ئا ژەنۍ کە شایەتۍ ئێرکۊتەیۆکا بێنۍ ئەرەیاۋناشا، سەروازەکۍ ڕاشا چا کەسا گێرتە کە ئامێبێنۍ پەی یاردەی ئا دەگایا کە بەمەڵامەتوو ئێرەکەیۆ زەرەرشا ۋەرکۊتەبۍ، واتشا: "نە ئاوی و نەکارەبا نمەڎا بە دەگایەکاما. ساڵانێوەن ئی زوڵمەما چنە مکەرا.
دووۍ حەفتۍ سەرو ئێرکۊتەیۆکەو چناری و شەمرەخینە ۋییەرۆ، بەڵام کاریگەرییەکێش و ماتەمینی گەلوو مەنتیقەکەی بەردەواما. جە دەگایەکانە هەڵای گرفتوو واردەی هەن، نەبیەی ئاوەو واردەیۆیچ گرفتێوە گەورەن. ژەناو ئەرەنیشتۍ دەگاو (تۆبین)ی باسشا جە ڕووەدایەکا دماو ئێرکۊتەیۆکەی کەرد و سەرنجشا وست سەرو گرفتوو ئاو و کارەباو دەگایەکا.
ژەنی ئاماژەشا پانەیچ کەرد، دماو ئێرکۊتەیۆکەی سەرەڕاو گرڎوو هەوڵەکا ئاوی نەدریێنە بە دەگاکێشا و واتشا: "ماوەو چن ڕووێوەن ئاوی و کارەباشا نەڎێنمۍ پنە. زیاڎ جە مانگێوەن ئاوەو دەگایەکا بڕیێنە. ئایا ئینە مافا؟ دلۍ گرڎوو زەمینەکامارە کۊڵەکۍ کارەبۍ کیشیێنۍ. گرڎما دیما کە ئێرەکە جە کۊڵەکۍ کارەباکێوە کۆتۆ. با تاوانەکا نەوزا ملوو گەلی. ڕووانە کارەبا و ئاوی مەڎریۆنە بە دەگایەکاما. ئاوی جە دەگایەکا تەریوە مارمۍ پەی واردەیۆ. گرڎوو ئا ئامېراما کە بە کارەبا کار مکەرا سۆچانە بە مەڵامەتوو ئانەی بەردەوام کارەبا بڕا. بە تەنکەر ئاوی مارمۍ، ئاوەو تەنکەرەکایچ پاکە نییەنە و ژەعراوییەنە و زاوڵەکېما نەوەشۍ گنا. تەنیا جە کاتوو هۊرچنیەینە سەردای گوندەکا مکەرا، دماو هۊرچنیەی کەس گرنگی بە ویست و دواکاری دەگا نشینا نمەڎۆ ، پەنەوازا چی کاتۆ ئیتر کەس نۍ داواو دەنگی جە ئێمە بکەرۆ.
حەرپاسە ژەنا باسوو ئانەیچشا کەرد، جە کاتوو ئێر کەوتەیۆکەینە نە ئەمبولانس و نە ئامێرۍ ئێر کوشنایۆ نەبیێنۍ و دماتەریچ نامۍ دەموو خەڵکیوە، فرەو کەسا بە مەڵامەتوو ئێرەکەیۆ ژیۋایشا جە دەسدا و یا زامڎارۍ بیۍ، حەرپاسە ئا کەسۍ کە گەرەکشا بۍ بەیا و هامکاری گەلی بکەرا ڕاشا ۋنە گیریۍ، بەتایبەت سەروازەکۍ ڕاشا وستەرە و ناستشا کەس بۍ دەموو گەلیوە. ئایا ئینە داخە نییەنە کەوتێنمۍ ئی ئاژۆ؟"
