ئەرەیاونای ئازادیی ژەنێ (ڕاژن) دەربارەو هجووموو دەوڵەتوو تورکی سەروو ڕۆنامەواناو چاپەمەنیی ئازادی بە ئەرەیاوناێوە ئا هجوومشە شەرمەزار کەرد و واتش: "جە کەسێتیی گەشمەردە گولستان تارێنە گردو گەشمەرداو چاپەمەنیی ئازادی یادێ مکەرمێوە وسەروو ئی بنەمێوە کۆشیای گولستانێ و گردوو گەشمەرداو چاپەمەنیی ئازادی بکەرمێ بە بنەماو خەباتی و کۆشیای ئازادی و یەکسانی. کۆشیایشا پەیما بۆ بە ڕۆشنایی هێزی و یادەوەری و حەقیقەتی."

ئەرەیاونایەکە باس جە هجوومەکاو دەوڵەتوو تورکی و پەدەکەی مکەرۆ پەی سەروو ڕۆنامەوانا و ماچۆ:" هامرێما گولستان تارا و هێرۆ بەهادینە بیێ بە ئامانجوو هجوومەکا، هامڕا گولستان تارا ساڵەو ٢٠٠٠یوە، پێسەو کارمەندەو میدیای ئازادی فرەو بوارانە خەباتش کەردەن و سالەو ٢٠١٨یچۆ پانیشتوو کوردسانینە هەرمانە مکەرۆ، گردوو وەختوو وێشپەی دۆخوو ژەناو کوردی پانیشتوو کوردسانینە و ئاشکراکەردەی ڕاسیی هجوومەکاو دەوڵەتی ئەرەگیروو تورکی و خیانەتەکاو پەدەکەی پەی ڕای گردینی تەرخان کەرێ.

درێژەو ئەرەیاونایەکەینە ئامان، هیرۆ بەهادینە پێسەو ڕۆنامەنویسیوە گەنجێ ئەرەیاوناینە هەرمانە کەرێ، ئی دووە هامرێما ئارۆ بیێ بە ئامانجوو هجوومەکاو دەوڵەتوو تورکی و گەشمەردێ بیێ، ئی ڕووەدایە فرە خەمبارێش کەردیمێ و سەرەوەشی پەی بنەیانەکاشا و هامڕایاشا جە ئەرەیاونای ئازادەنە و گەلوو کوردی مکەرمێ.

خەباتوو ئازادیی ژەنا بە قۆناغێوی گرنگەرە مویەرۆ،لاێوە تەرۆ سیستموو سەرمایەداری و سەردەسیی پیای، بەتندی هجوومێ مکەرۆ سەروو ژەنا. هەرمانەو میدیای ئازادو ژەنانە کە دژوو ئی هجووما خەبات بکەرا و زهنیەتوو دەوڵەتوو پیای بەربوزا، فرە هامڕێ ژەنی ڕۆنامەنویسێچما، جە وەختە فرە دژوارەکانە بە خەباتوو ئازادی جوابو وهجوومە کۆکوشییەکاشا داوە. ئارۆیچ مشۆم ئێمە ئی هەرمانێ و وەرپەرسییشا بیاونمێ یاگێ. هامڕا ولستان تارا و گردوو گەشمەرداو میدیای ئازادی تا ئی خەباتە بەردەوام بۆ و بیاوۆ بە سەرکەوتەی، دەسسا وەرنەدا جە گێڵای شۆنەو ڕاسییرە، ئێمە پیسەو میدیای ئازادوو ژەنا، ئارۆ یاگێ ئادیشانە ئی خەباتەیە مکەرمێ.

هامڕێما گولستان تارا نە تەنیا ڕۆنامەنویسە بێ، بەڵکوم ڕاسیی ڕۆنامەگەریی ئازادینە شۆڕشگێڵنەیچ بێ، ڕۆنامەنویسیوە کە پەی بەرژەوەندیی گەلەکەیشا ویرێ مکەراوە و پەی ئازادیی گەلەکەیشا ڕۆنامەگەری مکەرا، بێگومان شۆڕشگێڵنێچەنێ. پێسەو میدیای ئازادی ئێمەیچ پێسەو هامڕایاما ئەرەیاونای ئازادمانە، دژوو هامکاری و خیانەتوو پەدەکەی مدرمێوە و پێسەو گوڵیستان تارێ، نوژیان ئەرهان، دەنیز فوراتێ و فرەو هامڕایای تەریما کە چی ڕێنە گەشمەردێ بیێ، ئی بێڕێزییە بێدەنگ نمەکەرمێ و خەباتیما بەردەوام مکەرمێ.

سەروو ئی بنەمێوە خەباتوو گولستانێ و  گردوو گەشمەرداو میدیای ئازادی مکەرمێ بە بنەماو هەرمانێ و خەباتوو ژیوای ئازادی و یەکسانی. خەباتشا پەیما بۆ بە ڕۆشنایی هێزی و باوڕی و ڕاسیی. خەباتوو میدیای ئازادینە حەرگیز جە فشاری و گێرتەی و هەوڵەکاو بێدەنگکەردەی نمەگێڵمیوە، ئی هەڵوێستەما خەباتوو گولستانیوە فێڕێ بییەیمێ و ئی هەڵوێستەیە درێژە مدەیمێ پەنە، بە هومێد و باوڕوو ئانەیوە، کە خەبات و ئازادیی ژەنا بە فەلسەفەو 'ژەنی، ژیوای، ئازادی'ی سەرمگنۆ و خەباتوو ڕاسی جە گرد وەختێوە زیاتەر بەرز مکەرمێوە.

پی باوڕۆ ئێمە یادوو گولستان تارێ و گردوو گەشمەرداو ئەرەیاونای ئازادی، یاد مکەرمێوە و وەعدوو گەشمەردا ئەوەخوای مکەرمێوە.