وانەنە "ڕاپیمایی ڕێزگێرتەی وەنەو ئیرادەی" بەرەو جولەمێرگ دەسش پەنە کەرد و ٦ ڕوێ بەردەوام مبۆ. هامسەرۆکوو دەم پارتی تونجەر باقرخان واتش: "بە ڕەتکەردەیۆ و فشار و نکۆڵی هیچ جارێوە و هیچ یاگێوە کوردستانینە فرسەتتا نمەبۆ".
٣ێ حوزەیرانینە شارەوانیی جولەمێرگی دەسش ملەرە گیریا، دژوو ئینەیە ئەمە، ڕاپیمایی "ڕێزگێرتەی وەنەو ئیرادەی" دەسش پەنە کەرد و بەردەواما. ڕاپیمایەکە مەڕمەڕە و ئەگێنە دەسش پەنە کەرد، ئەنقەرەنە و ئەدەنە و ئێلح و ئامەدنە بەردەوام بی، ئارۆ یاوا وان. ئارۆ چی چوارچوەنە، وانەنە ڕاپیمایێوی ٦ ڕوە بەرەو جولەمێرگنە دەسش پەنە کەرد. ڕاپیمەرێ وانەنە بە شێوەی جەماوەری خێرامایشا وەنە کریا، پەی ماوەو ٦ ڕوا بەینوو وان-جولەمێرگینە ڕا مپیما.
وەڵێ ڕاپیمایەکەینە پارکوو موسا عەنتەرینە ئەرەیاونایەکەی ونیاوە. هاسەرۆکی گردینوو دەم پارتی تونجەر باقرخان و پەرلەمانتارێ و نوێنەرێ ڕێکوزیایەکا بەشدارێ بێنێ. پانکارتێ و درووشمەکێ دژوو دەسملەرەگێرتەی ئیرادەی بەرزێ کریێوە.
باقرخان واتش هیچ یاگێوی جیهانینە بە داواو "ڕێزگێرتەی جە ئیرادەی" ڕاپیمای نمەکریۆ، ئینە شەرما پەی وەڵاتەکەی.
باقرخان ئاماژەش پانەیە کەرد دماو ئانەیە گەل ئیرادەو وێش ورچنیەینە نیشانە دا، ڕێز چی ئیرادەیە نەگیریا، ئینە یاگێ شەرمینە، واتش: "ئەگەر شمە ڕێز جە ئیرادەی نمەگێردێ، ئا گەلە ڕاوەبەرەکێش ورچنیێنێ، خاوەنداریی وەنەو ئیرادەو وێش مکەرۆ".
باقرخان داواش کەرد دەسملەرەگێرتەی شارەوانیی جولەمێرگ دماییش بێ و محەمەد سدیق ئاکیش ئازاد بکریۆ،واتش: ""بە ڕەتکەردەیوە و فشار و نکۆڵی هیچ جارێ و هیچ یاگێوی کوردستانینە فرسەتتا نمەبۆ".
دمایی ڕاپیمایە ٦ ڕۆییەکە دەسش پەنە کەرد. جەماوەر بە درووشموو "ڕا بە قەیوم نمەدەیمێ" و "جولەمێرگ هینوو ئێمەن" دەسشا بە ڕاپیمای کەرد.
چەمەڕوان مکریۆ ئارۆ ٢٠ کیلۆمەترێ ڕاپیمای بکەرا و بیاوا مەنتێقەو پایزاوای.
