پارێزنەر فەرید سیدار ئانەش وست ڕووە کە دۆخو ڕابەر ئاپۆی گونجیان پەی ئیسفادەکەردەی جە مافو هیوای و باسش چانەیە کەرد ڕاگیری کەردەی چانەی هەرمانێوە نایاساییەنە.

هامسەرۆکو لقو ئامەدی گلێرگەو مافناسا پەی ئازادی (ئۆهەدە) فەرید سیداری قسێش پەی ئاژانسو هەواڵو فوراتی (ANF) کەرد و یاڏش وستیمێ، کە مافو هیوای جە ڕووەو یاسایی و گەردونییۆ پێسەو یاگە گیرێ پەی سزاو مەرڏەی نریارە کە سزێوەنە جە دژو مافەکا مرۆڤی. سیدار باسش چانەیە کەرد کە جە ئەنجامو ئەرەکۆشاو چنین ساڵەینە ژمارێوە فرە وڵاتێ بە تایبەتی جە ئەوروپانە سزاو مەردەیشا قەدەغە کەرد.

پاڕێزنەر سیدار جەختش پەی سەرو خاڵەو دووەمو پارێزناو مافو ژیوای جە پەیماننامەو مافەکا مرۆڤی کێشا.

مشۆم سەرجەنۊ سزاکێ هۆرسەنگنای و لوایۆپۊرەیشا پەی کریۆنە

هامسەرۆک سیدار باسش چانەیە کەرد مشۆم حکومەتو تورکیای جە بارەو ڕابەر ئاپۆیۊ پرۆسە و ڕاوجا یاساییەکا جابەجێکەرۆنە و واتش، "دۆخو سزێ و هەلومەرجو سزانیارەی عەبدوڵا ئۆجالانی جە رووەو یاسایی بوارێوە گونجیێ و جەباری مڕوخسنۆنە، پەی ئانەی ئیسفادە جە مافو هیوای هۆرگیریۆنە، بەڵام ئانە بە کردەوە جابەجێ مەکەرۆ. تورکیا رێکارە یاساییەکا جابەجێ مەکەرۆ".

سیدار ڕۆشنشکەردۆ بە پاو دادگاو مافەکا مرۆڤو ئەوروپای چنین مەڵامەتێ هەنێ پەی ئانەی سزاو زینانی هەتا هەتایی بە پاو خاڵەو یەرەمی لواشۆنیش پەی کریۆنە، "بە پاو ئانەی دەرفەت هەن کە هەم ئازاد کریۆ، هەمیچ سزێکێ سەرجەنۆ هۆرسەنگیۆ. ئەر سزاو زینانی هەتاهەتاییش پەی بڕیۆوە و دەرفەتو ئازادکەردەو مەرجداریش نەبۆ، ئانە بە ماناو ئانەی مێ سەپناو ئا سزێ گۆشەگیرییا و قەرارێ نامرۆڤانەن. جە ئەساسەنە مشۆم ئا زینانیێ سزاو زینانی هەتاهەتایشا پەی بڕیۆوە، مشۆم ئارێچ جە مافو ئازادکەردەی مەرجداری سوودمەندێ بانە، بی جۆرە تایبەتمەندو وڕنای سزێکێ جە دژو شکۆمەندی مرۆڤەکا متاویۆ سەرڕاس و هەموار کریۆوە. وەرو ئانەی تێکەڵبیەی بە گلێرگەی و ئازادکەردەی پێوەرە بینیێنۍ."

سیدار ئاماژەش پانەیەکەردەن کە دادگاو مافەکا مرۆڤی ئەوروپانە ئانەش دەسنیشان کەردەن کە هەر وڵاتێوە ئەندام بەپاو تایبەتمەندییەکا وێش تاوۆنە کاتو ئیسفادەکەردەی جە مافو هیوای دیاری بکەرۆنە، بەڵام ئا ماوە مەبۆنە ئنە درێژ بۆنە، کە مافو هیواو مرۆڤەکا جەبەینبەرۆ.

باسش چانەیەکەرد کە بە پاو قەرارو ئەرکەکا کۆمیتەو وەزیرانو ئەنجومەنو ئەوروپای مشۆم تورکیا سەرڕاس کەردەیۆ یاسێ کەرۆ، کە فاڕیایی ئەساسی ئەنجام دۆنە و رێکاری جا جۆرە گیریۆنەرەوەر تا سزاو زینانی هەتاهەتایی تنکریا نەمەنۆ.

'مشۆم فاڕیای یاسایی بکریۆ'

سیدار ئەرەیاوناش، جابەجێکەردەو مافو هیوای پاسە وازۆ کە تورکیا بە پاو قەرارەکەو دادگاو مافەکا مرۆڤو ئەوروپای یاساکاش هەموار بکەرۆنە، بە تایبەتی بە پاو قەرارو 'ئۆجالانی ٢'، هەر چا بارۆ زیاتەر واتش: "جە چوارچێوەو هەموارکەردەکەینە مشۆم ئا کەسێ تورکیانە سزاو زینانی هەتاهەتایشا هەن میکانیزمی تایبەتشا پەی دیاری بکریۆنە پەی ئانەی بە پاو مافو هیوای ئازادۍ بکریا".