"ڕاپیمایی ڕێزگێرتەی وەنەو ئیرادەی" کە پارتوو یەکسانی و دیموکراسیی گەلا (دەم پارتی) دژوو دەسملەرەگێرتەی ئیرادەی دەسش پەنە کەرد، یاوا ئەنقەرە. ڕاپیمەرێ خێرامای گەرمشا کریا، سەرەڕاو قۆرتەکاو پۆلیسی ئەرەیاونایشا واناوە.

پەرلەمانتارەو دەم پارتی جەیلان ئاکچا واتش پەی مافوو هورچنیەی و ورچنیایا ڕاپیمای مکەرانە، واتش: "کۆمارێوی یەکسان و ئازاد و دیموکراتیک پەی گرد لایێوە موازانێ".

ئاکجا واتش کۆشیایشا دژوو سیستموو قەیومی بەردەوام مبۆنە و واتش گردما جە ڕاو کۆشیایوە ئازادێ مبیمێ.

پۆلیس هجوومش کەرد سەروو ڕۆنامەوانا

دماو قسەکاو چالاکیی ئەرەنیشتەی، جەماوەر گەرەکشابێ تا وەردەموو بیناو دەم پارتی ئەدەنەی ڕاپیمای بکەرا، پۆلیس ئەرەیاوناش ئەگەر درووشمێ بەرزێ بکریاوە دەس وزانە دلێ، دماو بەرزکەردەیوە درووشما لاو جەماوەریوە، پۆلیسەکێ هجوومشا کەرد سەروو جەماوەری، چند کەسێو کە دلێشانە ڕۆنامەوانێچ بێنێ پۆلیسی دێ وەنە.

جەماوەر سەرەڕاو ئاستەنگیی پۆلیسی تا وەردەموو بیناو شارەکەی ڕاشا پیما.