ئا شاندەی ملۆ ئەنقەرە هێلەکێشا پۆشۍ کە سەرشاوە نویسیان 'ڕاپیمای چارەسەریی دیموکراتیک و ئازادی'. جەماوەر لافیتۍ "چارەسەری دیموکراتیک، وڵاتی دیموکراتیک" و "پەی چارەسەری پاگیرێنـمۍ، ئازادی سەرگنۆ" و "ژەنی ژیۋای ئازادی"یشا هۆرگێرت.

جەماوەر بە هەلهەلە و درووشمەکا "بە مڎرامان سەرۍ گنمۍ" و "بژیۋۆ مڎرامانو گەلو کوردی" گەرەکشا بۍ بەرەو مېڎانو شێخ سەعیدی ڕاپیمای بکەرا.

پۆلیس ڕاو ۋەردەمو بیناو دەبەپەیش گێرت و ناستش جەماوەر بوییەرۆ، جەماوەر بە درووشمەکا "بژیۋۆ سەرۆک ئاپۆ" و "بە گیان و ۋنی ئینایمۍ چنیت ئەی سەرۆک" و "کوردەسان مەبۆ بە قەبرسانو فاشیزمی" و چەپڵە کوای ناڕەزایشا ۋەرا ۋەر بە پۆلیسی بەربڕی.

"ئاڎۍ تەنگەتاوۍ بیێنۍ پۊکەی هامکاری چەتەکا مکەرا"

هامسەرۆکۆو دەبەپەی چیدەم کلیچگون ئوچارە سوپاسو خەڵکو ئامەدیش کەرد کە سەرەڕاو ئاستەنگی پۆلیسی خاوەنداریشا جە ۋەرنیشتی کەرد، واتش: " ئڼە تەنگەتاوۍ بیێنۍ جە سوریا و ۋەرنیشتەنە هامکاری چەتەکا مکەرا و هەڕەشێما ۋنە مکەرا. ئێمە پەی چارەسەری دیموکراتیکی و ئازادی ئینایمۍ چۍ. با شمەیچ گەرەکتا نەبۆ  بویندۍ و بژنەودۍ، بەڵام چی وڵاتەنە کورد هەن. چی وڵاتەنە پرسو کوردی هەن، کوردی مڎرامەنکەر هەن. هەر پۊکەی ئێمە ئینایمۍ چۍ و دەنگما بەرز مکەرمێوە".

ئوچارە ئەرەیاۋناش جە سوریانە بە وەکالەتو ناتۆی و تورکیای ڕژێمێوە شەریعەتی بنیاڎ منریۆ، جەختش کەردۆ هێزی هەرە ڕەوا و خاوەن شەرعییەت جە سوریانە ئیدارەو ۋەرنیشتیا، واتش: "شمە بە دەسو ئا چەتا کە نمەزاندۍ سەبای چێش مکەرا، گەرەکتانە جە ڕاو جەنگیۆ ۋەرنیشتی دیزاین بکەردۍ. بەڵام ۋەرنیشت بە فیکرو ئێژا ئۆجالانی شێوەش گێرت. ئانەی جە ئەنجامو ئینەینە شەرعیەتش جە دەسدا، تورکیا و هەیئەو تەحریر ئەل شام (هەتەشە)ی و سوپاو نەتەوەیی سوریای (NSA)ین. ئیرادێوە هەن دەس جە ئازادی هۆرنمەگێرۆ. ئی ئیرادە ماچۆ، پەنەوازا ئێژا عەبدوڵا ئۆجالان ئازاد بۆ".

"پەنەوازا عەبدوڵا ئۆجالان ئازاد بۆ"

چیدەم کلیچگون ئوچارە ئەرەیاۋناش بەپاو یاسا دلێینەییەکا تورکیای مشۆم ڕابەر ئاپۆ ئازاد بۆ، واتش: "ملیۆنان کەسۍ ئینۍ چنی ئێژا ئۆجالانی و مشۆم ئازاد بکریۆ. جە گرڎ شۆنێنە دژو جەنگی، وەرگیری جە چارەسەری دیموکراتیکی و ئاشتی مکەرۆ. ملیۆنان کەسۍ دەسبەردارۍ ئیرادەو ۋێشا نەبێنۍ. ماوەو ٢٦ ساڵان بە ملیۆنان کەسۍ جە دژو گۆشەگیری ئەرەکۊشا. شمە نمەتاودۍ ئینەی نادیدە گێڕدۍ. تورکیا هەوڵو ئەرەگیری مڎۆ. شمە نمەتاودۍ کوردو ۋەرنیشتی و کوردی جە تورکیانە، جە یۆترینی جیا بکەردێوە. هەر پۊکەی ئێمە ئینایمۍ چۍ. ئێمە هەمیشە ۋەرنیشتی پارێزنمۍ".

"مافو ستاتۆو گەلو کوردی، مافێوە ڕەوان"

جە درێژەنە ئوچارە واتش: "مافو ستاتۆو گەلو کوردی، مافێوە ڕەوان. مافو مڏرامانی ڕەوان. جە ئیستەنبوڵنە ڕۆشنویرێ بانگەوازشا کەرد. واتشا "چارەسەرو دیموکراتیکی پرسو کوردی مومکینا. پرسەکە ئڼە تاریخیا، نمەکریۆ پەی دۆڵەتی جیابازیۆنە. بانگەواز جە گردو گەلی و جمیەرو تورکیای مکەرمێ. ڕۆو مردای نییا.ڕۆو ئانەی نییا تاریخی پەی چەتەکا جیابازمێنە. ڕۆو خاوەنداریین جە گەلو وەرنیشتی. با ئی دەنگە شکۆدارەو ئاشتی بەرز بکەرمێوە، ئارۆ ئامەدەنە بیمێ، سەعبێ جە ڕحا، دیلۆک و ئەدەنە، مێرسین و ئەنقەرە، ئی قسا مکەرمێ.

ڕاپیماکەیما، ڕاپیماو بەدیئاردەی ئا ئاشتییەینە، کە ئێژا ئۆجالان بەرۆش ڕاوە. ئەرەکۆشای ئا ژەنە مڏرامانانە دژو داعشی و هاویرەکاشا جەنگ مکەرا. دەنگو گەلو کوردی و ئێزدی و ئەرمەنییەکان کە کۆمکوژێ کریێنێ".

ئوچارە ئاماژەش پانەیە کەرد، دۆڵەت_نەتەوە چارەسەر نییا، بانگەوازش کەرد پەی ئەرەکۆشای پەی سیستەمێوە تازەی، واتش: "ئێمە واچمێ، چارەسەرو دیموکراتیکی مومکینا، ئازادی ئێژا ئۆجالانی هەنگامێوە گرنگا بەرەو چارەسەری دیموکراتیکی. ئەرەکۆشایما بەردەوام بۆنە. قەولما بە ژەنا دان، قەولما پا کەسا دان ژیوایشا پەی ئەرەکۆشای ئازادی کوردی تەرخان کەردەن، پەی ئانیشا ڕۆڵەکێشا جەدەس دێنێ. ئانەی ڕەوایەتی مڎۆ بە وڵاتی، ئاشتییێ شکۆدارا. تا بەدیئاردەی ئاشتی و ئازادی ئێژا ئۆجالانی، درێژە بە ڕاپیمای مڎەیمێ".

ئەوەمەنڏەو چالاکی ئەرەنیشتا، بە چەپڵێ و هەلهەلە ئا شاندە ڕایێ کریێ کە قەرارا بلا ئەنقەرە.