گلېرۊبیەو بەینو سەرۆک فراکسیۆنەکا دەم پارتی گوڵستان کیلیچ کۆچیگیتې و سەزای تەمەلی چنی وەزیرو دادی یەڵماز تونچی دمایش ئاما. جە گلېرۊبیەکەینە ڕاو چارەسەری پېوەس بە گرفتو زینانەکا تاوتوێ کریا.
گلېرۊبیەو بەینو سەرۆک فراکسیۆنەکا پارتو یەکسانی و دیموکراسیی گەلا (دەم پارتی) گوڵستان کیلیچ کۆچیگیتې و سەزای تەمەلی جە وەزارەتو دادینە چنی وەزیرو دادی یەڵماز تونچی دمایش ئاما. گلېرۊبیەکەی سەعاتێش خواینا، هامواتەواچو کۆمیسیۆنو یاسای و مافەکا مرۆڤو دەم پارتی، ئۆزتورک تورکدۆغان دلې شاندەکەو دەم پارتینە بې.
'ئێمە گرفتۍ زینانەکاما باسکەرڎې'
دماو گلېرۊبیەکەی، سەزای تەمەلی ئەرەیاۋناش گلېرۊبیەکەیما فرە گرنگ بې، واتش: "جە زینانەکانە چڼین گرفتې جدیۍ هەنې. ئێمە ئا گرفتێما باسکەردې. پېوەرە جە بارەو ئا کێشاوە گفتوگۆما کەرد، هەرپاسە جە بارەو گېڵای شۊنەو چارەسەری ئی گرفتارە گفتوگۆما کەرڎ. هیواڎارێنمې وەزارەتو دادی چی ڕوۆ هەرمانەی پەنەوازە و دەمودەسیە بکەرۆ و چارەسەرو گرفتەکا بکەرۆ. ئینە چوارچێوەو گلېرۊبیەکەیما بې. تەئکیدما کەرڎۆ، کە چارەسەرێوە دەمودەسی پەنەوازا. ئاڎێچ واتشا چی ڕوۆ هەرمانە مکەرا. وەزیر ئەرەیاۋناش کە ئاگاڎارې گرفتەکانې. ئێمەیچ داواما کەرڎ بەبێ دماوستەی، ئی مژارە وزیۆ بەرنامەو هەرمانێوە. زینانیا نەوەشۍ پەی ژیۋای و مەنەیۆ ئەوەکۊشا. زینانیې نەوەشې مژاری سەرەکینې. ئێمە سەرنجما وست سەرو ئا پاشێلکارییا کە بیێنې مایې گرفتی پەی گرڎو زینانیا".
