ڕاپیمای گەورەو ئازاڎیی کە پەی ئازاڎیی جەستەی ڕابەروو گەلوو کوردی عەبدوڵا ئۆجالانی و چارەسەرکەردەی  کێشە سیاسییەکاو کورد بە ڕای دیموکراتیکە، ڕۆو پەنەجەمینە بەردەواما. قۆڵوو ڕاپیمایەکەی کە قەرسۆ دەسش پەنە کەردەبێ، یاوا ملازگر و خەڵک وەڵێ بارەگاو دەم پارتی-ینە خێرامایشا کەردێ.

هامقسەکەروو هەدەکەی و پەڕلەمانتاروو دەم پارتی جەنگیز چیچەک قسێش کەردێ و واتش؛ یەکسانی، دادپەروەری و یاسا ئینێ دۆخێوە خراپنە، هەرپاسە چیەک باسوو ئانەیش کەرد، وەڵات بە فشار و ستەم ملۆ ڕاوە و واتش پەی پارێزنای ئازاڎی، یەکسانی و دادپەرەوەری کەوتێنێ ڕا.

چیچەک پێسە درێژەش بە قسەکاش دا: "وەختێ باسوو چارەسەری دیموکراتیکوو کێشەکاو کوردی کەرمێ، حەقیقەتێوە هەن. گەلوو کوردی بەڕێز ئۆجالانی پێسە ڕابەروو وێش و تاکە موخاتەبی موینۆ. دژوو گرد نۆعە گۆشەگیریێوەنمێ. وەڵێ ساڵانێ و وەختوو پرۆسەو ئاشتیینە، ملوێنان کەسێ، بە ئیمزاوە بەڕێز ئۆجالانشا پێسە ڕابەری قبووڵ کەرد. نیشانە مڎەیمێ کە حەقیقەت چێشا. ئی ڕێ ڕاو حەقیقەتینە ومەبارەکەنە. بەڕێز ئۆجالان ڕابەروو گەلوو کوردین. پەی ماڕای سیستموو ئەشکەنجەو ئیمراڵی ڕا پیممێ، سەکەوتەی پەی ئانیشان پەی ئازاڎیی کەوتێنێ ڕا".