بابل؛ هجوومی ئاسمانی کریا سەروو هێزەکاو حەشدی شەعبی
جە سەرنیشتوو پارێزگاو بابلینە جە عێراق هجوومی ئاسمانی کریا سەروو بنکېوە سەروازی هێزەکاو حەشدی شەعبی، ئەمریکایچ ڕەڎش مکەرۊوە کە پەشتەو ئا هجوومویۆ بیەبۆ.
سەرسەعبوو ئارۊی شەممە دەنگوو ئەوەتەقایۍ بەقوەتی جە بنکېوە هێزەکاو حەشدی شەعبینە جە پانیشتوو بەغڎاینە ژنەوییا، بە واچەو دووۍ سەرچەما ئەمنی عێراقی کە قسېشا پەی ئاژانسوو رۆیتەرزی کەردێنۍ، ئا ئەوتەقایە جە ئاکاموو هجوومی ئاسمانی فڕۆکەی نەشناسیاینە بیەن.
باسشا چانەیچ کەردەن، هجوومەکە هیچ زەرەرېوە گیانیش چنە نەکۊتەنۆ، بەڵام زەرەری فرەی مادیش دان.
جە لېوەتەرۆ، سەرچەمېوە جە وەزارەتوو دلېینەو عێراقی بە ئاژانسوو هەواڵوو فەرەنسایش ئەرەیاۋنان، کە بەمەڵامەتوو ئا بۆردومانەیۆ کەسێوە کوشییان و هەشت کەسېچ زامڎارۍ بیێنۍ.
جە لېوەتەرۆ حەشدی شەعبی جە ئەرەیاۋنېوەنە ئاماژەش پانەی کەردەن، کە بنکەو کالسۆی هێزەکاشا جە سەرنیشتوو بابلیەنە کریان ئامانج و جگە جە زەرەرۍ فرەی مادی، چن زامڎارێوەش چنە کۊتېنۍ.
ژمارېوە جە میدیاکاو نزیک جە حەشدی شەعبی ئەمریکاشا بە ئەنجامدای ئا هجوومەیە تۆمەتبار کەردەن، بەڵام فەرماندەیی هێزەکاو ئەمریکای جە ۋەرکەوتوو دلېڕاسەینە (سێنتکۆم) ئا تۆمەتېشە رەڎۍ کەردێنۍ.
سێنتکۆم جە ئەرەیاۋنېوەنە کە جە ڕاو هەژمارەکاشۆ جە تۆڕەکۆمەڵایەتیەکانە وەڵاش کەردەنۆ، ئاماژەش پانەی کەردەن، "ئاگاڎارۍ ئا گوزارشتانمۍ کە بانگەشەو ئانەی مکەرا ئەمریکا هجوومە ئاسمانیەکەو سەرسەعبوو شەممەیش ئەنجامدان. ئا گوزارشتۍ دوورېنۍ جە راسیۆ و ویلایەتە یۊگېرتەکۍ ئەمریکای ئارۆ حیچ هجوومېوە ئاسمانیشا جە عێراقەنە ئەنجام نەڎان".
هجوومەکە کەمتەر جە ٢٤ سەعاتا دماو هجوومەکا سەروو چن مەنتیقېوە ئێرانی مۍ، کە ئیسرائیل بە ئەنجامدایشا تۆمەتبار مکریۆ.
حەشدی شەعبی جە ژمارېوە گروپی سەروازی نزیک جە ئێرانی پێکئامان و جە ساڵا ۋییەردەینە چنڎین کەرەتۍ هجوومی هامشێوە کریان سەروو بنکە و بارەگاکاشا.
