پەژاک ئامادەیی ۋێش پەی سەروستەو هەوڵەکا کەنەکەی پەی یۆگێرتەی لایەنەکا ۋەرکۊتوو کوردستانی ئەرەیاۋنا و واتش: "جوابی ئەرێنی داواکاریەکەو کەنەکەی مڎەیمېوە، یۊبیەی بەینو هێز و لایەنەکا نەتەوەکەیما تەنیا ڕاو وەڵێوستەی دروسو ئەوەکۊشایا."
مەجلیسو پارتو ژیۋای ئازادی کوردەسانی (پەژاک) جە ئەرەیاۋنێوەنە بە ئەرێنی جوابو ئەرەیاۋناکەو کۆنگرەو نەتەوەیی کوردەسانی (کەنەکە)یش داوە، کە چنەشەنە ئاماژە پانەی کریابۍ چی قۆناغەنە گرنگتەرین هەرمانە یۆگێرتەیی و یەکڕیزی کوردان. هەر جە ئەرەیاۋناکەو کەنەکەینە بە تایبەت داوا جە لایەنە کوردییەکا ۋەرکۊتوو کوردەسانی کریان بە جە ۋەرچەم گێرتەی ئاژەو ۋەرکۊتوو کوردەسانی و ئێرانی یۆگێرتەیی و یۆبیەی ۋێشا بارانە ئاراوە.
ئەرەیاۋناکەو پەژاکی پی جۊرەنە:
"پرسو یۊبیەی بەینو هێز و لایەنە کوردییەکا جە گرڎو قۆناغەکا ئەوەکۊشای نەتەوەکەیما جە کوردەسانەنە کە پەی بەدیئامای ماف و ئازادییەکاش لوان ڕاوە، بەردەوام یۊبیەن جە داوا سەرەکییەکا نەتەوەو کوردی. گومانەش چنە نیا یۊگێرتەی بەینو لایەنە سیاسییەکا دەرفەت و هێزێوە زیاتەر پەی ئەوەکۊشای گەلەکەیما مڕەخسنۆ و ڕا گێرۊ جە بە هەدەرلوای توانا و وزەی کۆمەڵایەتی – سیاسی نەتەوەو کوردی.
چی شاڵا دماینە کە فاڕیایەکۍ ناوچەکەنە بە خێرایی ئینۍ پەرەئەساینە و ڕێکوستەیۆ تازەو ناوچەکەی خجڵو متەیراوە و فۆرم هۊرگێرتەین، هامکات پینەیچ دەرفەتێوە پەی نەتەوەکەیما ڕەخسیان کە پێگەو نەتەوەیی ۋێش سەقامگیر بکەرۆ، هەوڵ و ئەوەکۊشای وەشبیەی بیبینێوە پەی جەیۆ نزیکبیەیۆ لایەنە کوردییەکا و جە ئەنجامەنە یۊبیەی بەینیشا ئینا ئارانە. کەسایەتی، مېیان، هێز و جەمۍ ڕێکویۍ چی بەینەنە دەسوەڵێوستەیشا ئەرمانان و پێشنیارو ۋێشا پێشکەش کەردەن. چنی دەسپنەکەردەی جەنگو بەینو ئێرانی و ئیسرائیلی و یاوای بە قۆناغێوە خێراتەر جە فاڕیایەکا، دیسان کەسانێوە بە جەختکەردەیۆ جە رەخسنای وتارەو بیبینو یۆبیەی بەینو لایەنە کوردییەکا ئینۍ هەوڵ و کۆششەنە. بە ۋەرچەمگێرتەی هەرکام چی هەوڵ و ئەوەکۊشایا، کریۆ هەم زیاتەر جە داواو گەلەکەیما بیاومێنە و هەمیچ بیاومې بە رەهەندە تازەکا ئی پەنەوازیە، پۊکەی یاگۍ پنەزانای و رێزگېرتەیا.
پەژاک؛ جەمې پێشنیارێما متێنێرە و بە شێوێوە نویسیا پێشکەشما کەردێنې
پارتەکەما سەرەڕاو رێزگېرتەی جە گرڎو ئی هەوڵ و ئەوەکۊشایا، گەرەکشا بە سەرنجێوە ئەرێنی جە ۋەرا ۋەرو ئی هەوڵانە هەنگامە هۊرگێرۆ و پەی ئینەیچ بە پێشنیارەکاو ۋێش ئی مژارەیە زیاتەر بەرهەمدار بکەرۆ. جە هەمان کاتیچەنە پەی گفتوگۆی چنی لایەنە کوردییەکایچ ئامادەیی ۋێش پەی وەڵێوستەی وتوێژەکا بە مەبەسو یۊگێرتەیی ئەرەیاۋنۆ و چی پەیوەندیەیچەنە جەمې پێشنیارێما متێنێرە و بە شێوې نویسیا پێشکەشما کەردەن، کە واوەی جەختشا سەر مکەرمېوە. هەر پېسە جە بەشەکا تەرو کوردەسانیچەنە دیما، یۊبیەو بەینو هێز و لایەنەکا نەتەوەکەیما تەنیا ڕاو وەڵێوستەی دروسو ئەوەکۊشاین، کە جە دماینە پېوسێنمۍ بە جابەجێ کەردەی ئی مژارە گرنگەی، مژارێوە کە چنی شێوازو دیموکراسی و رۆحو پلۆرالیزمی سەردەمیانەی گونجیۆ. ئەرکو گرڎو هێز و لایەنەکان پەی ئینەی هەنگامە بنیا. سەرنجو پارتیما چی پەیوەندییەنە سەرو بنەماو باوەڕین و کاروەدایۍ تاکتیکی نیا، قسې و کردارما جە ئیساتێنە ئی حەقەتینیە سەڵەمنۆ.
پەژاک؛ پەشتیوان و هامکارو هەوڵەکا کەنەکەینمۍ
چی دماییانە کۆنگرەو نەتەوەیی کوردەسانی ( کەنەکە) بە مەبەسو سازبیەی بینای یۊبیەو بەینو لایەنە کوردییەکا و جە ئاکامەنە یۊگێرتەیی بەینو لایەنەکا ۋەرکۊتوو کوردەسانی و گرڎو کوردەسانی، ئەرەیاۋنێوەش وەڵا کەرڎۆ. کۆنگرەو نەتەوەیی کوردەسانی بەئەزموون تەرین مېیانا جە پەیوەندی چنی هامکاری بەینو هێز و کەسایەتییەکانە و بە گرڎیی دلې نەتەوەو کوردەسانینە و پەی ئینەیچ چڼین نموونۍ ئەوەکۊشایش بە سەرکۊتەیی ڕاوەبەر کەردەن. پارتیما، پارتو ژیۋای ئازادی کوردەسانی سەرەڕاو ئەرەیاۋنای ئامادەیی ۋێش پەی سەروستەی گرڎو هەوڵ و ئەوەکۊشایەکا پەی ئینەیچ، جوابی ئەرێنی بە ئەرەیاۋناو کۆنگرەو نەتەوەیی کوردەسانی مڎۆ. ئامادێنمۍ بە پەشت بینای بە هێز و توانا و دەرفەتەکاما پەشتیوان و هامکارو ئی کۊششەو کۆنگرەو نەتەوەیی کوردەسانی بیمې. هیواڎارێنمې کە ئەوەکۊشایەکې چی پێوەندییەنە بە زووتەرین کات بیاوا ئەنجام، بە دڵنیاییوە ئینە ئینا مەسڵەحەتو گەلەکەیما و گرڎو گەلا ناوچەکەینە بۆ."
