکانە وەڵاوبییەنەوە و دەوڵەت پەی ڕووبەڕووبییەش کار و بەرنامە،و پلانش نییەن، هەر پەوکەی خێرۆمەندێ شارەکەی بە ئەرک و وەرپرسیاری وێشان مەزانان تا بە پاو توانای هامکاری پێشکەش بە وانکارەکان بکەرانێ. 
ئا خێروازە نەوسوڎییە وازیارەن، خێرۆمەندێ نەوسوڎێ و هەورامانی زیاتەر هامکارێ خەڵکی هەژار و نەدارو نەوسوڎێ و هەورامانی ببانێ.