بانە؛ کۆڵبەرێوە خەڵکوو سەڵماسی کوشییا
جە ئاکاموو تەقەو هێزەکاو دەوڵەتوو ئێرانی جە سنووروو بانەینە، کۆڵبەرێوە خەڵکوو شاروو سەڵماسی کوشییا، نەوسوڎەیچەنە کۆڵبەرێوەتەر زامڎاربی.
بە پاو هەواڵێوە کۆڵبەر نیوزی، هێزی یەرە شەممە هێزەکۍ دەوڵەتوو ئێرانی جە مەنتیقە سنوورییەکاو بانەی سەر بە پارێزگاو سنەی جە ۋەرکەوتوو کوردسانی تەقەشا جە ژمارێوە کۆڵبەرا کەردەن و پا مەڵامەتۆ کۆڵبەرێوە کوشییان.
ئانەیچ وزییان ڕووە، ئا کۆڵبەرەی کە کوشییان، نامێش شۆڕش خەرگوشی، تەمەن ٣٣ ساڵا، خەڵکوو دەگاو زاویە جیکی سەر بە شاروو سەڵماسین جە پارێزگاو ورمێ.
هەر هێزی جە سنووروو نەوسوڎۍ سەر بە پارێزگاو کرماشانیچ هێزەکۍ دەوڵەتوو ئێرانی تەقەشا جە کۆڵبەرا کەرڎ و پا مەڵامەتۆ کۆڵبەرێوە بە نامۍ ئەمیر ئیلاهی تەمەن ٢٥ ساڵی زامڎاربی.
بەپاو ئامارەکا ئا سەرچەمەیە جە ساڵەی ویەردېنە جە مەنتیقە سنوورییەکاو ۋەرکەوتوو کوردسانینە لاو کەمیۆ ٣٢ کۆڵبەرۍ کوشیێنۍ و ٢٦١ کۆڵبەرێچ زامڎارۍ بیېنۍ، کە فرەیشا بە تەقەی راسەوخۆو هێزەکاو دەوڵەتوو ئێرانی بیەن.
بە پاو شۊنیرە لووای ئاژانسەکەیما ساڵەی ویەردۍ وناویتەرین ساڵە بیېنە پۍ کۆڵبەرا جە ١١ ساڵی ویەردەنە و هەردووە مەنتیقە سنووری بانەی و نەوسوڎێچ مەترسیدارتەرین یاگۍ بیېنۍ پۍ کۆڵبەرا و فرەو کۆڵبەرا چا دووە مەنتیقەنە کریێنۍ ئامانج.
