ئەندامە و شاند و ئیمراڵیی پارتو یەکسانی و دیموکراسیی گەلا (دەم پارتی) پەروین بوڵدانە، دما و هورچنییەیش پێسە و یاگەگیرەو سەرۆک و پەرلەمانی، پەی یوەمجاری پەرلەمانش بەرد ڕاوە. پەروین بوڵدانە جە دیوانو پەرلەمانینە قسێش کەردێ.

ئۆندەر یاڏکریاوە

پەروین بوڵدانە، سری سورەیا ئۆندەریش یاڏوستیمێ و ئەرەیاوناش ئۆندەر بە زیهنیەتێوە ڕاوەبەری دیموکراتیک و دادپەروەری جووڵیانۆ، واتش: "نیشانەشدا کە سیاسەت جە یاسا نیارەی زیاتەرا، تاواش گرڏی بە هەستێوە هامبەشۆ گلێر بکەرۆوە. قسەکێش هەمیشە پەی بنیادنیای بێ نەوەک پەی وڕای".

بوڵدانە جەختش کەردۆ، ئۆندەر دەنگو گرڏیماش یاونان پەرلەمان، واتش: "ئار گەلش ئارد پەرلەمان. پەی ساڕێژکەردە و زامە قووڵەکا و بەئێشەکا وڵاتی هەرمانەش کەردە. پۆکەی بڕوای فرێش بە ئاشتی بێ، پەی ئاشتی هەنگامە نیێ و چنی ئاشتیی بێ. پەیامبەرێوە ڕەنجدەر ئاشتی بێ. من شایەتحاڵێوە نزیکە و هەوڵەکا یاری بێنا پەی ئاشتی. هەمیشە بوێر و جدی و ڕەنجدەر و فیداکار بێ".

پەروین بوڵدانە جەختش کەردۆ سەر و درێژەدای بە ئیرادەو ئاشتی، واتش: "ئی ئەرکە پەی من ئەمانەتا نەوەک پلەوپایە. خەونو  ئۆندەری پەی ئاشتی، ڕاو منەنە.

'ئاشتییێ هەمیشەیی، پەنەوازیێ هەنوکەییا پەی وڵاتەکەیما و هەرێمەکەیما'

پەروین بوڵدانە ئەرەیاوناش چی قۆناغە دژوارەنە، مشۆم پەرلەمان پەی بەدیئاردە و ئاشتی جە وڵاتەکەیمانە و هەرێمەکەی وەرپرسیارەتی وێش جابەجێ بکەرۆ، واتش: "ئاشتیێ هەمیشەیی، پەنەوازیێ هەنوکەییا پەی وڵاتەکەیما و هەرێمەکەیما. بێگومان پەی بەردەوامیدای بە ئاشتی و سەر وستە و پرۆسەو چارەسەری دیموکراتیکی، پەرلەمان نامنیشان و هەنگام نییاین. ئێمە تاومێنە ئاشتی و کۆمارو دیموکراتیکی کەرمێنە هەدیە پەی ٨٦ ملیۆن کەسا. هیچ بەربەستێوە وەردەمو  ئی داواکارییەیما نییا".