"ڕاپیمای ڕێزگێرتەی جە ئیرادە"و دەم پارتی ٣ی حوزەیرانینە دژوو دەسملەرەگێرتەی شارەوانیی جولەمێرگی، ٧ ڕوێن بەردەواما. ڕاپیمەرێ، دلێشانە هامسەرۆکی گردینوو پارتوو هەرێمە دیموکراتیکەکا (دەبەپە) کەسکین بایندەر، یاوا دۆڵەو زاپی. گرووپوو ژەنە فێمینیستا و شاندێوە جە جولەمێرگۆ وەردەموو پردەو گەنجە شۆڕشگێڵنانە خێرامایشا وەنەو ڕاپیمەرا کەرد، درووشموو "بژیوۆ مدرامانوو جولەمێرگی" و "بژیوۆ مدرامانوو زیندان"ی بەرزێ کریێوە.

"کۆشیایما بەردەوام مبۆنە"

هامسەرۆکەو دەم پارتیی جولەمێرگی گوڵشەن کورتە سپاسوو بەشداراش کەرد، دمایی هامسەرۆکوو دەم پارتی جولەمێرگی قادر شاهین قسێش کەردێ، تیشکەش وستە سەروو گرنگیی ڕاپیمایەکەی و واتش: " تا دماییئامای دەسملەرەگێرتەی ئیرادەی کۆشیایما بەردەوام مبۆ. دەسملەرەگێرتەی شارەوانیی جولەمێرگی یانێ دەسلەرەگێرتەی گردوو شارەوانییەکا. پەوکای ئێمە دژوو ئی دەسملەرەگێرتەیە چەنی گەلەکەیما درێژە بە کۆشیای مدەیمێ".

"وەختوو بییەی بە دەنیزین"

پەرلەمانتارەو دەم پارتیی چیچەک ئۆتلووە واتش: " دەنیز گەزمیش و هامڕێکێش پەی پەشتیوانی  جە واڵەوبراڵەیی گەلوو کوردی و کۆشیای ساکینەکا ئامێ ئێگە. چا وەختەنە پردەو بۆگازیچی وەش کریێ،  وەراوەروو ئانەینە دەنیزەکێ چێگە پردەو واڵەوبراڵەییشا وەشە کەردە. دەنیز ئاما وێ تا کورد قڕ نەکریۆ و دلێنە نەشۆ. ئیساتێ وەختوو ئانەیە ئامان گردوو تورکیای بۆ بە دەنیز. پی کۆشیایە جە دەنیزەکاما ورگێرتەن، فاشیزمی مدرنمێ. بژیوۆ واڵەوبراڵەیی گەلا".

"چارەسەر ئینا ئیمراڵیینە"

پەرلەمانتاروو دەم پارتی محەمەد زەکی ئیرمەز واتش، ئینە یەرەمین جارا ئیرادەما دەسش ملەرە مگیریۆ هەرگیز یاگێ قبووڵکەردەی نییەن، واتش: "ئینە ١٠٠ ساڵێن ئیرادەو کوردا پەشتگۆش موزیۆ و پەرسەو کوردی بە هیچ جۆرێوە چارەسەر نمەکریۆ. موچیۆ چەنی سەرۆککۆمار ئەسەدی جەمێ مبانێوە، بەڵام چارەسەر ئینا ئیمراڵیینە. حەرچی بکەرا نمەتاوانە ئیرادەو گەلوو کوردی بماڕانە. گەلەکەما گرد مەیدانێوەنە مدرامانی گەورە مکەرا".

ژەنی سەروو پردەو گەنجاوە پانکارتێشا ورواستێ و سەرەمڕ درووشموو "ژەنی، ژیوای، ئازادی"یشا بەرز کەردۆ، دمایی ڕاپیمەرێ بەرەو جولەمێرگ کەوتێ ڕا.